Ohó Jiwheyẹwhe Tọn Yin Alenu Na Mẹpinplọn
1. Etẹwẹ yin hosọ plidopọ lẹdo tọn owhe sinsẹ̀nzọn 2014 tọn, podọ kanbiọ tẹwẹ na yin dogbapọnna to tito-to-whinnu lọ whenu?
1 ‘Nuplọnmẹtọ Daho’ mítọn, Jehovah, wẹ yin mẹplọntọ dagbe hugan lọ to wẹkẹ lọ mẹ. (Isa. 30:20, 21) Ṣigba, nawẹ Jehovah nọ plọnnu mí gbọn? Ewọ wleawuna owe de he yọ́n taun hugan owe he pò lẹpo—yèdọ Ohó gbọdo etọn, Biblu. Nawẹ nuplọnmẹ Jiwheyẹwhe tọn sọgan hẹn ale wá na mí to agbasa-liho, apọ̀nmẹ, numọtolanmẹ-liho, podọ to gbigbọ-liho gbọn? Gblọndo kanbiọ ehe tọn na yin dogbapọnna to tito-to-whinnu plidopọ lẹdo tọn mítọn owhe sinsẹ̀nzọn 2014 tọn whenu. Hosọ plidopọ lọ tọn he yin “Ohó Jiwheyẹwhe Tọn Yin Alenu Na Mẹpinplọn” sinai do 2 Timoti 3:16 ji.
2. Gblọndo kanbiọ tẹlẹ tọn wẹ na zinnudo nuagokun tito-to-whinnu lọ tọn lẹ ji?
2 Dín Nuagokun Ehelẹ: Nuagokun tito-to-whinnu lọ tọn lẹ na yin nùzindeji to whenue yè na to gblọndo kanbiọ he bọdego ehelẹ tọn na:
• Nuyiwadomẹji tẹwẹ nuplọnmẹ Jiwheyẹwhe tọn nọ tindo do gbẹzan mítọn ji? (Isa. 48:17, 18)
• Eyin mí jlo na vọ́ ninọmẹ mítọn lẹ jlado nado sọgan sẹ̀n Jehovah to sinsẹ̀nzọn whenu-gigọ́ tọn mẹ, jide etẹ tọn wẹ mí sọgan tindo? (Mal. 3:10)
• Etẹwẹ mí dona wà to whenue mí pannukọn ‘nuplọnmẹ he mì ma jẹakọ hẹ lẹ’? (Heb. 13:9)
• Nawẹ mí sọgan hodo “aliho mẹpinplọn tọn” Jesu tọn gbọn? (Mat. 7:28, 29)
• Naegbọn mẹplọntọ lẹ to agun mẹ dona nọ plọn yede? (Lom. 2:21)
• Etẹwẹ Ohó Jiwheyẹwhe tọn yin alenu na? (2 Tim. 3:16)
• Nawẹ ‘whinwhàn’ akọta lẹ tọn nọ yinuwado gbẹtọ lẹ ji gbọn? (Hag. 2:6, 7)
• Jide tẹwẹ Jehovah tindo to mí mẹ? (Efe. 5:1)
• Naegbọn mí dona dovivẹnu nujọnu tọn nado gbọṣi nuplọnmẹ Jehovah tọn mẹ? (Luku 13:24)
3. Naegbọn e do yin nujọnu na mí nado yì plidopọ lọ bosọ yí sọwhiwhe do dotoaina tito-to-whinnu he wá do gànmẹ ehe?
3 Whẹpo Paulu nado kàn hogbe 2 Timoti weta 3 tọn he ji hosọ tito-to-whinnu lọ tọn sinai do lẹ, e basi zẹẹmẹ ojlẹ awusinyẹn tọn he na dohiagona azán godo tọn lẹ tọn. E wlan dọmọ: “Omẹ ylankan lẹ po mẹblutọ lẹ po na to yinylan deji dogọ, yé na to mẹklọ bo nasọ to yinyin kiklọ.” (2 Tim. 3:13) Eyin mí ma na yin kiklọ, nujọnu taun wẹ e yin na mí nado dotoaina nuplọnmẹ Jiwheyẹwhe tọn bosọ yí i do yizan mẹ. Enẹwutu, mì gbọ mí ni magbe nado yì plidopọ lọ bosọ yí sọwhiwhe do dotoaina tito-to-whinnu he wá do gànmẹ ehe.