Yí Nọtẹn Internet Tọn Mítọn Zan Nado Lá Wẹndagbe Lọ
Na Tuli Gbẹtọ lẹ Nado Yí Nọtẹn Mítọn Zan: Mẹdelẹ ma nọ jlo na sèhó mítọn kavi yí owe mítọn lẹ, ṣigba na yé nọ jlo na yọ́n mẹhe Kunnudetọ lẹ yin wutu, yé nọ yì nọtẹn mítọn jw.org ji to owhé yetọn gbè. Enẹwutu, nọ yí dotẹnmẹ dagbe lẹpo zan nado hẹn nọtẹn lọ zun yinyọnẹn na mẹdevo lẹ.
Gblọndo Kanbiọ lẹ Tọn Nina: Eyin whétọ, jlodotọ kavi mẹyinyọnẹn de kanhose do Kunnudetọ lẹ kavi nuyise mítọn lẹ go, a sọgan zan alokan apòmẹ tọn, ọdinatẹẹ, kavi nuyizan he ji a sọgan mọ Internet te do na gblọndo to afọdopolọji. Ṣigba, eyin mì jẹ wefọ lẹ ji, e na yọ́n nado hia yé sọn Biblu mẹ tlọlọ. Eyin a ma tindo nuyizan he ji a sọgan mọ Internet te, do lehe ewọ sọgan zan jw.org nado mọ gblọndo kanbiọ etọn tọn do hia ẹ.—Zín “La Bible et Vous/Questions Bibliques” kavi “Qui Sommes-Nous/Questions Fréquentes.”
Do Hosọ Kavi Zinjẹgbonu de Hlan: Eyin a to wekanhlan mẹde gbọn Internet ji, a sọgan yì jw.org ji bo yí PDF kavi EPUB hosọ kavi zinjẹgbonu mítọn de tọn bo yí i dogọ wekanhlanmẹ lọ. Kavi a sọgan yí hoyidokanji linlinnamẹwe mítọn de tọn do CD ji bo dohlan mẹlọ. Owe, alọnuwe kavi linlinnamẹwe de blebu he a yí sọn jw.org ji bo dohlan mẹhe ma yí baptẹm de gbọn Internet ji sọgan yin hihia taidi owe dogbonu. Eyin a to hosọ kavi zinjẹgbonu de dohlan mẹde gbọn Internet ji, ma wọn gbede nado kàn yinkọ po adlẹsi towe po blo; mọdopolọ hosọ kavi zinjẹgbonu he mí nọ dohlan gbọn Internet ji lẹ ma dona sù. Humọ, mí ma dona yí hosọ kavi zinjẹgbonu de sọn jw.org ji bo yì ze e do nọtẹn Internet tọn devo ji.—Zín “Publications.”
Nọ Do Linlin Yọyọ He Gando Kunnudetọ lẹ Go Hia: Ehe na gọalọna plọnmẹ Biblu towe lẹ po mẹhe a nọ dlapọn lẹ po nado mọ nujọnu-yinyin azọ́n he mí to wiwà lẹdo aihọn pé po pọninọ Klistiani tọn mítọn po tọn. (Ps. 133:1)—Zín “Actualités.”
[Yẹdide/Apotin to weda 5]
(Na nudọnamẹ gigọ́, pọ́n zinjẹgbonu)
Tẹ́n Nọtẹn lọ Pọ́n
1 Nado yí zinjẹgbonu he jlo we, zín “Publications.” Enẹgodo, zín EPUB kavi PDF zinjẹgbonu lọ tọn. Eyin hoyidokanji etọn wẹ a jlo, zín MP3 kavi AAC.
2 Zín MP3 nado mọ hosọ voovo lẹ. Enẹgodo, zín hosọ he dín a te bo yí i sọn nọtẹn lọ ji. Kavi zín nado dotoaina hoyidokanji etọn.
3 Nado yí zinjẹgbonu de to ogbè tangan de mẹ, biọ “Afficher” mẹ bo zín ogbè lọ.