Kẹkẹvi Kavi Tafo de Yiyizan Nado Dekunnu

Kẹkẹvi kavi tafo he ji mí nọ tẹ́ owe mítọn lẹ do yiyizan nado dekunnu ko gọalọ taun nado dọ̀n ahunjijlọnọ lẹ wá nugbo lọ mẹ. (Joh. 6:44) Enẹwutu, mẹho agun tọn lẹ ko yin tulina nado basi tito kunnudide gbangba tọn to nọtẹn aigba-denamẹ agun yetọn tọn he ji afọzọ̀ntọ susu nọ gbọn lẹ. Na mí ma nọ jo kẹkẹvi lọ lẹ do nọtẹn lọ wutu, to paa mẹ e ma nọ yin dandannu nado biọgbè aṣẹpatọ lẹ. Mẹnu lẹ wẹ pegan nado tindo mahẹ to kunnudide ehe mẹ? Wẹnlatọ wuntuntunnọ, he nọ sọnú to aliho dagbe mẹ bo nọ yinuwa po yẹyi po, bosọ yọ́n hodọdopọ hẹ mẹ ganji lẹ. Ayinamẹ he bọdego lẹ do nuhe mí sọgan wà po dehe mí ma dona wà lẹ po hia eyin mí na tindo kọdetọn dagbe dogọ.

Mí dona:

Nọ jọmẹ hẹ aligbọntọ lẹ bo nọ yawu do yé. Wẹnlatọ delẹ nọ konu yẹsẹ bo nọ dọnudo yé po zohunhun po. Eyin aligbọntọ de wá jei bo to owe lọ lẹ pọ́n, a sọgan dọ, “Mì sọgan yí owe de eyin e jlo mì.”
Nọla na kẹkẹvi kavi tafo lọ vude. To fidelẹ, wẹnlatọ lẹ nọ tindo kọdetọn dagbe to whenue yé nọte to mẹtlu kleun delẹ do kẹkẹvi kavi tafo lọ. Mẹdevo lẹ mọdọ mọwiwà nọ zọ́n bọ aligbọntọ lẹ nọ whleawu nado nọte. Enẹwutu, yé nọ dẹn do kẹkẹvi kavi tafo lọ pẹẹde bọ whenue mẹde wá e kọ̀n wẹ yé nọ dọnsẹpọ mẹlọ. To whenue mẹde wá kẹkẹvi kavi tafo lọ kọ̀n, tẹnpọn bo bẹ hodọdopọ de jẹeji hẹ ẹ, vlavo gbọn kinkanse e dali dọ, “Be mì ko lẹnnupọndo kanbiọ enẹ ji pọ́n ya?”
Nọ yí Biblu zan to whedepopenu he e yọnbasi.
Nọ basi zẹẹmẹ lehe tito Biblu pinplọn tọn mítọn nọ yì do tọn na mẹdepope he yí owe nupinplọn tọn mítọn de, taidi owe lọ Biblu Plọn Mí. Biọ nado hò video lọ Naegbọn Mí Dona Plọn Biblu? na mẹlọ to alokan kavi ọdinatẹẹ apòmẹ tọn towe ji.
Nọ yí adlẹsi mẹhe do ojlo hia lẹ tọn eyin e yọnbasi. Eyin mẹlọ ma nọ nọ̀ aigba-denamẹ towe ji, kanwe gọ́ wema lọ Veuillez suivre l’intérêt (S-43), bo yawu yí i na wekantọ agun towe tọn.

Mí ma dona:

Ylangbè namẹ, doṣọ̀ṣọ̀ namẹ, kavi ṣite to kẹkẹvi kavi tafo lọ kọ̀n taidi ponọ nuhọ́tọ de.
Nọ pọ́n kunnudide wunmẹ ehe taidi aliho de nado má owe lẹ poun. Eyin mí yì lizọnyizọn lọ mẹ, yanwle mítọn wẹ nado bẹ plọnmẹ Biblu lẹ jẹeji, enẹwutu mí dona nọ tẹnpọn nado bẹ hodọdopọ jẹeji hẹ gbẹtọ lẹ.
Sú nukọn na kẹkẹvi kavi tafo lọ, kavi to hodọ mapote hẹ azọ́nwatọgbẹ́ mítọn. Eyin a jlo na tẹkan janwẹ, e na yọ́n hugan dọ a ni jẹla pete na kẹkẹvi kavi tafo lọ.
Nọ dọnnu hẹ nukundiọsọmẹtọ lẹ. Eyin nukundiọsọmẹtọ de bẹ whẹgbè do mí ji, e sọgan yọ́n hugan dọ mí ni sẹtẹn jẹ fidevo.