Apotin Kanbiọ Tọn

◼ Be wẹnlatọ lẹ dona nọ yí Intẹnẹt zan nado dekunnuna jonọ he tin to otò devo mẹ lẹ kavi nado plọnnu hẹ yé wẹ ya?

Wẹnlatọ delẹ ko yí Intẹnẹt zan nado tindo plọnmẹ Biblu to otò he mẹ azọ́n mítọn yin alọhẹndotena te lẹ mẹ kavi to fie wẹnlatọ ma sù te lẹ. To ninọmẹ delẹ mẹ, ehe ko hẹn kọdetọn dagbe wá. Etomọṣo, owùnu wẹ e yin dọ wẹnlatọ lẹ ni kanwehlan jonọ lẹ kavi tindo hodọdopọ hẹ yé gbọn Intẹnẹt ji. (Pọ́n Lizọnyizọn Ahọluduta Tọn Mítọn juillet 2007, w. 7.) Dile etlẹ yindọ lẹndai lọ wẹ nado lá owẹ̀n Ahọluduta lọ tọn na gbẹtọ ahunjijlọnọ lẹ, hodọdopọ mọnkọtọn lẹ sọgan zọ́n bọ mẹmẹsunnu kavi mẹmẹyọnnu de na jẹ ogbẹ́ ylankan de do ji, etlẹ sọgan yin hẹ atẹṣitọ lẹ. (1 Kọl. 1:19-25; Kọl. 2:8) Humọ, to otò he mẹ azọ́n Ahọluduta lọ tọn yin alọhẹndotena te lẹ mẹ, aṣẹpatọ lẹ sọgan mọ nuhe wekanhlanmẹ Intẹnẹt ji tọn lẹ bẹhẹn. Hodọdopọ mọnkọtọn lẹ sọgan ze mẹmẹsunnu po mẹmẹyọnnu he to otò lọ mẹ lẹ po do owù mẹ. Enẹwutu, wẹnlatọ lẹ ma dona nọ yí Intẹnẹt zan nado dín gbẹtọ lẹ sọn otò devo mẹ bo lá wẹndagbe lọ na yé gba.

Eyin mí dekunnu to aliho mayin aṣa tọn mẹ na jonọ de he wá sọn otò devo mẹ, mí ma dona tẹnpọn nado doafọna ojlo etọn to whenue e lẹkọyi whé, adavo mí mọ anademẹ yí sọn wekantẹn alahọ mítọn tọn si. Kakatimọ, mí sọgan dohia mẹlọ lehe e sọgan yí jw.org zan do nado mọ nudọnamẹ devo lẹ yí kavi lehe e sọgan mọ wekantẹn alahọ tọn do to fie e te. Mí sọ sọgan na ẹn tuli nado dla Plitẹnhọ Ahọluduta tọn he sẹpọ owhé etọn pọ́n. Nugbo wẹ dọ to otò delẹ mẹ, Plitẹnhọ Ahọluduta tọn de ma tin. Eyin e jlo dọ Kunnudetọ he to lẹdo etọn mẹ lẹ ni wá dla ẹ pọ́n, mí dona kanwe gọ́ alọdowemẹwe lọ Veuillez suivre l’intérêt (S-43) bo yí i na wekantọ agun tọn, bọ e na do e hlan gbọn jw.org ji. Wekantẹn alahọ tọn he nọ penukundo azọ́n lọ go to otò he mẹ jlodotọ lọ nọ nọ̀ yọ́n ninọmẹ tangan he to aimẹ to filọ bo na tin to otẹn dagbe mẹ hugan nado gọalọna mẹlọ to gbigbọ-liho.—Pọ́n Lizọnyizọn Ahọluduta Tọn Mítọn (Flansegbe) juin 2014 w. 7, podọ Lizọnyizọn Ahọluduta Tọn Mítọn, novembre 2011, w. 2.

Eyin mẹhe mí to didlapọn to alọnu din de sẹtẹn yì otò devo mẹ, kavi eyin to alọnu dín mí to nuplọn hẹ mẹde he to otò devo mẹ bọ Intẹnẹt ji poun wẹ mí yọ́n mẹlọ gbọn, mí dona hodo anademẹ he yin sislẹ to aga lọ lẹ. Etomọṣo, mí sọgan zindonukọn nado to afọdona ojlo mẹlọ tọn kakajẹ whenue wẹnlatọ de sọn lẹdo etọn mẹ na penugo nado wàmọ. Ṣigba, eyin otò he mẹ azọ́n mítọn tin to alọhẹndotenamẹ glọ te de mẹ wẹ mẹlọ nọ nọ̀, mí dona họ́ míde taun to whenue mí to hodọdo hosọ Biblu tọn lẹ ji gbọn wekanhlanmẹ, alokan, kavi Intẹnẹt gblamẹ.—Mat. 10:16.