Apotin Kanbiọ Tọn

◼ Mẹnu wẹ dona nọ basi obiọ na owe kavi plọnmẹ Biblu?

Owe mítọn lẹ nọ saba bẹ apotin nudọnamẹ tọn lẹ hẹn he mẹde sọgan kanwe gọ́ bo dohlan wekantẹn alahọ tọn nado biọ owe kavi nado biọ dọ Kunnudetọ Jehovah tọn lẹ ni wá dla emi pọ́n. Humọ, mẹde sọgan yì nọtẹn Internet tọn mítọn www.watchtower.org ji nado biọ plọnmẹ Biblu de. Awuwledainanu ehelẹ to alọgọna mẹsusu nado plọn nugbo lọ. Etomọṣo, nuhahun lẹ ko wá aimẹ to whenue wẹnlatọ delẹ yí awuwledainanu ehelẹ zan do ota hẹnnumẹ yetọn lẹ kavi mẹdevo lẹ tọn mẹ na yé nido mọ alọgọ gbigbọmẹ tọn yí.

Delẹ to mẹhe ma biọ owe mítọn ṣigba bo mọ ẹn yí sọn wekantẹn alahọ tọn mẹ lẹ mẹ nọ gblehomẹ na yé nọ tindo numọtolanmẹ lọ dọ titobasinanu mítọn to kọgbidina yé bosọ wleawuna todohukanji de do ọdinatẹẹ ji he bẹ yinkọ yetọn hẹn. To whedelẹnu, wẹnlatọ he mọ anademẹ yí nado yì dla mẹhe ma biọ dlapọn mítọn tlọlọ de pọ́n nọ jẹflumẹ to whenue mẹlọ gblehomẹ. Enẹwutu, jlodotọ lẹ lọsu wẹ dona nọ biọ owe kavi plọnmẹ Biblu gbọn nọtẹn Internet tọn mítọn ji kavi gbọn wekinkan gọ́ apotin nudọnamẹ tọn lẹ dali, e ma yin wẹnlatọ lẹ wẹ dona nọ basi ehe do ota mẹdevo lẹ tọn mẹ gba. To paa mẹ, eyin e họnwun dọ obiọ mọnkọtọn lẹ yin bibasi do ota mẹdevo tọn mẹ, alahọ ma na kẹalọyi yé.

To whelọnu lo, nawẹ mí sọgan gọalọna hẹnnumẹ kavi mẹyọnmẹ de to gbigbọ-liho gbọn? Eyin hiẹ jlo dọ mẹlọ ni mọ owe de yí, be e ma na yọ́n hugan dọ hiẹ lọsu ni dohlan ẹn tlọlọ ya? Eyin mẹlọ do ojlo hia bo to dindin dọ Kunnudetọ lẹ ni wá dla emi pọ́n ṣigba bọ hiẹ ma yọ́n lehe a sọgan mọ mẹho agun tọn he tin to lẹdo he mẹ e te lẹ do, jaale bo kanwe gọ́ alọdowemẹwe Veuillez Suivre l’Intérêt (S-43) bo ze e jo na wekantọ agun towe tọn he na gbeje e pọ́n bo do e hlan wekantẹn alahọ tọn. Ṣigba, eyin jlodotọ lọ yin ginglọndo gànpamẹ kavi dotowhé, jaale bo ma kanwehlan wekantẹn alahọ tọn do mẹlọ tamẹ blo. Kakatimọ, hiẹ sọgan na ẹn tuli nado mọ mẹmẹsunnu he nọ wá dla gànpa kavi dotowhé lọ pọ́n lẹ kavi nado kanwehlan wekantẹn alahọ tọn na ede.