Ohia sọgbe hẹ osẹ́n, ehe Watch Tower Bible and Tract Society of Pennsylvania nọ yizan

Etẹwẹ Watch Tower Bible and Tract Society Yin?

Watch Tower Bible and Tract Society of Pennsylvania ma yin titobasinanu ajọwiwa tọn de. E yin didoai to 1884 to États-Unis sọgbe hẹ osẹ́n otò Pennsylvanie tọn. Kunnudetọ Jehovah tọn lẹ nọ yí i zan nado nọgodona azọ́n lẹdo aihọn pé tọn yetọn he bẹ Biblu po owe sinai do Biblu ji lẹ zínzín jẹgbonu po hẹn.

Sọgbe hẹ kandai osẹ́n titobasinanu lọ tọn lẹ, yanwle titobasinanu ehe tọn wẹ nado basi “sinsẹ̀n, plọnnumẹ, bo gọalọnamẹ,” titengbe nado “dọyẹwheho bo plọnmẹ wẹndagbe Ahọluduta Jiwheyẹwhe tọn to anademẹ Klisti Jesu tọn glọ.” Nado lẹzun hagbẹ titobasinanu lọ tọn ma sinai do nunina sọha he mẹde na ji gba, ṣigba do oylọ-basinamẹ de ji. Hagbẹ titobasinanu lọ tọn lẹ po anadenanutọ etọn lẹ po nọ gọalọna Hagbẹ Anademẹtọ Kunnudetọ Jehovah tọn lẹ tọn.

Azọ́nwiwa Dopọ hẹ Ogbẹ́ He Sọgbe hẹ Osẹ́n Lẹ

Gbọnvona Watch Tower Bible and Tract Society of Pennsylvania, Kunnudetọ Jehovah tọn lẹ sọ nọ yí ogbẹ́ wiawe he sọgbe hẹ osẹ́n zan to otò voovo lẹ mẹ. Apadewhe yinkọ he delẹ to ogbẹ́ enẹlẹ mẹ tindo tọn nọ bẹ hogbe delẹ hẹn taidi “Watch Tower” kavi “Watchtower” kavi lẹdogbedevomẹ dopo to hogbe ehelẹ mẹ tọn.

Sọn whenue gbọ́n ogbẹ́ voovo ehelẹ ko yin didoai, yé ko hẹn mí penugo nado wá azọ́n susu lẹ, taidi dehe bọdego ehelẹ:

Wekinkan po zinjẹgbonu owe lẹ tọn po. Mí ko zín Biblu diblayi livi 220 po owe sinai do Biblu ji diblayi liva 40 po jẹgbonu to ogbè 700 linlán mẹ. Nọtẹn Intẹnẹt tọn jw.org nọ hùn dotẹnmẹ dote na gbẹtọ lẹ nado hia Biblu vọnu to ogbè 120 linlán mẹ, podọ nado mọ gblọndo na kanbiọ sinai do Biblu ji lẹ taidi “Etẹwẹ Ahọluduta Jiwheyẹwhe tọn yin?”
Mẹpinplọn. Mí nọ deanana wehọmẹ Biblu pinplọn tọn voovo lẹ. Di apajlẹ, sọn 1943, Kunnudetọ Jehovah tọn 8 000 linlán wẹ ko mọaleyi sọn azọ́nplọnmẹ sisosiso he nọ yin nina to Wehọmẹ Biblu Pinplọn Watchtower Giliadi tọn mẹ. Wehọmẹ ehe nọ hẹn yé penugo nado dọyẹwheho to otò devo mẹ taidi mẹdehlan kavi nado hẹn azọ́n lẹdo aihọn pé tọn mítọn hẹnai. Gbọnvona enẹ, to sẹmẹsẹmẹ, gbẹtọ livi susu he bẹ mẹhe ma tlẹ yin Kunnudetọ Jehovah tọn lẹ hẹn wẹ nọ plọnnu to opli he nọ yin bibasi to agun mítọn lẹ dopodopo mẹ. Mí sọ nọ deanana klasi wehihia po wekinkan po tọn lẹ bo ko wleawuna owe de he nọ plọn gbẹtọ lẹ wehihia po wekinkan po. Owe ehe tin to ogbè 110 mẹ.
Alọgigọna mẹdevo lẹ. Mí ko wleawuna nunina kọgbọ tọn na mẹhe go nujijọ ajiji tọn lẹ jọ do lẹ, vlavo nugbajẹmẹji he gbẹtọ hẹnwa lẹ taidi awhàn he wá aimẹ to Rwanda to 1994 kavi nugbajẹmẹji jọwamọ tọn lẹ taidi aigba sisọsisọ he jọ to Haiti to 2010.

Dile etlẹ yindọ susu alọgọ lọ lẹ tọn wá gbọn titobasinanu lọ lẹ kavi ogbẹ́ osẹ́n tọn he mí nọ yizan lẹ gblamẹ, azọ́n mítọn ma to anademẹ depope yetọn tọn glọ. Klistiani dopodopo tindo azọngban lọ nado setonuna gbedide Jiwheyẹwhe tọn lọ nado dọyẹwheho bo plọnmẹ wẹndagbe lọ. (Matiu 24:14; 28:19, 20) Mí yise dọ Jiwheyẹwhe wẹ to godonọna azọ́n mítọn podọ e na zindonukọn nado to “hinhẹn ẹn whẹ́n.”—1 Kọlintinu lẹ 3:6, 7.