Gbọṣi Tenọgli mẹ Taidi Mẹhe to Mimọ Mẹhe Yin Mayinukundomọ Lọ!
“[Mose] doakọnna ẹn taidi e mọ ewọ heyin [mayinukundomọ] lọ.”—HEBLU LẸ 11:27.
1. Hodidọ ayidego tọn tẹwẹ Jesu dọ gando Jiwheyẹwhe go to Yẹwhehodidọ Osó ji tọn etọn mẹ?
JEHOVAH yin Jiwheyẹwhe mayinukundomọ. To whenuena Mose biọ nado mọ gigo Etọn, Jehovah gblọn dọmọ: “Hiẹ ma sọgan mọ nukunmẹ ṣie gba: na gbẹtọ mọ mi ma na nọgbẹ̀ gba.” (Eksọdusi 33:20) Podọ apọsteli Johanu wlan dọmọ: “Mẹde ma mọ Jiwheyẹwhe gbede.” (Johanu 1:18) To whenuena Jesu Klisti yin gbẹtọ de to aigba ji, ewọ lọsu ma tlẹ sọgan mọ Jiwheyẹwhe gba. Enẹwutu, to Yẹwhehodidọ Osó ji tọn etọn mẹ, Jesu dọmọ: “[Ayajẹnọ] wẹ wiwenọ to ayiha mẹ lẹ; na yé na mọ Jiwheyẹwhe.” (Matiu 5:8) Etẹ dọ wẹ Jesu te?
2. Naegbọn mí ma sọgan mọ Jiwheyẹwhe po nukun agbasalan tọn mítọn lẹ po?
2 Owe-wiwe do Jehovah hia taidi Gbigbọ mayinukundomọ de. (Johanu 4:24; Kọlọsinu lẹ 1:15; 1 Timoti 1:17) Enẹwutu, Jesu ma to didọ dọ mí gbẹtọvi lẹ sọgan mọ Jehovah po nukun agbasa tọn mítọn lẹ po na taun tọn gba. Nugbo wẹ dọ, Klistiani yiamisisadode lẹ na mọ Jehovah Jiwheyẹwhe to olọn mẹ to whenuena yé yin finfọnsọnku taidi nudida gbigbọnọ lẹ godo. Ṣigba gbẹtọvi heyin “wiwenọ to ayiha mẹ” bosọ tindo todido gbẹninọ kakadoi to aigba ji tọn lẹ lọsu penugo nado “mọ” Jiwheyẹwhe. Nawẹ ehe yọnbasi gbọn?
3. Nawẹ gbẹtọvi lẹ sọgan yọ́n jẹhẹnu Jiwheyẹwhe tọn delẹ gbọn?
3 Mí nọ plọnnu gando Jehovah go gbọn yíyí sọwhiwhe do doayi nuhe e dá lẹ go dali. Gbọnmọ dali huhlọn etọn sọgan yinuwado mí ji bo whàn mí nado yọ́n ewọ taidi Jiwheyẹwhe Mẹdatọ lọ. (Heblu lẹ 11:3; Osọhia 4:11) Gando ehe go, apọsteli Paulu wlan dọmọ: “Na yè mọ onú mamọ [Jiwheyẹwhe tọn] lẹ sọn whẹwhẹwhenu aihọn tọn to wedede, yè to nuyọnẹn onú he yè basi lẹ tọn do to yé yọnẹn, yèdọ huhlọn madopodo po ozọnji etọn po.” (Lomunu lẹ 1:20) Enẹwutu hogbe Jesu tọn lẹ gando mimọ Jiwheyẹwhe go bẹ nugopipe nado yọ́n jẹhẹnu Jehovah tọn delẹ hẹn. Mẹmimọ mọnkọtọn yin zize sinai do oyọnẹn he sọgbe ji podọ e nọ yin mimọ to gbigbọ-liho gbọn ‘nukun ahun tọn lẹ’ dali. (Efesunu lẹ 1:18) Hodidọ po nuyiwa Jesu tọn lẹ po lọsu sọ de nususu hia gando Jiwheyẹwhe go. Enẹwutu, Jesu dọmọ: “Ewọ he ko mọ mi ko mọ Otọ́.” (Johanu 14:9) Jesu do gbẹtọ-yinyin Jehovah tọn hia to pipé mẹ. Gbọnmọ dali, oyọnẹn gbẹzan po nuplọnmẹ Jesu tọn lẹ po sọgan gọalọna mí nado mọ, kavi yọ́n, delẹ to jẹhẹnu Jiwheyẹwhe tọn lẹ mẹ.
Gbigbọnọ-Yinyin Yin Nujọnu
4. Nawẹ mẹsusu nọ do gbigbọnọ-mayin hia to egbehe gbọn?
4 To egbehe, yise po gbigbọnọ-yinyin nugbonugbo po matin gba. “Omẹ pó ma tindo yise gba,” wẹ Paulu dọ. (2 Tẹsalonikanu lẹ 3:2) Mẹsusu wẹ ko yin wiwle mlẹnmlẹn do nuyanwle yedetiti tọn lẹ mẹ bọ yé ma tindo yise to Jiwheyẹwhe mẹ ba. Walọyizan ylanwiwa po gbigbọnọ mayin yetọn po nọ glọnalina yé sọn yíyí nukun nukunnumọjẹnumẹ tọn yetọn do mọ ewọ mẹ, na apọsteli Johanu wlan dọmọ: “Ewọ he to ylanwa, ma mọ Jiwheyẹwhe gba.” (3 Johanu 11) Na omẹ mọnkọtọn lẹ ma yí nukun agbasalan tọn yetọn do mọ Jiwheyẹwhe wutu, yé nọ yinuwa taidi dọ e ma nọ mọ nuhe yé to wiwà wẹ nkọtọn. (Ezekiẹli 9:9) Yé nọ vlẹ onú gbigbọmẹ tọn lẹ, enẹwutu yé ma sọgan tindo “oyọnẹn Jiwheyẹwhe tọn.” (Howhinwhẹn lẹ 2:5) To whelọnu lo, po gbesisọ po, Paulu wlan dọmọ: “Gbẹtọ jọwamọ tọn ma yí onú gbigbọ Jiwheyẹwhe tọn tọn lẹ gba; na onulu wẹ yé yin hlan ẹn: mọ e masọ sọgan yọ́n yé, na gbigbọ wẹ yè do nọ whlé yé pọ́n wutu.”—1 Kọlintinu lẹ 2:14.
5. Nugbo tẹwẹ mẹhe onú gbigbọmẹ tọn nọ duahunmẹna lẹ yọnẹn?
5 Ṣigba, eyin onú gbigbọmẹ tọn lẹ nọ duahunmẹna mí, mí na yọnẹn to whepoponu dọ dile etlẹ yindọ Jehovah ma yin Jiwheyẹwhe he nọ to nuṣiwa dín de do sọ, e nọ yọnẹn eyin mí yinuwado linlẹn kavi ojlo ylankan lẹ ji. Na nugbo tọn, “aliho gbẹtọ tọn tin to nukọn OKLUNỌ tọn, e sọ to wiwà etọn lẹpo lẹnpọn.” (Howhinwhẹn lẹ 5:21) Eyin mí jai jẹ ylando mẹ janwẹ, mí nọ yin whinwhàn nado lẹnvọjọ bo dín jona Jehovah tọn na mí yiwanna ẹn bo ma nọ jlo na hẹn ẹn gblehomẹ wutu.—Psalm 78:41; 130:3.
Etẹwẹ Nọ Hẹn Mí Nado Nọte Gligli?
6. Etẹwẹ e zẹẹmẹdo nado yin tenọglinọ?
6 Dile nukun mítọn lẹ ma tlẹ sọgan mọ Jehovah sọ, mì gbọ mí ni nọ flin to whepoponu dọ ewọ nọ mọ míwlẹ. Yinyọnẹn dọ e tin podọ nujikudo lọ dọ e sẹpọ mẹhe to yiylọ ẹ lẹpo na gọalọ nado hẹn mí nado nọtegli—yèdọ gligli podọ masẹafọ to nugbonọ-yinyin mítọn mẹ hlan ẹn. (Psalm 145:18) Mí sọgan taidi Mose, mẹhe go Paulu wlanwe gando dọmọ: “Gbọn yise dali e gbẹ́ Egipti dai, bo masọ dibuna homẹgble ahọlu tọn: e doakọnna ẹn taidi e mọ ewọ heyin mamọ.”—Heblu lẹ 11:27.
7, 8. Etẹwẹ hẹn Mose nado tindo adọgbigbo to Falo nukọn?
7 To azọ́ndenamẹ Jiwheyẹwhe tọn heyin nado deanana Islaelivi lẹ sọn kanlinmọgbenu Egipti tọn hinhẹndi etọn mẹ, Mose nọ saba sọawuhia to Falo kọgbidinamẹtọ nukọn to họ̀nmẹ ahọlu tọn de he nọ gọna gbẹtọ diyin sinsẹ̀n po awhànfunfun tọn lẹ po. Vlavo, boṣiọ lẹ tin to adó họ̀nmẹ tọn lọ go. Ṣigba, dile Jehovah tlẹ yin mayinukundomọ do sọ, e yin omẹ nujọnu tọn de hlan Mose, to ma taidi boṣiọ lẹpo he to nukunmọnu yin na yẹwhe he ma tindo ogbẹ̀ Egipti tọn lẹ mẹ. Abajọ Mose ma do yin budona gbọn Falo dali!
8 Etẹwẹ na adọgbigbo lọ Mose nado sọawuhia to Falo nukọn pludopludo? Owe-wiwe dọna mí dọ “dawe lọ Mose yin homẹmimiọnnọ tlala hú omẹ he tin to nukunmẹ aigba lọ tọn ji lẹpo.” (Osọha lẹ 12:3) E họnwun dọ, gbigbọnọ-yinyin he lodo podọ nujikudo etọn dọ Jiwheyẹwhe tin hẹ emi na Mose huhlọn he e tindo nuhudo etọn nado yin nukunmọnu ‘Omẹ mayinukundomọ lọ tọn’ to ahọlu kanylantọ Egipti tọn nukọn. Etẹwẹ yin delẹ to aliho he mẹ mẹhe “mọ” Jiwheyẹwhe mayinukundomọ lọ lẹ nọ do yise yetọn to ewọ mẹ hia te?
9. Etẹwẹ yin aliho dopo he mẹ mí sọgan zindonukọn to tenọgli mẹ te?
9 Aliho dopo nado do yise hia podọ nado to nukọnzindo po tenọgli po taidi mẹhe to Omẹ heyin mayinukundomọ lọ mọ wẹ gbọn adọgbigbo yíyí do dekunnu mahopọnna homẹkẹn dali. Jesu na avase devi etọn lẹ dọmọ: “Yé na gbẹwanna mì sọn gbẹtọ lẹpo dè, na oyín ṣie tọn wutu.” (Luku 21:17) E sọ dọna yé ga dọmọ: “Afanumẹ ma klohu oklunọ etọn. Eyin yé dohomẹkẹn mi, yé nasọ dohomẹkẹn mìwlẹ ga.” (Johanu 15:20) Hlan hẹndi ohó Jesu tọn lẹ, to okú etọn godo tlolo, hodotọ etọn lẹ jiya homẹkẹndomẹ tọn to wunmẹ nukunvandomẹ, mẹwiwle, po hihò tọn lẹ po mẹ. (Owalọ lẹ 4:1-3, 18-21; 5:17, 18, 40) Dile homẹkẹn tlẹ gbayipe do sọ, apọsteli Jesu tọn lẹ po devi devo lẹ po to yẹwheho wẹndagbe lọ tọn dọ zọnmii po adọgbigbo po.—Owalọ lẹ 4:29-31.
10. Nawẹ jidide mítọn to nukunpedomẹgo mẹtọnhopọn Jehovah tọn mẹ sọgan gọalọna mí to lizọnyizọn lọ mẹ gbọn?
10 Taidi Mose, hodotọ fliflimẹ Jesu tọn lẹ mayin budona gbọn kẹntọ susu yinukundomọ yetọn lẹ dali gba. Devi Jesu tọn lẹ tindo yise to Jiwheyẹwhe mẹ, podọ taidi kọdetọn de, yé penugo nado doakọnna homẹkẹn sinsinyẹn he yé tindo numimọ etọn lẹ. Mọwẹ, yé zindonukọn po tenọgli po taidi mẹhe mọ Omẹ lọ heyin mayinukundomọ. To egbehe, oyọnẹn gbọzangbọzan nukunpedomẹgo mẹtọnhopọn Jehovah tọn nọ na mí tudido, bo nọ na mí adọgbigbo po bumadi po to azọ́n yẹwhehodidọ-Ahọluduta tọn mítọn mẹ. Ohó Jiwheyẹwhe tọn dọ dọ “obu gbẹtọ tọn wẹ nọ hẹn omọ̀ wá: ṣigba mẹdepope he yí otù etọn do OKLUNỌ go, wẹ yè na ze daga.” (Howhinwhẹn lẹ 29:25) Enẹwutu, mí ma nọ joagọyigodo to obu homẹkẹn tọn mẹ gba; mọjanwẹ winyan lizọnyizọn lọ tọn ma nọ hù mí do niyẹn. Yise mítọn nọ whàn mí nado yí adọgbigbo do dekunnu na kọmẹnu lẹ, azọ́nwatọgbẹ́ lẹ, wehọmẹvigbẹ lẹ, po mẹdevo lẹ po.—Lomunu lẹ 1:14-16.
Omẹ Mayinukundomọ lọ to Anadena Omẹ Etọn Lẹ
11. Sọgbe hẹ Pita po Juda po, nawẹ mẹhe to gbẹdo hẹ agun Klistiani tọn delẹ do gbigbọnọ-mayin hia gbọn?
11 Yise nọ gọalọna mí nado mọ Jehovah taidi omẹ lọ he to anadena titobasinanu aigba ji tọn etọn. Gbọnmọ dali mí nọ dapana walọyizan homọdọdomẹgo tọn gando mẹhe tindo azọngban to agun lọ mẹ lẹ go. Apọsteli Pita po Juda nọvisunnu daa Jesu tọn po na avase gando mẹdelẹ go he gbọ̀agba gbigbọnọ-yinyin tọn sọmọ bọ yé nọ zannù do sunnu he to nukọntọ yin to Klistiani lẹ ṣẹnṣẹn go. (2 Pita 2:9-12; Juda 8) Eyin yé ko nọ mọ Jehovah po nukun po wẹ, be nuṣiwa-dintọ mọnkọtọn lẹ na ko dọho to aliho mọnkọtọn mẹ to nukọn etọn wẹ ya? Paali! Ṣigba na Jiwheyẹwhe yin mayinukundomọ wutu, gbẹtọ agbasalan tọn enẹlẹ gboawupo nado yọnẹn dọ yé na dogbè na ẹn.
12. Walọyizan tẹwẹ míwlẹ dona dohia hlan mẹhe to nukọntọ yin to agun lọ mẹ lẹ?
12 Nugbo wẹ dọ, agun Klistiani tọn bẹ gbẹtọvi mapenọ lẹ hẹn. Mẹhe to nuyiwa taidi mẹho lẹ nọ ṣinuwa to whedelẹnu he sọgan gando mí go. Etomọṣo, Jehovah to sunnu mọnkọtọn lẹ yizan taidi lẹngbọhọtọ apó etọn tọn. (1 Pita 5:1, 2) Sunnu po yọnnu po he onú gbigbọmẹ tọn lẹ nọ duahunmẹna lẹ yọnẹn dọ ehe yin dopo to aliho he mẹ Jehovah nọ deanana omẹ etọn lẹ te. Enẹwutu, taidi Klistiani lẹ, mí nọ dapana gbigbọ homọdọdomẹgo, yèdọ lewuwu tọn bo nọ tindo sisi na tito yẹwhehọluduta tọn Jiwheyẹwhe tọn lẹ. Gbọn tonusetọ yinyin na mẹhe to nukọntọ yin to ṣẹnṣẹn mítọn lẹ dali, mí nọ dohia dọ mí mọ Omẹ lọ heyin mayinukundomọ.—Heblu lẹ 13:17.
Mimọ Jiwheyẹwhe Taidi Nuplọnmẹtọ Daho Mítọn
13, 14. Etẹwẹ mimọ Jehovah taidi Nuplọnmẹtọ Daho lọ zẹẹmẹdo na we?
13 Ninọmẹ devo sọ tin he biọ ayidonugo gbigbọmẹ tọn mítọn. Isaia dọ dọdai dọmọ: ‘Nukun towe lẹ na mọ Nuplọnmẹtọ Daho towe.’ (Isaia 30:20) E nọ biọ yise nado yọnẹn dọ Jehovah wẹ yin omẹ lọ he to mí plọn gbọn titobasinanu aigba ji tọn etọn gblamẹ. (Matiu 24:45-47) Jiwheyẹwhe mimọ taidi Nuplọnmẹtọ Daho mítọn tindo zẹẹmẹ hugan walọyizan Biblu-pinplọn tọn dagbe de go hinhẹn po opli Klistiani tọn lẹ yìyì to gbesisọmẹ po. E zẹẹmẹdo nado yí dagbenu awuwledainanu gbigbọmẹ tọn Jiwheyẹwhe tọn lẹ to gigọ́mẹ. Di dohia, mí dona nọ na ayidonugo titengbe anademẹ he Jehovah nọ namẹ gbọn Jesu gblamẹ lẹ na mí ni ma do dùdú kọnai to gbigbọ-liho blo.—Heblu lẹ 2:1.
14 E nọ biọ vivẹnudido vonọtaun to whedelẹnu nado mọ ale gigọ́ yí sọn núdùdù gbigbọmẹ tọn lẹ mẹ. Di apajlẹ, mí sọgan nọ yìn nukun gbọn kandai Biblu tọn delẹ he mí mọdọ e sinyẹn nado mọnukunnujẹemẹ lẹ ji poun. To whenuena yè to linlinnamẹwe Atọ̀họ̀-Nuhihọ́ Lọ Tọn po Réveillez-vous! lẹ po hia, vlavo mí tlẹ nọ dasá hosọ delẹ na mí ma tindo ojlo to nuhe ji e dọhodo mẹ sọmọ wutu. Kavi mí sọgan nọ na dotẹnmẹ ayiha mítọn lẹ nado nọ dánpe to opli Klistiani tọn lẹ ji. Ṣigba, mí sọgan nọ aṣeji eyin mí nọ yí sọwhiwhe do lẹnnupọndo nuagokun he yè to dogbapọnna lẹ ji. Pinpẹn-nutọn-yinyọnẹn sisosiso mítọn na nudọnamẹ gbigbọmẹ tọn he mí mọyi lẹ nọ dohia dọ mí yọ́n Jehovah taidi Nuplọnmẹtọ Daho mítọn.
Mí Dona Dogbè
15. Nawẹ mẹdelẹ ko yinuwa taidi dọ Jehovah ma to yé mọ nkọtọn gbọn?
15 Na ylanwiwa gbayipe sọmọ to “ojlẹ opodo lọ tọn” ehe mẹ na taun tọn wutu, yise to Omẹ lọ heyin mayinukundomọ mẹ yin onú titengbe. (Daniẹli 12:4) Nugbomadọ po fẹnnuwiwa zanhẹmẹ tọn po gbayipe tlala. Na nugbo tọn, nuyọnẹnnu wẹ e yin nado flin dọ Jehovah nọ doayi nuyiwa mítọn lẹ go etlẹ yin to whenuena gbẹtọvi lẹ ma penugo nado mọ mí. Mẹdelẹ ko wọnji nugbo ehe go. To whenuena mẹdevo lẹ ma mọ yé, yé sọgan tindo mahẹ to walọyizan he ma sọgbe hẹ Owe-wiwe lẹ mẹ. Di dohia, mẹdelẹ ma ko nọavunte sọta whlepọn lọ nado nọ pọ́n ayidedai awugblenamẹ tọn po yẹdide fẹnnuwiwa tọn po to Internet, televiziọn, po wunmẹ azọ́n nuyọnẹn wintinwintin egbezangbe tọn devo lẹ po ji gba. To whenuena e yindọ mahẹ tintindo to onú mọnkọtọn lẹ mẹ sọgan yin wiwà to nuglọ, mẹdelẹ ko yinuwa taidi dọ Jehovah ma nọ mọ nuyiwa yetọn lẹ wẹ nkọtọn.
16. Etẹwẹ dona gọalọna mí nado setonuna nujinọtedo he yiaga Jehovah tọn lẹ?
16 Onú dagbe wẹ e yin nado hẹn hodidọ apọsteli Paulu tọn lẹ do ayiha mẹ dọmọ: “Dopodopo mítọn wẹ na dọho ede tọn hlan Jiwheyẹwhe.” (Lomunu lẹ 14:12) Mí dona yọnẹn dọ whedepopenu he mí waylando, mí to ylando wà sọta Jehovah. Ehe yinyọnẹn dona gọalọna mí nado setonuna nujinọtedo yiaga etọn lẹ podọ nado dapana nuyiwa mawé tọn lẹ. Biblu flinnu mí dọmọ: “Nudida he ma doawuhia to nukọn etọn de matin: mọ onú lẹpo wẹ to omẹ́ bosọ hùndonuvo to nukun etọn mẹ, mẹhe míwlẹ [na dogbè na].” (Heblu lẹ 4:13) Nugbo wẹ dọ, mí dona dogbè na Jiwheyẹwhe, ṣigba owanyi sisosiso mítọn na Jehovah wẹ yin whẹwhinwhẹ́n tangan he wutu mí to ojlo etọn wà bosọ nọ setonuna nujinọtedo dodo tọn etọn lẹ na jide tọn. Enẹwutu mì gbọ mí ni nọ yi wuntuntun zan to whẹho mọnkọtọn lẹ mẹ taidi nudide ayidedai tọn mítọn po nuyiwa mítọn hẹ omẹ vijinu awetọ tọn lẹ po.
17. Ojlo wunmẹ tẹwẹ Jehovah nọ yí do pọ́n mí?
17 Jehovah tindo ojlo vẹkuvẹku to mí mẹ, ṣigba enẹ ma zẹẹmẹdo dọ e nọ nọte dọ mí ni ṣinuwa na e ni sọgan sayana mí gba. Kakatimọ, e nọ doayi mí go po mẹtọnhopọn owanyi tọn po, taidi otọ́ de he jlo na suahọ ovi tonusetọ etọn lẹ nkọtọn. Lehe e nọ miọnhomẹnamẹ sọ nado yọnẹn dọ yise mítọn nọ hẹn homẹhun Otọ́ olọn mẹ tọn mítọn podọ dọ “ewọ wẹ ahọsutọ yé he whesọ do dín in lẹ tọn.” (Heblu lẹ 11:6) Mì gbọ mí ni tindo yise mlẹnmlẹn to Jehovah mẹ bosọ ‘sẹ̀n ẹn po ahun pipé de po.’—1 Otannugbo lẹ 28:9.
18. Na Jehovah nọ pọ́n mí bo nọ doayi nugbonọ-yinyin mítọn go wutu, mẹhẹndeji tẹwẹ mí mọyi sọn Owe-wiwe mẹ?
18 Howhinwhẹn lẹ 15:3 dọmọ: “Nukun OKLUNỌ tọn tin to ofi popo, e to mẹylankan po mẹdagbe lẹ po pọ́n.” Mọwẹ, Jiwheyẹwhe to mẹylankan lẹ po mẹdagbe lẹ po pọ́n bosọ nọ yinuwa hẹ yé sọgbe hẹ walọ yetọn. Ṣigba, eyin mí tin to “mẹdagbe lẹ” mẹ, mí sọgan deji dọ Jehovah nọ doayi nuyiwa nugbonọ-yinyin tọn mítọn lẹ go. Lehe e nọ hẹn yise lodo do sọ nado yọnẹn dọ ‘tuklajẹ mítọn mayin ovọ́ to kọndopọmẹ hẹ Oklunọ’ podọ dọ omẹ lọ heyin mayinukundomọ ma na ‘wọnji azọ́n po owanyi he mí ko dohia hlan oyín etọn po go’!—1 Kọlintinu lẹ 15:58; Heblu lẹ 6:10.
Oylọ Bibasina Jehovah Nado Gbeje Mí Pọ́n
19. Etẹwẹ yin delẹ to ale he nọ wá sọn yise he lodo to Jehovah mẹ lẹ mẹ?
19 Taidi devizọnwatọ nugbonọ Jehovah tọn lẹ, mí yin nuhọakuẹ hlan ẹn. (Matiu 10:29-31) Dile mí ma tlẹ sọgan mọ ẹn po nukun po do sọ, e sọgan yin omẹ nujọnu tọn hlan mí, podọ mí sọgan wlebòna haṣinṣan họakuẹ mítọn hẹ ẹ. Walọyizan mọnkọtọn tintindo hlan Otọ́ olọn mẹ tọn mítọn nọ hẹn alemọyi susu wá na mí. Yise he lodo mítọn nọ gọalọna mí nado tindo ahun wiwe ṣeke de podọ ayihadawhẹnamẹnu dagbe de to Jehovah nukọn. Yise he ma tindo yẹnuwiwa sọ nọ glọnalina mí sọn gbẹzan awe zinzan mẹ. (1 Timoti 1:5, 18, 19) Yise he ma hokọ̀ to Jiwheyẹwhe mẹ mítọn nọ ze apajlẹ dagbe de dai bo sọgan tindo nuyiwadomẹji dagbe de do mẹhe lẹdo mí lẹ ji. (1 Timoti 4:12) Humọ, yise mọnkọtọn nọ ze walọyizan he Jiwheyẹwhe kẹalọyi lẹ dai, bo nọ hẹn ahun Jehovah tọn jaya.—Howhinwhẹn lẹ 27:11.
20, 21. (a) Naegbọn mí dona jlo dọ nukun mẹpinpọ́n tọn Jehovah tọn ni tin to mí ji? (b) Nawẹ mí sọgan yí Psalm 139:23, 24 zan na mídetiti gbọn?
20 Eyin mí yin nuyọnẹntọ nugbonugbo, homẹ mítọn nọ hùn dọ Jehovah nọ to mí pọ́n. E mayin dọ mí nọ jlo dọ e ni mọ mí kẹdẹ wẹ gba ṣigba mí sọ nọ jlo ga dọ e ni gbeje linlẹn po nuyiwa mítọn lẹ po pọ́n kitokito. To odẹ̀ mẹ, mí na wà dagbe nado basi oylọna Jehovah nado dindona mí bo pọ́n eyin mí tindo ayilinlẹn he ma sọgbe depope. E sọgan gọalọna mí nado pehẹ nuhahun mítọn lẹ podọ nado basi vọjlado he jẹ depope na jide tọn. Po gbesisọ po, psalm-kàntọ Davidi jihàn dọmọ: “Dindona mi, Jiwheyẹwhe E, na a ni yọ́n ayiha ṣie: whlé mi pọ́n, na a ni yọ́n tùmajai ṣie lẹ: bosọ pọ́n eyin aliho ylankan de to ohò ṣie mẹ, bosọ hẹn mi gbọ̀n aliho madopodo lọ mẹ.”—Psalm 139:23, 24.
21 Davidi vẹvẹ dọ Jehovah ni dindona emi bo pọ́n eyin “aliho ylankan de” tin to emi mẹ. Taidi psalm-kàntọ lọ, be mí ma nọ jlo vẹkuvẹku dọ Jiwheyẹwhe ni dindona ahun mítọn lẹ bo pọ́n eyin mí tindo mẹwhinwhàn he ma sọgbe lẹ ya? To whelọnu lo, to yise mẹ mì gbọ mí ni biọ Jehovah nado gbeje mí pọ́n. Ṣigba etẹwẹ eyin magbọjẹ do nuṣiwa delẹ ji to tuklado mí kavi onú he nọ gbleawunamẹ de tin to ohò mítọn mẹ? To whelọnu mì gbọ mí ni to dẹ̀ho vẹkuvẹku hlan Jiwheyẹwhe owanyinọ mítọn, yèdọ Jehovah, bosọ gbọn whiwhẹ dali litaina anademẹ gbigbọ wiwe tọn etọn po ayinamẹ Ohó etọn tọn po. Mí sọgan deji dọ e na gọalọna mí nado doafọna aliho nuyiwa tọn de he na dekọtọn do ogbẹ̀ madopodo mẹ.—Psalm 40:11-13.
22. Etẹwẹ dona yin gbemima mítọn gando Omẹ lọ heyin mayinukundomọ go?
22 Mọwẹ, Jehovah na yí ogbẹ̀ mavọmavọ do dona mí eyin mí jẹ nubiọtomẹsi etọn lẹ kọ̀n. Na nugbo tọn, mí dona yọ́n huhlọn po aṣẹpipa etọn po, yèdọ dile apọsteli Paulu wà do to whenuena e wlan dọmọ: “Hlan Ahọlu madopodo, makú, mamọ, Jiwheyẹwhe nuyọnẹntọ dopolọ, wẹ yẹyi po gigo po tin na kakadoidoi. Niṣẹ.” (1 Timoti 1:17) Mì gbọ mílọsu ni do gbégbigbò sọn ahun mẹ wá mọnkọtọn hia Jehovah. Podọ mahopọnna nuhe sọgan jọ, mì gbọ mí ni ma hokọ̀ gbede to gbemima mítọn nado zindonukọn po tenọgli po taidi mẹhe to mimọ Mẹhe yin mayinukundomọ lọ blo.
Nawẹ Hiẹ Na Na Gblọndo Gbọn?
• Nawẹ e yọnbasi na gbẹtọvi lẹ nado mọ Jiwheyẹwhe gbọn?
• Eyin Jehovah yin omẹ nujọnu tọn na mí, nawẹ mí na yinuwa gbọn eyin yè do homẹkẹn mí?
• Etẹwẹ e zẹẹmẹdo nado mọ Jehovah taidi Nuplọnmẹtọ Daho mítọn?
• Naegbọn mí dona jlo dọ Jehovah ni gbeje mí pọ́n?
[Yẹdide to weda 18]
Na e mayin budona gbọn Falo dali wutu, Mose yinuwa taidi dọ e sọgan mọ Jehovah, yèdọ Jiwheyẹwhe mayinukundomọ lọ nkọtọn
[Yẹdide to weda 21]
Mí ni ma yinuwa pọ́n gbede taidi dọ Jehovah ma sọgan mọ nuhe mí to wiwà lẹ blo
[Yẹdide to weda 23]
Mí nọ dín oyọnẹn Jiwheyẹwhe tọn vẹkuvẹku na mí mọ ẹn taidi Nuplọnmẹtọ Daho mítọn wutu