Etẹwẹ Ahọluduta Jiwheyẹwhe Tọn Yin?

ETẸWẸ yin hosọ yẹwhehodidọ Jesu tọn? Sọgbe hẹ nuhe Jesu lọsu dọ, Ahọluduta Jiwheyẹwhe tọn wẹ. (Luku 4:43) Ahọluduta lọ nọ yin nùdego whlasusu eyin Jesu to hodọna gbẹtọ lẹ. Be hodidọ etọn hẹn yé biọ bẹwlu mẹ wẹ ya? Be yé kàn nuhe Ahọluduta lọ yin sè e wẹ ya? Lala. Kandai owe Wẹndagbe tọn lẹ ma donù kanbiọ mọnkọtọn lẹ go gba. Eyin mọ wẹ, be omẹ enẹlẹ jẹakọ hẹ hosọ lọ gando Ahọluduta Jiwheyẹwhe tọn go ya?

Nugbo lọ wẹ yindọ Owe-wiwe hohowhenu tọn he Ju lẹ nọ pọnhlan taidi onú wiwe basi zẹẹmẹ Ahọluduta lọ tọn, bo do nuhe e yin hia po nuhe e na wadotana po to hogbe tlọlọ he họnwun lẹ mẹ. To egbehe, mí sọgan plọn nususu gando Ahọluduta lọ go taidi Ju lẹ gbọn Biblu yiyizan dali. Mì gbọ mí ni gbadopọnna nugbo ṣinawe he Biblu plọn mí gando Ahọluduta lọ go. Atọ̀n tintan lẹ ko yin hinhẹn họnwun to azán Ju he nọgbẹ̀ to ojlẹ Jesu tọn mẹ lẹ po mẹhe nọgbẹ̀ jẹnukọnna wiwá etọn lẹ po tọn gbè. Atọ̀n he bọdego lẹ yin hinhẹn họnwun gbọn Klisti kavi gbọn apọsteli etọn lẹ dali to owhe kanweko tintan whenu. Godo tọn lọ wá họnwun to ojlẹ mítọn mẹ.

1. Ahọluduta Jiwheyẹwhe tọn yin gandudu nujọnu tọn de, he na gbọṣi aimẹ kakadoi. Dọdai Biblu tọn tintan dohia dọ Jiwheyẹwhe na do whlẹngántọ de hlan gbẹtọvi nugbonọ lẹ. Omẹ he yin yiylọdọ “okún” lọ na de nuhahun he atẹṣiṣi Adam, Evi, po Satani po tọn hẹnwa lẹpo sẹ̀. (Gẹnẹsisi 3:15) Ojlẹ susu to nukọn mẹ, nuhe fọnjlodotenamẹ de yin didọ gando “okún” kavi Mẹssia lọ go na Ahọlu Davidi nugbonọ lọ. E na yin Ahọlu Ahọluduta de tọn. Gandudu ehe na gbọnvo na dehe pò lẹpo. E na gbọṣi aimẹ kakadoi.—2 Samuẹli 7:12-14.

2. Ahọluduta Jiwheyẹwhe tọn na sukúndona gandudu gbẹtọvi tọn lẹpo. Numimọ de yin nina yẹwhegán Daniẹli to ehe mẹ e mọ huhlọn aihọn tọn debọdo-dego lẹ, he dlẹnkan kaka wá ojlẹ mítọn mẹ. Doayi nuhe fọnjlodotenamẹ hugan go to numimọ enẹ mẹ dọmọ: “To azán ahọlu [he gbọngodo] nẹlẹ tọn lẹ mẹ wẹ Jiwheyẹwhe olọn tọn na ze ahọludu de daga, he ma na yin viva gbede, mọ yè ma na jo ahọludu etọn dai hlan gbẹtọ devo lẹ gba; ṣigba e na gbà ahọludu do flinflin bo sú ahọludu he lẹpo do, ewọ bo nasọ nọte kakadoi.” Enẹwutu, ahọluduta kavi gandudu aihọn ehe tọn lẹpo—gọna awhàn, kọgbidinamẹ, po alọslonamẹ yetọn lẹ po—na yin vivasudo kakadoi. Dile dọdai Daniẹli tọn dohia do, Ahọluduta Jiwheyẹwhe tọn na dugán do aigba lọ pete ji to madẹnmẹ. (Daniẹli 2:44, 45) Gbọnvona dọ e yin Ahọluduta nujọnu tọn de, ewọ kẹdẹ wẹ na tin.a

3. Ahọluduta Jiwheyẹwhe tọn na hẹn opodo wá na awhàn, azọ̀n, huvẹ, etlẹ yin okú lọsu. Dọdai ojlofọndotenamẹ Biblu tọn lẹ do nuhe Ahọluduta Jiwheyẹwhe tọn na wà to aigba ji hia. Gandudu enẹ na wà nuhe titobasinanu gbẹtọvi tọn depope ma ko wà pọ́n bo masọ sọgan wà gbede lẹ. Pọ́n bo—awhànfunnu lẹpo yin vivasudo kakadoi! “E hẹn awhàn gbọ kakajẹ aigba pòdo.” (Psalm 46:9) Doto lẹ, dotowhé lẹ, kavi azọ̀n depope ma tin ba. “Finẹnu lẹ ma to na dọmọ, yẹn to azọ̀njẹ.” (Isaia 33:24) Huvẹ, núdùdù whèdomẹ, kavi whèdomẹ núdùdù-hunsindagbe tọn ma tin ba. “Gbado susugege na tin finẹ to osó lẹ ji.” (Psalm 72:16) Ṣiọdidi, zándidlọ, tẹpa lẹ, glasé-họ̀ he mẹ yè nọ ze oṣiọ lẹ do, kavi awufiẹsa he nọ zọnpọ hẹ yé lẹ ma tin ba. Okú, kẹntọ mítọn he agbọ́ ma nọ pé gbede, na yin didesẹ kakadoi. Na nugbo tọn, Jiwheyẹwhe “na ze okú mì to awhàngbigba mẹ; Oklunọ JIWHEYẸWHE nasọ súnsún dasin sọn nukun lẹpo mẹ.”—Isaia 25:8.

4. Ahọluduta Jiwheyẹwhe tọn tindo Gandutọ de he yin dide gbọn Jiwheyẹwhe dali. Mẹssia lọ ma de ede taidi Ahọlu gba, mọjanwẹ e ma yin dide gbọn gbẹtọvi mapenọ lẹ dali do niyẹn. Jehovah Jiwheyẹwhe lọsu wẹ de e tlọlọ. Tẹnmẹ-yinkọ lọ Mẹssia po Klisti po do enẹ hia hezeheze. Hogbe awe lọ lẹpo zẹẹmẹdo “Mẹyiamisisadode.” Enẹwutu, Ahọlu ehe yin yiyiamisisadode kavi yin dide na azọ́ndenamẹ vonọtaun etọn gbọn Jehovah dali. Jiwheyẹwhe dọ gandego dọmọ: “Pọ́n devi ṣie, mẹhe yẹn gọalọna, mẹvivẹ ṣie, mẹhe go homẹ ṣie hùn do; yẹn ko yí gbigbọ ṣie do e ji: ewọ nasọ hẹn whẹdida [dodo] jẹgbonu wá na Kosi lẹ.” (Isaia 42:1; Matiu 12:17, 18) Mẹnu wẹ sọ yọ́n Ahọlu he sọgan dugán do mí ji hugan Mẹdatọ mítọn?

5. Ahọlu Ahọluduta Jiwheyẹwhe tọn lọ ko dohia to gbẹtọvi lẹpo nukọn dọ emi jẹ nado yin Gandutọ. Jesu Nazalẹti tọn do ede hia nado yin Mẹssia dopagbe lọ. E yin jiji do whẹndo he Jiwheyẹwhe ko de mẹ. (Gẹnẹsisi 22:18; 1 Otannugbo lẹ 17:11; Matiu 1:1) To whenuena e tin to aigba ji, e hẹn dọdai susu he ko yin kinkàndai to owhe kanweko susu jẹnukọn gando Mẹssia lọ go di. E sọ yin didohia sọn olọn mẹ taidi Mẹssia lọ. Gbọnna? Di apajlẹ, Jiwheyẹwhe dọho sọn olọn mẹ bo do e hia taidi Ovi Etọn titi; angẹli lẹ dlẹnalọdo Jesu taidi Mẹssia dopagbe lọ; podọ Jesu wà azọ́njiawu lẹ—whlasusu to nukun gbẹtọ kanweko kavi fọtọ́n susu lẹ tọn mẹ—matin ayihaawe gbọn huhlọn Jiwheyẹwhe tọn dali.b Jesu do Ahọlu wunmẹ he ewọ na yin hia pludopludo. Gbọnvona dọ e tindo huhlọn nado gọalọna gbẹtọ lẹ, e sọ tindo ojlo nado wàmọ ga. (Matiu 8:1-3) E yin mẹtọnhopọntọ, awuvẹmẹtọ, adọgbotọ, podọ whiwhẹnọ. Kandai gbẹzan etọn tọn to aigba ji tin to Biblu mẹ na mẹlẹpo nado hia.

6. Gbẹtọ 144 000 na dugán hẹ Klisti to Ahọluduta Jiwheyẹwhe tọn mẹ. Jesu dọ dọ mẹdevo lẹ gọna apọsteli etọn lẹ, na dugán hẹ ẹ to olọn mẹ. E ylọ pipli ehe dọ “lẹngbọpa pẹvi.” (Luku 12:32) To nukọn mẹ, e yin didohia apọsteli Johanu dọ sọha lẹngbọpa pẹvi ehe tọn na yin 144 000. Yé na tindo azọ́ndenamẹ he fọnjlodotenamẹ to olọn mẹ bo na dugán taidi ahọlu bosọ wadevizọn taidi yẹwhenọ to pọmẹ hẹ Klisti.—Osọhia 5:9, 10; 14:1, 3.

7. Ahọluduta Jiwheyẹwhe tọn he ko to gandu to olọn mẹ todin, ko wleawufo nado dugán do aigba lọ blebu ji. Nugbo godo tọn ehe yin dopo to dehe fọnjlodotenamẹ hugan he mí sọgan plọn lẹ mẹ. Biblu na kunnudenu susugege dọ Jesu ko yin nina aṣẹ taidi Ahọlu to olọn mẹ. E ko to gandu to finẹ todin, podọ to ojlẹ mítọn mẹ, e na dlẹnkanna gandudu etọn wá aigba lọ blebu ji bo hẹn dọdai gigonọ he go mí ko donù wayi lẹ di to madẹnmẹ. Ṣigba nawẹ mí sọgan deji dọ Ahọluduta Jiwheyẹwhe tọn ko to gandu todin gbọn? Podọ whetẹnu wẹ e na bẹ gandudu etọn jẹeji do aigba ji?

[Nudọnamẹ odò tọn lẹ]