Gbọṣi Dolilo mẹ Whenuena Ovi Towe Ṣiatẹ
YỌNNU Klistiani de he mí na ylọ dọ Joy dovivẹnu nado plọn visunnu etọn whẹ́n nado yiwanna Jehovah Jiwheyẹwhe. Ṣigba to whenuena visunnu lọ sẹpọ owhe 20, e ṣiatẹ bo tọ́nsọn whégbè. “Ehe wẹ nuhe vẹna mi hugan to gbẹzan ṣie mẹ,” wẹ Joy dọ. “Ahun ṣie sè vivẹ, n’jẹflumẹ bo tindo numọtolanmẹ winyan tọn. Linlẹn agọ̀ lẹ kẹdẹ wẹ gọ́ ayiha ṣie mẹ.”
Vlavo hiẹ lọsu ko tẹnpọn nado plọn ovi towe lẹ whẹ́n nado yiwanna bo sẹ̀n Jiwheyẹwhe—kiki nado mọ dọ dopo kavi susu to yé mẹ gbẹ́ ẹ dai. Nawẹ hiẹ sọgan doakọnna flumẹjijẹ sinsinyẹn mọnkọtọn gbọn? Etẹwẹ na gọalọna we nado gbọṣi dolilo mẹ to sinsẹ̀nzọn towe hlan Jehovah mẹ?
Whenuena Ovi Jehovah Tọn lẹ Ṣiatẹ
Onú tintan he na gọalọna we wẹ nado yọnẹn dọ Jehovah yọ́n numọtolanmẹ he a tindo lẹpo. To Isaia 49:15, mí hia dọmọ: “Be yọnnu sọgan wọn ovi etọn he tin anọ́nù, bọ e ma nado wàlẹblanu na ovi ohò etọn mẹ tọn? Nugbo yé sọgan wọn, ṣigba yẹn ma na wọnji gowe gba.” Mọwẹ, Jehovah nọ tindo numọtolanmẹ he mẹjitọ lẹ nọ tindo. Enẹwutu, yí nukun homẹ tọn do pọ́n ayajẹ he ewọ na ko tindo to whenuena visunnu gbigbọmẹ tọn etọn lẹ to pipà ẹ bosọ to devizọnwa na ẹn. To gblọndo nina tọgbo Job “sọn jẹhọn ahizi mẹ” whenu, Jehovah flin ojlẹ ayajẹ tọn he e duvivi etọn hẹ whẹndo gbigbọmẹ tọn etọn he tin to kọndopọ mẹ lẹ, bo dọmọ: “Fie wẹ hiẹ te whenuena yẹn do dòdó aigba tọn lẹ ai? . . . Whenuena sunwhlẹvu afọnnu tọn lẹ to hànji dopọ, bọ visunnu Jiwheyẹwhe tọn lẹpo to abobo dó na homẹhun?”—Job 38:1, 4, 7.
To ojlẹ delẹ godo, dopo to visunnu pipé gbigbọmẹ tọn Jiwheyẹwhe nugbo lọ tọn lẹ mẹ ṣiatẹ bo lẹzun Satani, he zẹẹmẹdo “Agọjẹdomẹtọ.” Enẹgodo Adam, visunnu tintan he Jehovah dá do aigba ji, po asi pipé etọn, Evi po, kọnawudopọ to atẹṣiṣi lọ mẹ. (Gẹnẹsisi 3:1-6; Osọhia 12:9) To nukọn mẹ, visunnu gbigbọmẹ tọn devo lẹ “jo fininọ jlọjlọ yetọn do” bo ṣiatẹ do Jiwheyẹwhe.—Juda 6.
Biblu ma dọ nuhe yin numọtolanmẹ Jehovah tọn to whenuena delẹ to visunnu pipé etọn lẹ mẹ ṣiatẹ gba. Ṣigba, Owe-wiwe hẹn ẹn họnwun hezeheze dọmọ: “OKLUNỌ sọ mọ kanyinylan gbẹtọ tọn sù gbau to aigba mẹ, podọ ayilinlẹn ayiha etọn mẹ tọn lẹpo oylan dódó wẹ to whepoponu. E sọ diọ linlẹn na OKLUNỌ dọ e ko basi gbẹtọ do aigba lọ [ji], e sọ doadi na ẹn to ayiha etọn mẹ.” (Gẹnẹsisi 6:5, 6) Atẹṣiṣi akọta dide Jehovah tọn, Islaeli tọn, sọ hẹn “homẹgble e” bo “hẹn awusinyẹn” ẹn.—Psalm 78:40, 41.
Matin ayihaawe, Jehovah nọ vẹawu mẹjitọ he nọ jiya awufiẹsa po flumẹjijẹ po tọn na walọ atẹṣiṣi ovi yetọn lẹ tọn wutu. To Ohó etọn, Biblu mẹ, e ko wleawuna ayinamẹ po tudohomẹnamẹ dagbe po nado gọalọna mẹjitọ mọnkọtọn lẹ nado pehẹ ninọmẹ yetọn. Jiwheyẹwhe dotuhomẹna yé nado bẹ magbọjẹ yetọn lẹpo do alọ etọn mẹ, whiwhẹ yede, bo diọnukunsọ Satani Lẹgba. Gbọ mí ni pọ́n lehe ayinamẹ ehe hihodo sọgan gọalọna we nado gbọṣi dolilo mẹ do to whenuena ovi towe ṣiatẹ.
Bẹ Magbọjẹ Towe do Alọ Jehovah Tọn Mẹ
Jehovah yọnẹn dọ nususu ma nọ hẹn magbọjẹ wá na mẹjitọ lẹ sọ yinyọnẹn dọ ovi yetọn lẹ tin to owù he na hẹn awugble wá yé ji de mẹ, yèdọ awugble he sọgan yin hinhẹnwa vlavo gbọn yedelẹ kavi mẹdevo lẹ dali. Apọsteli Pita dlẹnalọdo aliho dopo nado pehẹ magbọjẹ ehe po devo lẹ po. E wlan dọmọ: “Mì bẹ magbọjẹ mìtọn lẹpo do alọ [Jehovah tọn] mẹ; na ewọ to tukla mìtọn jẹ wutu.” (1 Pita 5:7) Naegbọn oylọ-basinamẹ po jide vọ́ namẹ ehe po do yọn-na-yizan taun na mẹjitọ he ovi yetọn ṣiatẹ lẹ?
To whenuena ovi towe pò to ovu, hiẹ nọ yí sọwhiwhe do basi hihọ́na ẹn sọn owù lẹ mẹ, podọ vlavo e nọ kẹalọyi anademẹ owanyinọ towe. Nalete, dile e to whinwhẹ́n, nuyiwadomẹji he a nọ tindo do e ji sọgan ko depò, ṣigba ojlo vẹkuvẹku towe nado basi hihọ́na ẹn sọn owù mẹ ma depò gba. Na nugbo tọn, e tlẹ sọgan ko jẹeji.
Taidi kọdetọn de, to whenuena ovi towe ṣiatẹ bo jiya to gbigbọ-liho, numọtolanmẹ-liho, kavi agbasa-liho, hiẹ sọgan lẹndọ owhẹ̀ towe wẹ. Nuhe Joy, he yin nùdego wayi, lẹn niyẹn. E dọmọ: “Yẹn nọ to nulẹnpọndo nuhe jọ wayi lẹ ji bọ numọtolanmẹ awugbopo tọn nọ sayana mi egbesọegbesọ.” Titengbe to ojlẹ mọnkọtọn lẹ mẹ wẹ Jehovah jlo dọ hiẹ ni ‘bẹ magbọjẹ towe lẹpo do alọ etọn mẹ.’ Eyin hiẹ wàmọ, ewọ na gọalọna we. “Ze agbàn towe dlan OKLUNỌ ji,” wẹ psalm-kàntọ lọ dọ, “ewọ nasọ hẹn we dote. Ewọ ma na dike dodonọ ni yin sisẹtẹnna.” (Psalm 55:22) Numimọ he Joy tindo niyẹn. E basi zẹẹmẹ dọmọ: “N’dọ nuhe tin to ahun ji na mi lẹpo na Jehovah. To numọtolanmẹ ṣie lẹ didọtọn godo, yẹn vò sọn ayiha mẹ.”
Taidi mẹjitọ mapenọ de, hiẹ sọgan ko basi nuṣiwa delẹ to ovi towe pinplọn whenu. Ṣigba naegbọn hiẹ nado ze ayidonugo towe do ehelẹ ji? Kunnudenu dohia dọ Jehovah ma nọ wàmọ, na psalm-kàntọ jihàn to gbọdo glọ dọmọ: “[Jehovah] E, mẹnu wẹ sọgan ṣite, eyin hiẹ, OKLUNỌ na payiha ylando go?” (Psalm 130:3) Eyin hiẹ tlẹ plọn ovi towe ganji matin nuṣiwa depope, e sọgan gbẹ́ ṣiatẹ. Enẹwutu dọ numọtolanmẹ towe lẹ na Jehovah to odẹ̀ mẹ, podọ ewọ na gọalọna we nado pehẹ ninọmẹ lọ. Ṣigba, eyin hiẹ lọsu na gbọṣi dolilo mẹ to Jehovah sinsẹ̀n mẹ bo ma na jai jẹ omọ̀ Satani tọn mẹ, hiẹ dona wà nususu dogọ.
Whiwhẹ Dewe
Pita wlan dọmọ: “Mì whiwhẹ mìde to alọ gángán Jiwheyẹwhe tọn glọ, na ewọ nido ze mì daga to ojlẹ etọn mẹ.” (1 Pita 5:6) Naegbọn hiẹ dona whiwhẹ dewe to whenuena ovi towe ṣiatẹ? Gbọnvona dọ ovi atẹṣitọ de sọgan hẹn we tindo numọtolanmẹ whẹhuhu po awufiẹsa po tọn, e sọgan dowinyan we jẹ obá de mẹ. Linlẹn lọ dọ nuyiwa ovi towe tọn ko hẹn yinkọ dagbe whẹndo towe tọn gble sọgan nọ duahunmẹna we, titengbe eyin ewọ yin didesẹ sọn agun Klistiani tọn mẹ. Winyan po numọtolanmẹ mẹdèpo tọn po sọgan hẹn we gbọjọ ma nado yì opli Klistiani tọn lẹ.
Nado duto ninọmẹ mọnkọtọn ji, hiẹ dona yí zinzin zan. Howhinwhẹn lẹ 18:1 na avase dọmọ: “Ewọ he klan ede dovo na dómọna ojlo ede tọn, bosọ diọavunnukunsọ nudepope he yin zinzin tọn.” Opli Klistiani tọn lẹ yìyì to gbesisọ mẹ mahopọnna ninọmẹ towe na gọalọna we nado mọ nuplọnmẹ po tulinamẹ dagbe po yí. “To bẹjẹeji, n’ma jlo na mọ mẹdepope,” wẹ Joy yigbe dọ. “Ṣigba n’tẹnpọn nado flin nujọnu-yinyin nuwiwa gbigbọmẹ tọn ṣie lẹ tọn. Podọ, eyin n’tlẹ nọ̀ whégbè, nuhahun ṣie lẹ kẹdẹ ji wẹ n’na to nulẹnpọndo. Opli lẹ gọalọna mi nado ze ayiha do onú gbigbọ tọn he nọ jlọmẹdote lẹ ji. Homẹ ṣie hùn taun dọ n’ma klan dee dovo bo gbọ godonọnamẹ owanyinọ mẹmẹsunnu po mẹmẹyọnnu ṣie lẹ po tọn go.”—Heblu lẹ 10:24, 25.
Humọ, flin dọ hagbẹ whẹndo tọn dopodopo wẹ na “hẹn agbàn ede tọn” taidi Klistiani de. (Galatianu lẹ 6:5) Jehovah nọ donukun dọ mẹjitọ lẹ ni yiwanna ovi yetọn lẹ bo domẹplọnlọ yé go. E sọ biọ to ovi lẹ si nado setonu bo gbògbéna mẹjitọ yetọn lẹ. Na nugbo tọn, mẹjitọ lẹ na tindo yinkọ dagbe to Jiwheyẹwhe dè eyin yé wà nuhe go yé pé lẹpo nado pọ́n ovi yetọn lẹ go whẹ́n to “hihò po hokọnamẹ [Jehovah] tọn po mẹ.” (Efesunu lẹ 6:1-4) Eyin ovi de ṣiatẹ sọta mẹplọnlọ owanyinọ mẹjitọ etọn tọn, yinkọ dagbe ovi lọ tọn wẹ na gble. “Walọ yọpọvu tọn wẹ yè do nọ yọnẹn eyin azọ́n etọn yin dagbe, eyin e sọgbe,” wẹ Howhinwhẹn lẹ 20:11 dọ. Na nugbo tọn, atẹṣiṣi Satani tọn ma hẹn yinkọ dagbe Jehovah tọn gble to mẹhe mọnukunnujẹ whẹho lọ mẹ lẹ dè gba.
Diọnukunsọ Lẹgba
Pita na avase dọmọ: “Mì yin huwhẹnọ, bosọ nọ họ́ mìde: na Lẹgba, mẹglatọ mìtọn, di kinnikinni he to lìlì, e to zọnlinzin pé, bo to mẹhe e na tlẹndù din.” (1 Pita 5:8) Taidi kinnikinni, Lẹgba nọ saba yangbé jọja po mẹhe ma tindo numimọ lẹ po tọn. To hohowhenu, kinnikinni lẹ nọ dánpe gbọ̀n aigba Islaeli tọn ji bo nọ yin owù na kanlin-yìnyìn lẹ. Eyin lẹngbọvu de jo apó do, e na yin wiwle dù po awubibọ po. To jọwamọ-liho, lẹngbọ de sọgan ze ede do owù mẹ nado basi hihọ́na ovi etọn. Ṣigba, lẹngbọ he tlẹ ko whẹ́n taun de ma sọgan nọte to kinnikinni nukọn gba. Enẹwutu, lẹngbọhọtọ adọgbotọ lẹ dona basi hihọ́na lẹngbọpo lọ.—1 Samuẹli 17:34, 35.
Nado basi hihọ́na lẹngbọ yẹhiadonu tọn etọn lẹ sọn “kinnikinni he to lìlì” lọ si, Jehovah ko basi titona lẹngbọhọtọ gbigbọmẹ tọn lẹ nado penukundo apó lọ go to “ogán lẹngbọhọtọ tọn,” Jesu Klisti glọ. (1 Pita 5:4) Pita dotuhomẹna sunnu dide mọnkọtọn lẹ dọmọ: “Mì nọ yìn lẹngbọpa Jiwheyẹwhe tọn he tin mì ṣẹnṣẹn, bo nọ donukun e go, e gbọn mananọmawà dali blo, adavo po ojlo po; e ma yin adọwhẹ́n tọn gba, adavo ojlo zogbe tọn.” (1 Pita 5:1, 2) Taidi mẹjitọ lẹ, gbekọndopọ mìtọn na hẹn lẹngbọhọtọ ehelẹ penugo nado gọalọna jọja de nado jla ninọmẹ etọn do to gbigbọ-liho.
To whenuena e biọ dọ lẹngbọhọtọ Klistiani lẹ ni gọalọna ovi atẹṣitọ towe, hiẹ sọgan tindo ayilinlẹn lọ nado basi hihọ́na ẹn sọn mẹplọnlọ he e jẹna si. Ṣigba, nuṣiwa sinsinyẹn wẹ e na yin nado yinuwa to aliho mọnkọtọn mẹ. Pita dọmọ: “Mì . . . diọnukunsọ [Lẹgba]”—e ma yin lẹngbọhọtọ gbigbọmẹ tọn lẹ gba.—1 Pita 5:9.
Whenuena Mẹplọnlọ lọ Sinyẹn
Eyin ovi towe yin Klistiani he ko yí baptẹm bo ma lẹnvọjọ, e sọgan mọ mẹplọnlọ he sinyẹn hugan yí—yèdọ nado yin didesẹ sọn agun mẹ. Sọn ojlẹ enẹ mẹ sọyi, obá he mẹ hiẹ na wanu dopọ hẹ ẹ jẹ na sinai do owhe etọn po ninọmẹ devo lẹ po ji.
Eyin ovi lọ ma ko tindo mẹho-whe bo nọ nọ̀ owhé towe gbè, hiẹ na zindonukọn nado penukundo nuhudo agbasa tọn etọn lẹ go. E sọ tindo nuhudo oplọn po mẹplọnlọ po tọn, podọ azọngban towe wẹ nado wleawuna ehelẹ. (Howhinwhẹn lẹ 1:8-18; 6:20-22; 29:17) E sọgan biọ dọ hiẹ ni plọn Biblu hẹ ẹ, ehe mẹ e na tindo mahẹ te. Hiẹ sọgan dọ̀n ayidonugo etọn wá wefọ voovo lẹ po owe he yin awuwlena gbọn “afanumẹ nugbonọ, nuyọnẹntọ” lọ dali lẹ po ji. (Matiu 24:45) Hiẹ sọ sọgan plan ovi lọ yì opli Klistiani tọn lẹ ji bo dike e ni sinai to apá towe. Ehe lẹpo sọgan yin wiwà po todido lọ po dọ ewọ na kẹalọyi ayinamẹ Owe-wiwe tọn lẹ.
Ninọmẹ lọ na gbọnvo eyin mẹhe yin didesẹ lọ ko tindo mẹho-whe bo ma nọ nọ̀ owhé towe gbè. Apọsteli Paulu dotuhomẹna Klistiani lẹ to Kọlinti hohowhenu tọn mẹ dọmọ: ‘Mì dogbẹ́ hẹ mẹdepope he yè ylọ mẹmẹsunnu he yin galọtọ, kavi nukunkẹnnọ, kavi boṣiọ-sẹ̀ntọ, kavi nutlọtọ, kavi ahànnumunọ, kavi alọslonamẹtọ; mì dùnú hẹ omẹ mọnkọtọn lala blo.’ (1 Kọlintinu lẹ 5:11) Dile etlẹ yindọ nukunpipedo whẹho whẹndo tọn he yin dandannu delẹ go sọgan hẹn mẹjitọ Klistiani de nado tindo kanṣiṣa delẹ hẹ mẹhe yin didesẹ sọn agun mẹ lọ, ewọ dona tẹnpọn nado dapana gbẹdido he ma yin dandan tọn.
To whenuena lẹngbọhọtọ Klistiani lẹ domẹplọnlọ ovi he waylando de go, e ma na yin nuyọnẹnnu dọ hiẹ ni gbẹ́ kavi yí nukunpẹvi do pọ́n nudide sinai do Biblu ji yetọn. Godoninọna ovi atẹṣitọ towe ma na basi hihọ́ nujọnu tọn depope na ẹn sọn Lẹgba si. Na nugbo tọn, enẹ na ze dagbemẹninọ gbigbọmẹ hiẹ lọsu tọn do owù mẹ. To vogbingbọn mẹ, gbọn godoninọna vivẹnudido lẹngbọhọtọ lẹ tọn dali, hiẹ na gbọṣi ote “gligli to yise mẹ” bo nasọ gọalọna ovi towe to aliho dagbe hugan mẹ.—1 Pita 5:9.
Jehovah Na Hẹn We Dote
Eyin ovi towe ṣiatẹ, flin dọ hiẹ ma tin dewe ṣo. Onú mọnkọtọn lẹ ko jọ do mẹjitọ Klistiani devo lẹ go. Mahopọnna whlepọn he mẹ mí tin te, Jehovah na hẹn mí dote.—Psalm 68:19.
Ganjẹ Jehovah go to odẹ̀ mẹ. Nọ dogbẹ́ hẹ agun Klistiani tọn to gbesisọ mẹ. Nọgodona mẹplọnlọdomẹgo lẹngbọhọtọ dide lẹ tọn. Gbọn mọwiwà dali, hiẹ na penugo nado gbọṣi dolilo mẹ. Podọ apajlẹ dagbe towe sọgan gọalọna ovi towe nado kẹalọyi oylọ-basinamẹ owanyinọ Jehovah tọn nado lẹkọwa ewọ dè.—Malaki 3:6, 7.
[Yẹdide to weda 18]
Dẹ̀hiho po opli Klistiani tọn lẹ yìyì po sọgan na we huhlọn