Awuwiwlena Hodidọ Na Mẹlẹpo

TO SẸMẸSẸMẸ, suhugan agun Kunnudetọ Jehovah tọn lẹ tọn nọ basi tito na hodidọ gbangba tọn do hosọ Owe-wiwe tọn de ji. Eyin mẹho kavi devizọnwatọ lizọnyizọnwiwa tọn de wẹ hiẹ yin, be hiẹ nọ na kunnudenu dọ hiẹ yin hodọtọ kavi mẹplọntọ gbangba tọn kọdetọn dagbenọ de ya? Eyin mọwẹ, hiẹ sọgan yin oylọ-basina nado na hodidọ na mẹlẹpo de. Wehọmẹ Lizọnyizọn Yẹwhehọluduta tọn ko gọalọna mẹmẹsunnu fọtọ́n donu ao ao lẹ nado pegan na lẹblanulọkẹyi sinsẹ̀nzọn tọn ehe. Eyin hiẹ yin azọ́ndena nado na hodidọ na mẹlẹpo de, fie wẹ hiẹ dona bẹsọn?

Plọn Todohukanji Lọ

Whẹpo do basi dodinnanu depope, hia todohukanji lọ bo lẹnayihamẹpọn deji kakajẹ whenue hiẹ mọnukunnujẹemẹ pete. Hẹn hosọ hodidọ lọ tọn do ayiha mẹ. Etẹwẹ hiẹ jlo na plọn mẹplidopọ towe lẹ taun? Etẹwẹ yin yanwle towe?

Jẹakọ hẹ hóvila lẹ. Keje hóvila enẹlẹ pọ́n. Kanṣiṣa tẹwẹ dopodopo tindo hẹ hosọ lọ? To hóvila dopodopo glọ, nuagokun devo lẹ nọ yin sislẹ. Nudọnamẹ he nọgodona nuagokun devo lọ lẹ nọ yin sislẹ do ehelẹ glọ. Gbadopọnna lehe adà dopodopo todohukanji lọ tọn nọgodona dehe jẹnukọn, planmẹ jẹ dehe bọdego kọ̀n, bo gọalọ nado basi wadotana yanwle hodidọ lọ tọn do. To whenuena hiẹ ko mọnukunnujẹ hosọ lọ, yanwle hodidọ lọ tọn, podọ lehe hóvila lọ lẹ basi wadotana lẹndai enẹ tọn do mẹ godo, whenẹnu hiẹ ko wleawufo nado bẹ dogbapọnnanu hodidọ lọ tọn jẹeji.

To tintan whenu hiẹ sọgan mọ ẹn yin alọgọnamẹnu nado lẹnnupọndo hodidọ towe ji taidi hodidọ gli ẹnẹ kavi atọ́n, ehe dopodopo tindo hóvila de. Wleawuna ehelẹ debọdo-dego.

Todohukanji lọ yin azọ́nwanu awuwiwle tọn de. Lẹndai etọn mayin nado yinuwa taidi kandai he mẹ hiẹ na to hodidọ towe na sọn gba. E tin taidi olàn-mú de. Hiẹ dona dà ẹ, do dadónu lẹ e mẹ ganji, bosọ hẹn ẹn tindo otọ́n whẹpo e nado yọ́ndù.

Owe-Wiwe Yiyizan

Jesu Klisti po devi etọn lẹ po ze nuplọnmẹ yetọn sinai do Owe-wiwe ji. (Luku 4:16-21; 24:27; Owalọ 17:2, 3) Hiẹ sọgan wà nudopolọ. Owe-wiwe wẹ dona yin asisa hodidọ towe tọn. Kakati nado nọ basi zẹẹmẹ bo nọ yí nuhe yin didọ to todohukanji lọ mẹ lẹ zan poun, do lehe Owe-wiwe nọgodona hodidọ enẹlẹ do hia, bo plọnmẹ sọn Owe-wiwe mẹ.

Dile hiẹ to awuwlena hodidọ towe, gbadopọnna wefọ dopodopo heyin dide do todohukanji lọ mẹ lẹ. Doayi lẹdo hodidọ lọ tọn go. Wefọ delẹ sọgan wleawuna dodonu alọgọnamẹ tọn poun. E mayin popolẹpo wẹ dona yin hihia kavi yin hodọdeji to hodidọ towe whenu gba. Ṣinyan dehe yọ́n hugan na mẹplidopọ towe lẹ. Eyin hiẹ yí wefọ heyin dide do todohukanji lọ mẹ lẹ zan ganji, vlavo hiẹ ma na tindo nuhudo nado yí alọdlẹndonu Owe-wiwe tọn devo lẹ zan gba.

Kọdetọn dagbe hodidọ towe tọn sinai do jẹhẹnu mẹpinplọn tọn ji, e mayin do sọha wefọ heyin yiyizan tọn ji gba. To wefọ lẹ yiylọ whenu, do nuhewutu yé to yinyin yiyizan hia. Yí sọwhiwhe do yí yé zan. To wefọ de hihia godo, jo Biblu towe do hùnhùn dile hiẹ to hodọdo wefọ lọ ji. E yọnbasi dọ mẹplidopọ towe lẹ ni wà nudopolọ. Nawẹ hiẹ sọgan fọnjlodotena mẹplidopọ towe lẹ bo gọalọna yé nado mọaleyi to gigọ́mẹ dogọ sọn Ohó Jiwheyẹwhe tọn mẹ gbọn? (Nẹh. 8:8, 12) Hiẹ sọgan wàmọ gbọn zẹẹmẹ-bibasi, apajlẹ, po yí-do-yizan mẹ etọn didohia po dali.

Zẹẹmẹ-Bibasi. To awuwiwle nado basi zẹẹmẹ do wefọ tangan de ji whenu, kanse dewe dọ: ‘Etẹ dọ wẹ e te? Naegbọn yẹn to yíyí ì zan to hodidọ ṣie mẹ? Etẹwẹ mẹplidopọ lẹ sọgan to kinkanse yedelẹ gando wefọ ehe go?’ Hiẹ sọgan tindo nuhudo nado keje lẹdo hodidọ lọ tọn pọ́n, dodonu lọ, ninọmẹ lọ, jẹhẹnu hogbe lẹ tọn, lẹndai wekantọ gbọdo lọ tọn. Ehe nọ biọ dodinnanu bibasi. Hiẹ na mọ nudọnamẹ họakuẹ susugege to zinjẹgbonu heyin awuwlena gbọn “afanumẹ nugbonọ, nuyọnẹntọ” lọ dali lẹ mẹ. (Mat. 24:45-47) Ma tẹnpọn nado basi zẹẹmẹ nulẹpo tọn do wefọ lọ ji blo, ṣigba basi zẹẹmẹ nuhewutu hiẹ do hia ẹ na mẹplidopọ towe lẹ to kọndopọmẹ hẹ nuagokun he ji hiẹ to hodọdo.

Apajlẹ. Lẹndai apajlẹ lẹ tọn wẹ nado deanana mẹplidopọ towe lẹ nado tindo nukunnumọjẹnumẹ he siso kavi nado gọalọna yé nado flin nuagokun kavi nunọwhinnusẹ́n he ji hiẹ ko dọhodo. Apajlẹ lẹ nọ gọalọna gbẹtọ lẹ nado mọnukunnujẹ nuhe hiẹ ko dọna yé mẹ bo yí ì jlẹdo nuhe yé ko yọnẹn dai go. Nuhe Jesu wà niyẹn to whenuena e dọ Yẹwheho diyin etọn to Osó ji. “Ohẹ̀ he to aga lẹ,” “lii danji tọn lẹ,” “họntonu bibó,” ‘ohọ̀ he to osé ji,’ po hogbe mọnkọtọn susu lẹ po hẹn nuplọnmẹ etọn tindo huhlọn, họnwun, bo ma sọgan yin jìwọn e go.—Mat., weta 5-7.

Yí-do-Yizan Mẹ. Zẹẹmẹ po apajlẹ nina do wefọ de ji po nọ namẹ oyọnẹn, ṣigba oyọnẹn enẹ yíyí-do-yizan mẹ wẹ nọ hẹn kọdetọn lẹ wá. Nugbo wẹ dọ, azọngban mẹplidopọ towe lẹ tọn wẹ e yin nado yinuwa do owẹ̀n Biblu tọn ji, ṣigba hiẹ sọgan gọalọna yé nado yọ́n nuhe dona yin wiwà. Todin he hiẹ ko tindo nujikudo dọ mẹplidopọ towe lẹ mọnukunnujẹ wefọ he to yinyin dogbapọnna lọ mẹ bo mọ kanṣiṣa he e tindo hẹ zẹẹmẹ he to yinyin bibasi lọ, whesọ bo do lehe e gando nuyise po walọyizan po go do hia yé. Zinnudo ale lọ lẹ ji eyin yè gbẹkọ linlẹn agọ̀ kavi walọyizan he ma sọgbe hẹ nugbo he to yinyin hodọdeji lẹ go.

Dile hiẹ to nulẹnpọndo lehe wefọ lẹ na yin yiyizan do ji, flin dọ mẹplidopọ towe lẹ wá sọn lẹdo he gbọnvo lẹ mẹ bo nọ pannukọn ninọmẹ gbloada voovo lẹ. Jlodotọ yọyọ lẹ, jọja lẹ, mẹhomẹ lẹ, po mẹhe to ahidihẹ nuhahun mẹdetiti tọn voovo lẹ po sọgan tin to yé mẹ. Hẹn hodidọ towe yin dehe yọn-na-yizan bo sọgbe hẹ lẹnpọn dagbe. Ma na ayinamẹ he taidi dọ hiẹ tindo mẹdelẹ poun to ayiha mẹ nkọtọn blo.

Nudide Hodọtọ lọ Tọn Lẹ

Nudide delẹ ko yin bibasi na we gando hodidọ towe go. Nuagokun tangan lẹ ko yin didohia hezeheze, podọ sọha ojlẹ he hiẹ dona klan dovo na hodidọ do hóvila dopodopo ji ko yin didohia hezeheze. Hiẹ lọsu wẹ na basi nudide he pò lẹ. Hiẹ sọgan de nado yí whenu susu zan do nuagokun delẹ ji bo yí vude zan do devo lẹ ji. Ma lẹn dọ hiẹ dona gbadopọnna nuagokun lẹpo jẹ obá dopolọ mẹ blo. Enẹ sọgan hẹn we nado họ̀nwezun gbọn nudọnamẹ lẹ ji bo hẹn mẹplidopọ towe lẹ biọ bẹwlu mẹ. Nawẹ hiẹ sọgan yọ́n dehe na yin hodọdeji to gigọ́mẹ hugan lẹ po dehe na yin nùdego kleun, kavi to hodidọ mẹ poun lẹ po gbọn? Kanse dewe dọ: ‘Nuagokun tẹlẹ wẹ na gọalọna mi nado de linlẹn tangan hodidọ lọ tọn tọ́n? Detẹ lẹ wẹ na hẹn ẹn yọnbasi hugan nado hẹn ale wá na mẹplidopọ ṣie lẹ? Be wefọ dide tangan de po nuagokun he gandego po jijodo na hẹn kunnudenu debọdo-dego he to yinyin zizedonukọnnamẹ dózin wẹ ya?’

Yí sọwhiwhe do dapana hopàdọ kavi linlẹn mẹdetiti tọn lẹ hinhẹn biọ hodidọ towe mẹ. Jesu Klisti, he tlẹ yin Visunnu Jiwheyẹwhe tọn, dapana ohó ‘edetiti tọn’ didọ. (Joh. 14:10) Yọnẹn dọ whẹwhinwhẹ́n he wutu gbẹtọ lẹ nọ wá opli Kunnudetọ Jehovah tọn lẹ tọn wẹ nado sè lehe Biblu nọ yin hodọdeji do. Eyin hiẹ ko wá yin pinpọnhlan taidi hodọtọ dagbe de, vlavo na hiẹ hẹn ẹn zun aṣa ma nado nọ dọ̀n ayidonugo hlan dewe ji ṣigba hlan Ohó Jiwheyẹwhe tọn ji wutu wẹ. Na ehe tọn wutu, hodidọ towe lẹ nọ yin pinpẹn etọn yọnẹn.—Flp. 1:10, 11.

Todin he hiẹ ko diọ todohukanji de poun zun zẹẹmẹ dojo Owe-wiwe tọn, hiẹ dona basi zepọ́n hodidọ towe tọn. E nọ yọ́n hugan nado wàmọ po gbèzeyiaga po. Onú titengbe lọ wẹ nado hẹn ẹn diun dọ nuagokun lọ lẹpo tin to ayiha towe mẹ ganji. Hiẹ dona penugo nado dọho po nujikudo gigọ́ po, bo hẹn nudọnamẹ lọ tindo otọ́n, bosọ ze nugbo lọ donukọnnamẹ po zohunhun po. Whẹpo do na hodidọ towe, kanse dewe dọ: ‘Etẹwẹ yẹn to linlẹn nado wadotana? Be nuagokun tangan lẹ họnwun ya? Be yẹn ko yí Owe-wiwe do basi asisa hodidọ ṣie tọn na nugbo tọn ya? Be nuagokun tangan dopodopo deananamẹ tlọlọ biọ dehe bọdego mẹ ya? Be hodidọ lọ wleawuna pinpẹn-nutọn-yinyọnẹn na Jehovah po awuwledainanu etọn lẹ po ya? Be tadonahó lọ tindo kanṣiṣa tlọlọ hẹ hosọ lọ, bo do nuhe dona yin wiwà hia mẹplidopọ lẹ, bosọ whàn yé nado wà ẹ ya?’ Eyin gblọndo towe hlan kanbiọ ehelẹ sọgan yin mọwẹ, to whelọnu lo hiẹ tin to otẹn de mẹ nado ‘wà dagbe po oyọnẹn po,’ na alemọyi agun lọ tọn podọ nado pagigona Jehovah!—Howh. 15:2.

WHENUENA HODIDỌ TOWE DONA YIN NINA GBỌN GBÈSETỌ DE YIYIZAN DALI

Pipli he nọ dó ogbè voovo lẹ nọ saba tin to otò de mẹ, enẹwutu hodọtọ gbangba tọn lẹ sọgan yin oylọ-basina nado na hodidọ Biblu tọn lẹ gbọn gbèsetọ lẹ yiyizan dali. Eyin hiẹ yin oylọ-basina nado dọho to ninọmẹ mọnkọtọn mẹ, anademẹ he bọdego helẹ na gọalọna hiẹ po gbèsetọ towe po.

Kọdetọn dagbe hodidọ towe tọn na sinai jẹ obá daho de mẹ do azọ́n gbèsetọ lọ tọn ji. Mẹhe tlẹ yin gbèsetọ numimọnọ de na wà dagbe hugan eyin hiẹ gọalọna ẹn nado wleawu.
To paa mẹ, dopo to madatọ̀n hodidọ towe tọn mẹ dona yin didepo nado na dotẹnmẹ gbèsetọ towe. (Ogbè alọ-yido-dọho tọn gbọnvo, to whenuena e yindọ e sọgan yin bibasi diblayin to ojlẹ dopolọ mẹ.)
Jẹnukọnna hodidọ lọ, gbadopọnna todohukanji hodidọ towe tọn po yanwle etọn po hẹ gbèsetọ lọ. Eyin azọ́ndenamẹ towe yin alọnuwe-hihia to plidopọ agbegbe ji, dike gbèsetọ lọ ni mọ vọkan etọn ojlẹ susu lẹ jẹnukọn.
Dọhodo wefọ he hiẹ na yizan lẹ ji hẹ gbèsetọ lọ. Hẹn ẹn diun dọ linlẹn Biblu towe tọn lẹ yin nudopolọ po Biblu ogbè awetọ lọ tọn po. Do hodidọ he na yin nùzindeji kavi yin zẹẹmẹ basina to wefọ lọ lẹ mẹ hia gbèsetọ lọ.
Basi dide vlavo eyin wefọ lọ lẹ na yin hihia to ogbè awe lẹpo mẹ kavi to dopo mẹ kẹdẹ. Hihia to ogbè he mẹplidopọ lẹ sè mẹ sọgan ko pé.
Didọ azán lẹ, sọha lẹ, podọ wefọ dide lẹ po awuyiya po sọgan fọ́n nuhahun lẹ dote. Yí otán mìmì zan to aliho he sọgbe mẹ, bo yí sọha blebu lẹ zan na sọha nulinlẹn tọn lẹ.
Basi zẹẹmẹ apajlẹ lẹpo, hogbe gigẹdẹ lẹ, podọ hodidọ he ma nọ saba yin yiyizan he hiẹ lẹn nado yizan lẹ tọn. Hẹn ẹn diun dọ gbèsetọ towe mọnukunnujẹ yé mẹ bọ e sọgan yọnbasi nado basi zẹẹmẹ linlẹn lọ lẹ tọn do ogbè awetọ mẹ.
To hodidọ whenu, sán hodidọ towe lẹ do gli. Dọ linlẹn blebu lẹ whẹpo do jó hodidọ do na gbèsetọ lọ. (E na dọ linlẹn lẹ, e mayin hogbe lẹpo dandan gba.) Na lẹdiọdogbedevomẹ he sọgbe, na dotẹnmẹ gbèsetọ lọ nado fó whẹpo do zindonukọn.
Gbèzedaga towe po hodidọ họnwun towe po nọ gọalọna gbèsetọ lọ.