Ogbè He Pemẹnu

EYIN hodọtọ gbangba tọn de ma yí ogbè he jẹ zan, mẹdelẹ sọgan jẹ amlọngọ sà ji to mẹplidopọ lẹ mẹ. Eyin wẹnlatọ de dọho po ogbè he miọn zẹjlẹgo po to kunnudegbe, e sọgan nọ ma dọ̀n ayidonugo whétọ lọ tọn. Podọ to opli lẹ ji fie gblọndo sọn mẹplidopọ lẹ dè mayin nina po ogbè he pemẹnu po te, mẹhe wá lẹ ma na mọ tulinamẹ he jẹ yí gba. (Heb. 10:24, 25) To alọ devo mẹ, eyin hodọtọ de ze ogbè etọn yiaga to whenuena e ma jẹ te, mẹplidopọ lẹ sọgan lẹzun ayimajainọ—bo tlẹ gblehomẹ.—Howh. 27:14.

Lẹnnupọndo Mẹplidopọ Towe lẹ Ji. Mẹnu lẹ dọho na wẹ a te? mẹdopo? pipli whẹndo tọn de? pipli pẹvi de he pli na sinsẹ̀nzọn kunnudegbe tọn? agun lọ blebu? kavi to plidopọ daho de ji? E họnwun dọ ogbè he jẹ na ninọmẹ de sọgan nọ ma sọgbe to ninọmẹ devo mẹ.

To nujijọ voovo lẹ mẹ, devizọnwatọ Jiwheyẹwhe tọn lẹ ko dọho na gbẹtọgun daho lẹ. To hùnwhẹ klandowiwe tẹmpli Jelusalẹm tọn whenu to azán Sọlọmọni tọn lẹ gbè, zomọ gbèzeyiaga tọn de ma tin gba. Enẹwutu Sọlọmọni ṣite to oplò yiaga de ji “bo yí ogbè lélé” do dona gbẹtọ lẹ. (1 Ahọ. 8:55; 2 Otan. 6:13) Owhe kanweko lẹ to enẹgodo, to kinkọnjẹgbonu gbigbọ wiwe tọn to Pẹntikọsti 33 W.M. tọn godo, gbẹtọgun de—he bẹ jlodotọ lẹ, po mẹṣankotọ lẹ po hẹn—pli lẹdo pipli pẹvi Klistiani lẹ tọn to Jelusalẹm. To nuyọnẹn yọn-na-yizan didohia mẹ, Pita “fọ́n ṣite . . . bo ze ogbè etọn daga.” (Owalọ 2:14) Kunnudide sẹhundaga de yin nina.

Nawẹ hiẹ na wagbọn do yọnẹn eyin ogbè he a to yiyizan sọgbe to ninọmẹ de mẹ? Nuyiwa mẹplidopọ lẹ tọn yin dopo to onú dagbe hugan he sọgan do e hia lẹ mẹ. Eyin a doayi e go dọ mẹdelẹ jẹ okọ̀ dlẹn ji to mẹplidopọ lẹ mẹ nado sèhó, a dona dovivẹnu nado jla ogbè towe do.

Vlavo mí to hodọ na mẹdopo kavi pipli de, nuyọnẹnnu wẹ e yin nado lẹnnupọndo mẹhe mẹplidopọ lọ bẹhẹn lẹ ji. Eyin mẹde ma nọ sènú ganji, a dona ze ogbè towe daga. Ṣigba mẹhe sọgan nọ ma yinuwa po awuyiya po sọmọ na mẹhowhe wutu ma na yiwanna awhádido gba. E tlẹ sọgan yin pinpọnhlan taidi dohia tasinsinyẹn tọn. To aṣa delẹ mẹ, ogbè he yiaga gbau nọ yin pinpọnhlan taidi kunnudenu dọ mẹde gblehomẹ kavi yin sọmawhenọ.

Lẹnnupọndo Awhá He Nọ Fẹayihasẹnamẹ lẹ Ji. To mahẹ tintindo to lizọnyizọn kunnudegbe tọn mẹ whenu, ninọmẹ he hiẹ pehẹ lẹ na yinuwado ogbè he dona yin yiyizan nado dekunnu ji janwẹ. Hiẹ dona diahi hẹ awhá mọto lẹ tọn, ovi tuklanọ lẹ, avún he to gbigbó lẹ, húnhiho ogbè lélénọ, kavi nudidọ televiziọn tọn. To alọ devo mẹ, to awà he ji owhé lẹ nọ sẹpọ yedelẹ pẹkipẹki te, e sọgan dó-adì na whétọ lọ eyin hiẹ dọho po gbèzeyiaga po sọmọ bọ hiẹ dọ̀n ayidonugo kọmẹnu lẹ tọn.

Mẹmẹsunnu he nọ na hodidọ lẹ to agun mẹ kavi to plidopọ lẹ ji dona pehẹ ninọmẹ voovo lẹ ga. Hodidọ na mẹplidopọ de to gbangba gbọnvo pete na hodidọ de nina to plitẹnhọ de mẹ he ninọmẹ etọn lẹ yọ́n nado hẹn hosise bọawu. To Amérique Latine mẹdehlan awe to hodidọ gbangba tọn de na dopọ to agbàsẹnu owhé jlodotọ de tọn gbè dile hùnwhẹ gbigbòdlán miyọ́n tọn to yìyì to nọtẹn gbangba tọn sẹpọmẹ de mẹ bọ kloklosu de sọ to osé dó mapote to yakẹ!

To hodidọ de whenu, nude sọgan jọ he na biọ dọ hodọtọ lọ ni nabọẹ kakajẹ whenuena ayihafẹsẹnamẹnu lọ lẹ depò kavi ni zegbeyiaga dogọ. Di apajlẹ, eyin opli to yìyì alọnu to panuhọ̀ de mẹ, jikun madonukun de na dibla hẹn ẹn yin nuhe ma yọnbasi na mẹplidopọ lẹ nado sè nuhe hodọtọ lọ to didọ. Ovi he to avivi kavi ayihafẹsẹnamẹ whenugbọtọ lẹ tọn na fọ́n nuhahun dote janwẹ. Plọn nado sú odò ayihafẹsẹnamẹ lọ lẹ tọn na mẹplidopọ towe lẹ nido sọgan mọaleyi to gigọ́mẹ sọn nudọnamẹ he hiẹ to zizedonukọnnamẹ mẹ.

Zomọ gbèzeyiaga tọn na yin alọgọnamẹnu eyin e tin-to-aimẹ. Etomọṣo, hodọtọ lọ dona zegbeyiaga eyin ninọmẹ lọ biọ domọ. To fidelẹ he miyọ́n lẹtliki nọ yin zize sọyi gbọzangbọzan te, hodọtọ lẹ tin to dandannu glọ nado zindonukọn to hodidọ yetọn mẹ matin alọgọ miklo tọn.

Lẹnnupọndo Nuhe to Yinyin Hodọdeji Ji. Nudọnamẹ he hodidọ towe bẹhẹn sọ gando ogbè he dona yin yiyizan go. Eyin hosọ lọ biọ zohunhun, ma dekanpona nuzedonukọnnamẹ lọ gbọn hodidọ he ma tindo zohunhun dali blo. Di apajlẹ, eyin a to whẹgbledomẹ lẹ hia sọn Owe-wiwe mẹ, ogbè towe dona yiaga hugan whenuena hiẹ to ayinamẹ do owanyi didohia ji hia. Hẹn ogbè towe sọgbe hẹ hodidọ lọ, ṣigba payi ma nado wà ẹ to aliho de mẹ he na dọ̀n ayidonugo wá dewe ji.

Lẹnnupọndo Yanwle Towe Ji. Eyin a jlo na whàn mẹplidopọ towe lẹ nado yinuwa po zohunhun po, a dona yí ogbè he yiaga ganji zan. Eyin a jlo na diọ linlẹn yetọn, ma yàn yé dogbé gbọn ogbè he yiaga hugan yiyizan dali blo. Eyin a to vivẹnudo nado miọnhomẹnamẹ, ogbè he miọn ganji nọ saba pọnte hugan.

Ogbè He Yiaga Yiyizan po Kọdetọn Dagbe Po. Eyin hiẹ to tintẹnpọn nado dọ̀n ayidonugo mẹhe alọnu etọn ján de tọn, ogbè he yiaga nọ saba gọalọ. Mẹjitọ lẹ yọ́n ehe, enẹwutu yé nọ zegbeyiaga nado ylọ ovi yetọn lẹ to whenuena ojlẹ sọ nado doalọtena aihundida. Gbèzeyiaga sọgan sọ yin dandannu to whenuena azinponọ to didọna mẹplidopọ lẹ nado gbọṣi abọẹninọ mẹ to opli agun tọn kavi plidopọ de tẹnmẹ. Dile wẹnlatọ lẹ to mahẹ tindo to lizọnyizọn kunnudegbe tọn mẹ, yé sọgan dlángbè nudọdomẹ tọn hlan gbẹtọ lẹ dile yé dọnsẹpọ mẹhe to azọ́nwa to gbonu owhé de tọn lẹ.

To whenuena hiẹ tlẹ ko dọ̀n ayidonugo mẹde tọn godo, onú titengbe wẹ e yin nado to ogbè he pemẹnu yizan zọnmii. Ogbè he yìdo zẹjlẹgo sọgan na linlẹn lọ dọ hodọtọ lọ ma wleawu ganji kavi ma kúdo nuhe dọ e te ji.

To whenuena e bẹ gbedide de hẹn, ogbè zizeyiaga sọgan whàn gbẹtọ lẹ hlan nuyiwa kọ̀n. (Owalọ 14:9, 10) Mọdopolọ, gbedide nina po ogbè he yiaga po sọgan glọnalina nugbajẹmẹji. To Filippi, gàntọ́-ṣọ́tọ de ko dibla hù ede na e lẹndọ gàntọ etọn lẹ ko họnyi wutu. “Paulu yí ogbè lélé do dawhá dọ, a gbleawuna dewe blo: na mí omẹ pó tin to ofi.” Gbọnmọ dali, e hẹnalọdotena ẹn ma nado hù ede. To godo mẹ Paulu po Sila po dekunnuna gàntọ́-ṣọ́tọ lọ po whédo etọn po, bọ yemẹpo kẹalọyi nugbo lọ.—Owalọ 16:27-33.

Lehe Hiẹ Sọgan Hẹn Ogbè Towe Pọnte Do. Na mẹdelẹ, e biọ vivẹnudido susu nado plọn lehe yè nọ yí ogbè he pemẹnu zan do. Mẹde sọgan dọho po ogbè he ma pemẹnu po na ogbè etọn ma zìn wutu. Ṣigba, po vivẹnudido po, nukọnyiyi sọgan yọnbasi, dile etlẹ yindọ hodidọ etọn sọgan gbẹ́ nọ miọn. Na ayidonugo agbọ́ji-yìyì po teninọ towe po. Plọn nado sinai bo nọte to jijlọ ji. Sẹ̀ abọ́ towe lẹ do godo, bo ze agbọ́ mì. Mọdọ hiẹ yì agbọ́ji ganji. Agbọ́ji-yìyì to aliho he sọgbe ehe mẹ, wẹ nọ hẹn ẹn yọnbasi na we nado deanana ogbè towe dile hiẹ to hodọ.

Na mẹdevo lẹ, nuhahun lọ wẹ yindọ yé nọ dọho yiaga gbau. Vlavo yé wleawuna aṣa lọ na yé nọ wazọ́n to gbonu kavi to lẹdo he gọ́ na awhá de mẹ wutu. To alọ devo mẹ, yé sọgan ko whẹ́n to lẹdo de mẹ fie mẹlẹpo nọ to awhádo bọ hógbò-do-nù-namẹ gbayipe te. Taidi kọdetọn de, yé nọ lẹndọ aliho dopo akàn lọ nado mọ nude dọ wẹ nado dọho yiaga hú mẹhe pò lẹ. Dile yé zindonukọn nado to tonusena ayinamẹ Biblu tọn nado ze “lẹblanu homẹ tọn, dagbewà, hùwhẹ, walọmimiọn, po linsinsinyẹn po” dogo, yé na basi vọjlado lẹ to ogbè he yé nọ yí do dọho hẹ mẹdevo lẹ mẹ.—Kọl. 3:12.

Awuwle dagbe, numimọ he nọ wá sọn mahẹ gbesisọ tọn tintindo to sinsẹ̀nzọn kunnudegbe tọn mẹ, po odẹ̀ hlan Jehovah po na gọalọna we nado dọho po ogbè he pemẹnu po. Vlavo hiẹ to hodọ sọn oplò ji kavi na mẹde to lizọnyizọn kunnudegbe tọn mẹ, dovivẹnu nado ze linlẹn towe lẹ do lehe omẹ awetọ lọ sọgan yin alọgọna nado sè nuhe hiẹ to didọ do ji.—Howh. 18:21.