Mẹnu lẹ Wẹ to Ojlo Jehovah Tọn Wà to Egbehe?
1. Whetẹnu wẹ mí na jẹ Mẹnu lẹ Wẹ to Ojlo Jehovah Tọn Wà to Egbehe? plọn ji podọ ale tẹwẹ e na hẹnwa na mí?
1 Bẹsọn osẹ 28 octobre tọn mẹ, mí na jẹ Mẹnu lẹ Wẹ to Ojlo Jehovah Tọn Wà to Egbehe? plọn ji to Biblu Pinplọn Agun tọn whenu. Alọnuwe yọyọ ehe, he yin didetọn to Plidopọ Agbegbe “Basi Hihọ́na Ahun Towe!” whenu, yin awuwlena nado deanana plọnmẹ Biblu lẹ wá titobasinanu lọ mẹ. Gbọnvona dọ dogbigbapọnna alọnuwe ehe na yidogọna pinpẹn-nutọn-yinyọnẹn mítọn nado yin apadewhe titobasinanu Jehovah tọn, e nasọ gọalọna mí nado jẹakọ hẹ azọ́nwanu dagbedagbe ehe he mí na yizan to lizọnyizọn lọ mẹ.—Ps. 48:13.
2. Nawẹ alọnuwe ehe na yin dogbapọnna to agun mẹ gbọn?
2 Lehe E Na Yin Anadena Do: Anadenanutọ lọ dona yí gànmẹ etọn zan ganji, na nukunwhiwhe he e na de na nupinplọn dopodopo nido yin dopolọ. E na bẹ nupinplọn 28 lọ lẹ dopodopo jẹeji gbọn kanbiọ he nọtena hosọ lọ hihia dali. Enẹgodo, e na biọ to wehiatọ lọ si nado hia hukan homẹbibiọ tọn. Bọdego, anadenanutọ lọ na kàn kanbiọ de sè mẹplidopọ lẹ, ehe ewọ lọsu ko wleawuna na homẹbibiọ lọ. Adà he bẹjẹeji po wekun titli po lẹ dopodopo dona yin hihia bo yin hodọdeji debọdo-dego. To whenue adà de ko yin hihia, anadenanutọ lọ na biọ to mẹplidopọ lẹ si nado dọ lehe adà lọ na gblọndo na kanbiọ he nọtena hosọ nupinplọn lọ tọn do. Alọnuwe lọ sọ bẹ yẹdide susu hẹn he sọgan yin hodọdeji. Wefọ tangan lẹ dona yin hihia dile whenu na dotẹnmẹ etọn do. Whẹpo anadenanutọ lọ na yì nupinplọn he bọdego ji, ewọ na basi dogbapọn gbọn kanbiọ he to odò lẹ kinkanse dali. Eyin nupinplọn lọ bẹ apotin lọ “Dindonanu Dogọ” hẹn, e dona yin hihia, enẹgodo anadenanutọ lọ na biọ to mẹplidopọ lẹ si nado dọ lehe anademẹ enẹ na hẹn ale wá na plọnmẹ Biblu de do eyin e yí i do yizan mẹ. Eyin whenu tin to vivọnu oplọn lọ tọn, anadenanutọ lọ sọgan yí hosọ nupinplọn lọ lẹ tọn zan taidi kanbiọ dogbapọn tọn. Flindọ, e ma yin anademẹ ehelẹ wẹ dona yin hihodo dandan nado deanana plọnmẹ Biblu de gba.
3. Nawẹ mí sọgan mọ ale gigọ́ yí sọn dogbigbapọnna alọnuwe ehe mẹ gbọn?
3 Nado mọ ale gigọ́ yí sọn oplọn lọ mẹ, nọ wleawu ganji. Dovivẹnu nado nọ na gblọndo. To oplọn lọ whenu, nọ lẹnnupọndo lehe hosọ lọ na hẹn ale wá na plọnmẹ Biblu lẹ do ji. Na dogbapọn alọnuwe yọyọ ehe tọn ni hẹn mí pegan nado gọalọna mẹdevo lẹ nado wá kọnawudopọ hẹ mí to ojlo Jehovah tọn wiwà mẹ na yelọsu nido sọgan tindo todido lọ nado gbọṣi aimẹ kakadoi!—1 Joh. 2:17.