NUPỌNNAMẸ 14

Nuagokun Tangan lẹ Hinhẹn Họnwun

Heblu lẹ 8:1

BLADOPỌ: Gọalọna mẹplidopọ towe lẹ nado hodo we to hodidọ towe mẹ, bo hẹn ẹn họnwun na yé lehe nuagokun dopodopo gando yanwle po hosọ towe po go do.

NUHE A NA WÀ:

Tindo yanwle de. Lẹnnupọn nado yọnẹn eyin yanwle hodidọ towe tọn wẹ nado namẹ nudọnamẹ, diọlinlẹnnamẹ kavi whàn mẹplidopọ towe lẹ, enẹgodo ze hosọ towe donukọnnamẹ sọgbe hẹ yanwle lọ. Hẹn ẹn diun dọ nuagokun tangan he ji a na zinnudo lẹpo na gọalọna we nado jẹ yanwle towe kọ̀n.

Kanse dewe dọ: ‘Kanbiọ kavi aliglọnnamẹnu tẹlẹ wẹ hosetọ ṣie lẹ gán tindo gando hosọ ehe go? Nawẹ yé gán fọ́n kanbiọ kavi aliglọnnamẹnu enẹlẹ dote debọdo-dego gbọn?’ Enẹgodo, tò nuagokun towe lẹ to aliho dopolọ mẹ na yé nido hodo we bo mọnukunnujẹ nuhe dọ a te lẹ mẹ bosọ kẹalọyi yé.
Zinnudo hosọ hodidọ towe tọn ji. Nọ dlẹnalọdo hosọ lọ to hodidọ lọ blebu mẹ gbọn hogbe tangan hosọ lọ tọn lẹ vivọdọ kavi hogbe he jlo na di yé lẹ yiyizan dali.
Dike nuagokun tangan towe lẹ ni họnwun bo bọawu. De nuagokun tangan he gando hosọ towe go bọ a sọgan dọhodeji to gigọ́ mẹ to ojlẹ he yin didena we lọ gblamẹ lẹ kẹdẹ. De sọha nuagokun tangan lẹ tọn pò bo nọ zinnudo dopodopo yetọn ji ganji, nọ mitán sọn ode ji jẹ devo ji, bo nọ do kanṣiṣa he to ṣẹnṣẹn yetọn hia dile a to yìyì dẹẹdẹ sọn ode ji jẹ devo ji.

A sọgan slẹ nuagokun towe lẹ to homẹbibiọ towe mẹ, na mẹplidopọ towe lẹ nido sọgan hodo we po awubibọ po, kavi a gán vọ́ yé dọ to tadonahó towe mẹ, na mẹplidopọ towe lẹ nido flin yé.