Gandutọ de He Sọgan Deanana Ninọmẹ Aimẹ Tọn

Nugopipe Jesu tọn nado na núdùdù gbẹtọ fọtọ́n susu yinuwado gbẹtọ lẹ ji sisosiso. Yé wá tadona lọ kọ̀n dọ “matin ayihaawe, yẹwhegán he dona wá aihọn mẹ lọ die,” yèdọ Mẹsia lọ, podọ na jide tọn gandutọ dagbe de wẹ ewọ na yin. (Johanu 6:14; Deutelonomi 18:18) Enẹwutu, gbẹtọ lọ lẹ to linlẹn nado wle Jesu bo yí i do doahọlu.

Ṣigba, Jesu yọ́n nuhe gbẹtọ lọ lẹ to linlẹn. E do gbẹtọgun lẹ hlan, bo dọna devi etọn lẹ nado gọ̀ biọ tọjihun yetọn mẹ. Fie wẹ yé jei, podọ ali tẹwẹ yé ze? Yé na yì Bẹtsaida, podọ to enẹgodo Kapẹlnaumi. Ṣigba, Jesu lọsu yì osó ji edeṣo to ozán enẹ mẹ nado hodẹ̀.

Ojlẹ kleun de whẹpo ai do họ́n, to hinhọ́n osun tọn nù, Jesu mọ tọjihun lọ hlan sọn olá. Jẹhọn sinsinyẹn de to agbówhẹn ohù tọn lẹ fọndaga, podọ ‘húnkùnkùn lọ to tuklado apọsteli lẹ na yé to jẹhọn pé wutu.’ (Malku 6:48) Jesu jẹte sọn osó lọ ji bo jẹ zọnlinzin ji gbọn agbówhẹn lẹ ji jei yé dè. Todin, “yé ko kùnhún na nudi kilomẹtlu atọ́n kavi ṣidopo.” (Johanu 6:19) Devi lẹ mọ Jesu bọ e taidi dọ e jlo na zẹ̀ yé go wẹ nkọ, podọ na obu di yé wutu yé dawhá dọmọ: “Odlọ de wẹ!”—Malku 6:49.

Jesu miọnhomẹna yé dọmọ: “Mì gboadọ! Yẹn wẹ; mì dibu blo.” Ṣigba, Pita dọmọ: “Oklunọ, eyin hiẹ wẹ, degbena mi nado gbọn osin ji wá dè we.” Jesu gblọn dọmọ: “Wá!” To whenẹnu, Pita tọ́n sọn tọjihun lọ mẹ bo zinzọnlin gbọn osin ji jei Jesu dè. Ṣigba, to whenue Pita pọ́n yujẹhọn lọ, obu di i bọ e jẹ sisiọ ji. E dawhá dọmọ: “Oklunọ whlẹn mi!” Jesu dlẹnalọ hlan Pita bo hẹn e go bosọ dọna ẹn dọmọ: “Hiẹ yise pẹvinọ, naegbọn a do jẹ ayihaawe tindo ji?”—Matiu 14:27-31.

Pita po Jesu po biọ tọjihun lọ mẹ, bọ jẹhọn lọ doalọte. E paṣa devi lẹ taun, ṣigba be enẹ dona paṣa yé wẹ ya? Eyin yé ko mọnukunnujẹ “zẹẹmẹ akla lọ tọn” mẹ wẹ, yèdọ azọ́njiawu he Jesu wà ojlẹ vude jẹnukọnna enẹ to whenue e na núdùdù gbẹtọ fọtọ́n susu, e ma na ko paṣa yé sọmọ dọ Jesu sọgan zinzọnlin gbọn osin ji bo doalọtena jẹhọn. Todin, yé litaina ẹn bo dọmọ: “Na nugbo tọn, Visunnu Jiwheyẹwhe tọn wẹ hiẹ.”—Malku 6:52; Matiu 14:33.

Ojlẹ vude to enẹgodo, yé jẹ dankló Genezalẹti tọn ji, yèdọ lẹdo he mẹ atin sinsẹ́n lẹ sù te to hùwaji Kapẹlnaumi tọn. Yé glin ohún yetọn bo jẹ agé. Gbẹtọ lẹ yọnẹn dọ Jesu wẹ, podọ to pọmẹ hẹ mẹdevo he tin to agbegbe he lẹdo yé lẹ ji, yé hẹn mẹhe to azọ̀njẹ lẹ wá e dè. Eyin awutunọ lọ lẹ gbẹ́ doalọ okẹ̀yẹ̀ he to awugbó Jesu tọn go poun, yé nọ yin hinhẹn jẹgangan.

To ojlẹ enẹ mẹ, gbẹtọgun he duvivi azọ́njiawu he Jesu wà tọn to whenue e na núdùdù gbẹtọ fọtọ́n susu, doayi e go dọ e ko yì. Enẹwutu, to whenue tọjihun pẹvipẹvi delẹ wá sọn Tibeliadi, yé biọ tọjihun lọ lẹ mẹ bo wá Kapẹlnaumi nado dín Jesu. To whenue yé mọ ẹn, yé kanse e dọmọ: “Labi, whetẹnu wẹ hiẹ wáfi?” (Johanu 6:25) Ṣigba, dile mí na wá mọ do, Jesu wọhẹ yé, podọ owhẹ̀ etọn whẹ́n nado wàmọ.