Adà 2
Aigba He Tin to Mẹdekannu sọn Yajiji mẹ De
1, 2. Pọndohlan vovo tẹlẹ wẹ mẹsusu tindo?
ṢIGBA, livi susu gbẹtọ lẹ tọn lẹdo aihọn pe tindo pọndohlan he gbọnvo mlẹnmlẹn de. Yé mọ sọgodo jiawu de hlan nukọn na gbẹtọvi lẹ. Yé dọ dọ to aigba ji file aihọn he tin to mẹdekannu mlẹnmlẹn sọn ylanwiwa po yajiji po mẹ na tin to madẹnmẹ. Yé tindo tuli dọ nuhe ylan na yin jijlado to madẹnmẹ bọ aihọn yọyọ blebu de na yin didoai. Yé tlẹ nọ dọ dọ dodonu aihọn yọyọ ehe tọn ko to yinyin didoai yèdọ to alọnu din!
2 Omẹ ehelẹ yise dọ aihọn yọyọ lọ na tin to mẹdekannu sọn awhàn, kanyinylan, sẹ́nhẹngba, whẹdida agọ̀, po ohẹ́n po si. E na yin aihọn de matin awutu, awubla, dasin, podọ yèdọ etlẹ yin okú lọsu ga. To ojlẹ enẹ mẹ gbẹtọ lẹ na whẹ́n jẹ pipé kọ̀n bo na nọgbẹ̀ kakadoi to ayajẹ mẹ to paladisi aigba ji tọn mẹ. Etẹ, yèdọ enẹnọ he ko kú lẹ na tlẹ yin finfọ́nsọnkú bo tindo dotẹnmẹ lọ nado nọgbẹ̀ kakadoi!
3, 4. Naegbọn omẹ mọnkọtọn lẹ do tindo numọtolanmẹ tuli tọn dogbọn pọndohlan yetọn dali?
3 Be pọndohlan sọgodo tọn ehe yin odlọ de poun wẹ, yèdọ be nulẹnpọn nujlomẹ tọn de poun wẹ ya? Lala, gbede pọn. Eyin didoai do dodonu yise he lodo de ji dọ Paladisi he jà ehe ma na pozọ̀n gba. (Heblu lẹ 11:1) Naegbọn yé do tindo jide sọmọ? Na ganhunupotọ lọ Didatọ wẹkẹ tọn ko dopagbe etọn wutu wẹ.
4 Gando opagbe Jiwheyẹwhe tọn lẹ go, Biblu dọmọ: “Onú dopo ma gbòpò sọn onú dagbe he Oklunọ [“Jehovah,” NW] Jiwheyẹwhe mìtọn dọ gbọn mì dali lẹ de mẹ.” “Jiwheyẹwhe ma yin gbẹtọ, bọ ewọ na do dolalo; . . . Ewọ ko dọ, ewọ ma ka na wà ẹ wẹ? Kavi ewọ ko dọho, é ma ka na hẹn ẹn ṣẹ wẹ?” “Oklunọ [“Jehovah,” NW] awhànpa lẹ tọn ko whle,‘dọmọ, nugbo, dile yẹn lẹn do, mọkẹdẹ wẹ é na yin; podọ dile ayiha ṣie te, mọkẹdẹ wẹ é na nọte do.’”—Joṣua 23:14; Osọha lẹ 23:19; Isaia 14:24.
5. Kanbiọ tẹlẹ wẹ dona mọ gblọndo yi?
5 Ṣigba, eyin lẹndai Jiwheyẹwhe tọn nado zé paladisi aigba ji tọn he tin to mẹdekannu sọn yajiji mẹ de dai, naegbọn é do jotẹnna onú ylankan lẹ nado jọ to tintan whẹ́? Naegbọn é do nọte na owhe fọtọ́n donu ṣidopo kaka jẹdin whẹpo nado vọ́ nuhe ko gble lẹ jlado? Be owhe kanweko susu yajiji tọn enẹ lẹpo dohia dọ Jiwheyẹwhe ma nọ hò mítọn pọn nugbo nugbo, kavi dọ ewọ ma tlẹ tin wẹ ya?