Nuhewutu Gbẹtọ lẹ Nọ Jẹazọ̀n

BE A yọ́n mẹde bọ e to azọ̀njẹ ya?⁠— Vlavo hiẹ lọsu nọ jẹazọ̀n to ojlẹ delẹ mẹ. A sọgan ko jẹ avivọ pọ́n, kavi homẹ sọgan ko wle we pọ́n. Mẹdelẹ nọ jẹazọ̀n sinsinyẹn. Yé ma tlẹ sọgan fọnṣite na yedelẹ adavo mẹdevo ni gọalọna yé. Ehe nọ saba jọ to whenuena mẹlọ poyọnho kúṣọkúṣọ.

Mẹlẹpo wẹ nọ jẹazọ̀n sọn ojlẹ de mẹ jẹ devo mẹ. Ṣigba be hiẹ yọ́n nuhewutu gbẹtọ lẹ nọ jẹazọ̀n, bo nọ poyọnho, bosọ nọ kú ya?⁠— To gbèdopo, dawe he ma sọgan zinzọnlin de yin hinhẹnwa Jesu dè, bọ Jesu do nuhewutu gbẹtọ lẹ nọ jẹazọ̀n bo nọ kú hia. Gbọ ma dọ nulọ na we.

Jesu tin to ohọ̀ de mẹ to tòpẹvi de mẹ sẹpọ Ohù Galili tọn. Gbẹtọ susu lẹ wá nado dla ẹ pọ́n to finẹ. Gbẹtọ he wá finẹ lẹ sù sọmọ bọ otẹn ma sọ tin na mẹdevo lẹ nado biọ ohọ̀ lọ mẹ ba. Mẹdepope ma tlẹ sọgan sẹpọ ohọ̀n lọ nù ba. Ṣogan, gbẹtọ lẹ gbẹ́ pò to wiwá janwẹ! Mẹdelẹ hẹn dawe de he to plibọzọ̀n jẹ bo ma tlẹ sọgan zinzọnlin wá. Sunnu ẹnẹ wẹ nọ ze e do adọ́zan pẹvi, kavi ozàn de ji.

Be a yọ́n nuhewutu yé jlo nado hẹn dawe he to azọ̀njẹ ehe wá Jesu dè ya?⁠— Yé tindo yise dọ Jesu sọgan gọalọna ẹn, bo hẹnazọ̀ngbọna ẹn sọn awutu enẹ mẹ. Be a yọ́n lehe yé wagbọn do hẹn dawe he to plibọzọ̀n jẹ lọ wá Jesu dè mahopọnna lehe gbẹtọ gọ́ ohọ̀ lọ mẹ do ya?⁠—

Do glido, yẹdide he a to mimọ tofi do lehe yé wàmọ gbọn hia. Tintan, yé ze dawe lọ yì ohọ̀ lọ ji to aga. Ohọ̀ lọ ji to flàlà. Enẹgodo, yé tọ́n odò daho de do ohọ̀ lọ ji. Enẹgodo, yé ze dawe he to azọ̀njẹ lọ po adọ́zan etọn po gbọn odò lọ mẹ bo de e jẹte do abò lọ mẹ. Pọ́n lehe yise yetọn klo sọ!

E paṣa mẹhe tin to ohọ̀ lọ mẹ lẹpo to whenuena yé mọ nuhe to jijọ. Dawe he to plibọzọ̀n jẹ lọ yin zinzlọ́n do ṣẹnṣẹn yetọn po adọ́zan etọn po. Be homẹgble Jesu to whenuena e mọ nuhe dawe lọ lẹ wà wẹ ya?⁠— Paali! Homẹ etọn hùn nado mọdọ yé tindo yise mọnkọtọn. E dọna dawe he to plibọzọ̀n jẹ lọ dọmọ: ‘Yè jo ylando towe na we.’

Delẹ to mẹhe to finẹ lẹ mẹ lẹndọ e ma sọgbe na Jesu nado dọmọ gba. Yé ma lẹndọ Jesu sọgan jo ylando lẹ namẹ gba. Enẹwutu, nado dohia dọ emi sọgan wàmọ nugbonugbo, Jesu dọna dawe lọ dọmọ: “Fọ́n, ze adọ́zan towe, bo yì owhé towe gbè.”

To whenuena Jesu dọmọ, azọ̀n dawe lọ tọn gbọ̀! E masọ hò plibọ ba. Todin e penugo nado fọnṣite na ede bo zinzọnlin. Awuji mẹhe mọ azọ́njiawu ehe lẹ. Yé ma ko mọ nudepope to gbẹzan yetọn mẹ he jiawu sọmọ pọ́n gba! Yé pà Jehovah na Mẹplọntọ Daho ehe nkọtọn he e na yé, he tlẹ sọgan hẹnazọ̀ngbọna gbẹtọ lẹ.⁠—Malku 2:1-12.

Etẹwẹ mí plọn sọn azọ́njiawu ehe mẹ?⁠— Mí plọn dọ Jesu tindo huhlọn nado jo ylando lẹ namẹ bo hẹnazọ̀ngbọna awutunọ lẹ. Ṣigba mí sọ plọn nudevo de ga, yèdọ onú titengbe de. Mí plọn dọ ylando wẹ zọ́n bọ gbẹtọ lẹ do nọ jẹazọ̀n.

To whenuena e yindọ mímẹpo wẹ nọ jẹazọ̀n to whedelẹnu, be ehe zẹẹmẹdo dọ mímẹpo wẹ yin ylandonọ ya?⁠— Mọwẹ, Biblu dọ dọ mímẹpo wẹ yin jiji po ylando po. Be a yọ́n nuhe e zẹẹmẹdo nado yin jiji po ylando po ya?⁠— E zẹẹmẹdo dọ mí yin jiji taidi mapenọ. Mí nọ ṣinuwa to whedelẹnu eyin mí ma tlẹ jlo. Be a yọ́n lehe mímẹpo wagbọn do lẹzun ylandonọ ya?⁠—

Mí lẹzun ylandonọ na sunnu tintan lọ, Adam, ma setonuna Jiwheyẹwhe wutu. E waylando to whenuena e gbà osẹ́n Jiwheyẹwhe tọn. Podọ mímẹpo dugu ylando tọn sọn Adam dè. Be a yọ́n lehe ylando etọn wagbọn do bẹpla mí ya? Dike ma basi zẹẹmẹ etọn na we to aliho he na bọawu na we nado mọnukunnujẹ de mẹ.

Vlavo a ko mọ mẹde dà blẹdi to pánu de mẹ pọ́n. Etẹwẹ na jọ do blẹdi lọ go eyin ohia de ko tin to pánu lọ mẹ? Be a yọ́n nuhe na wà ẹ ya?⁠— Ohia dopolọ na sọawuhia to blẹdi he yè dà to pánu enẹ mẹ lẹpo go, kavi e mayin mọwẹ?⁠—

Adam wẹ taidi pánu lọ, bọ mí gbẹtọ lẹ wẹ yin blẹdi lọ. E lẹzun mapenọ to whenuena e gbà osẹ́n Jiwheyẹwhe tọn. E taidi dọ ohia ylankan de ko jẹ e go nkọtọn. Enẹwutu to whenuena e jivi lẹ, nawẹ e na gando yé go gbọn?⁠— Ovi etọn lẹpo na tindo ohia mapenọ-yinyin tọn dopolọ.

Suhugan ovi lẹ tọn ma nọ yin jiji po ohia mapenọ-yinyin tọn daho de po to agbasa go he a sọgan mọ gba. Yé ma nọ yin jiji po asá dopo kavi awà dopo po gba. Ṣigba mapenọ-yinyin lọ nọ sinyẹn sọmọ bọ yé nọ jẹazọ̀n, bọ to madẹnmẹ, yé nọ kú.

Dile a ko yọnẹn do, mẹdelẹ nọ yawu jẹazọ̀n hú mẹdevo lẹ. Naegbọn e do yinmọ? Be yewlẹ yin jiji po ylando susu po hú mẹhe pò lẹ wẹ ya?⁠— Lala, mẹlẹpo wẹ yin jiji po ylando dopolọ po. Mímẹpo wẹ yin jiji taidi mapenọ. Enẹwutu, e yá wẹo kavi e dẹn wẹo, mẹlẹpo wẹ na jẹazọ̀n. Mẹhe tlẹ nọ tẹnpọn nado setonuna osẹ́n Jiwheyẹwhe tọn lẹpo bo ma nọ wà nuhe ylan lẹ lọsu sọgan jẹazọ̀n ga.

To whelọnu lo, naegbọn mẹdelẹ nọ yawu jẹazọ̀n hú mẹdevo lẹ?⁠— Onú susu wẹ nọ zọ́n. E sọgan yindọ na yé ma tindo núdùdù he pé yé nado dù wutu. Kavi na yé ma nọ dù núdùdù hunsindagbe tọn lẹ wutu. E sọgan yindọ yé nọ dù nuvivi lẹ di bọnun-bọnun po tọfi po zẹjlẹgo. Podọ e sọ sọgan yindọ yé nọ nọ̀ nukle jẹ zánhomẹ bo ma nọ damlọn ganji wutu. Kavi yé ma nọ dó avọ̀ he hlá yozò ganji lẹ to avivọ whenu. Agbasa mẹdelẹ tọn yin madogánnọ zẹjlẹgo, bo ma sọgan hoavùn sọta azọ̀n lẹ, eyin yé tlẹ nọ tẹnpọn nado penukundo yedelẹ go ganji.

Be ojlẹ de na wá tin gbede bọ mí ma na nọ jẹazọ̀n ya? Be mí na yin tuntundote sọn ylando si pọ́n gbede ya?⁠— Eyọn, etẹwẹ Jesu basi na dawe he to plibọzọ̀n jẹ lọ?⁠— Jesu jo ylando etọn lẹ na ẹn bo hẹnazọ̀ngbọna ẹn. Gbọnmọ dali, Jesu basi dohia nuhe e na wá basi to gbèdopo na mẹhe nọ tẹnpọn bo nọ wà nuhe sọgbe lẹ.

Jesu na hẹn mí jẹ gángán eyin mí dohia dọ mí ma jlo nado waylando ba, bo gbẹwanna nuhe yin oylan. E na de mape he mí tindo todin lọ sẹ̀ sọn mí go to sọgodo. E na wà ehe taidi Ahọlu Ahọluduta Jiwheyẹwhe tọn tọn. Ylando lẹpo ma na yin didesẹ sọn mí go to gbèdopo gba. E na yí ojlẹ vude nado sọgan yin didesẹ. To whenuena ylando mítọn na ko yin didesẹ godo, mí ma na jẹazọ̀n pọ́n gbede ba. Mímẹpo na tindo agbasalilo pipé de. Dona nankọtọn die ehe na yin!