NUPINPLỌN 11

Nawẹ A Gán Mọ Nususu Plọn Dogọ sọn Biblu mẹ Gbọn?

Zinjẹgbonu

Be a ko to nulẹnpọn do azọ́n daho he a jlo na bẹjẹeji de ji pọ́n bo mọdọ e na húagbọ́ we ya? Na azọ́n lọ nido ví wiwà na we po awubibọ po, vlavo a gán ko má ẹn do adà voovo ji, bo wà ẹ vudevude. Avùnnukundiọsọmẹnu dopolọ wẹ Biblu hihia nọ bẹhẹn. A gán kanse dewe dọ, ‘Fie n’na bẹsọn taun?’ To nupinplọn ehe mẹ, mí na gbadopọnna onú kleunkleun delẹ he a gán wà bọ e na gọalọna we nado duvivi Biblu hihia tọn bosọ mọaleyi sọn Biblu pinplọn mẹ.

1. Naegbọn mí dona nọ hia Biblu to gbesisọ mẹ?

Mẹhe nọ hia Biblu kavi “osẹ́n Jehovah tọn” to gbesisọ mẹ, na yin ayajẹnọ bo nasọ nọ tindo kọdetọn dagbe. (Hia Salmu lẹ 1:1-3.) Nado bẹjẹeji, dovivẹnu nado nọ hia ẹ na nukunwhiwhe kleun de to azán dopodopo ji. Lehe a nọ hia Ohó Jiwheyẹwhe tọn bo jẹakọ hẹ ẹ do sọ, mọ wẹ a na duvivi etọn do niyẹn.

2. Etẹwẹ na gọalọna we nado mọaleyi sọn Biblu hihia mẹ?

Nado mọaleyi sọn Biblu hihia mẹ, mí dona nọ yiagbọji bo nọ lẹnnupọndo nuhe mí hia ji. Mí ma dona nọ hia ẹ poun gba, amọ́ mí sọ dona “nọ lẹnayihamẹpọn do e ji.” (Jọṣua 1:8, po nudọnamẹ odò tọn po) Dile a to hihia ẹ, nọ kàn kanbiọ ehe nkọ lẹ sè dewe: ‘Etẹ plọn mi ehe te gando Jehovah Jiwheyẹwhe go? Nawẹ n’gán yí ehe do yizan mẹ to gbẹzan ṣie mẹ gbọn? Nawẹ n’gán yí wefọ ehelẹ zan do gọalọna mẹdevo lẹ gbọn?’

3. Ojlẹ tẹwẹ a mọdọ a gán de dovo nado nọ hia Biblu?

Be e nọ vẹawuna we nado mọ whenu na Biblu hihia wẹ ya? Susu mítọn lẹ wẹ e to mọ na. Dovivẹnu nado nọ “yí whenu [towe] zan to aliho dagbe hugan mẹ.” (Efesunu lẹ 5:16) A sọgan de ojlẹ tangan de dovo to azán dopodopo ji nado nọ hia Biblu. Mẹdelẹ nọ de whenu de dovo to zánfinfọ́n lẹ nado hia Biblu. Mẹdevo lẹ de nado nọ wàmọ to ojlẹ devo mẹ, vlavo to gbọjẹ whèmẹ tọn whenu. Ṣigba, mẹdevo lẹ sọ nọ hia Biblu to zánmẹ whẹpo do yihọ. Ojlẹ tẹwẹ a lẹndọ e na yọ́n na hiẹ hugan?

DINDONANU DOGỌ

Pọ́n lehe a gán nọ mọ awuvivi dogọ to Biblu hihia mẹ do. Plọn aliho he mẹ a sọgan nọ wleawu ganji te nado mọ nususu yí sọn Biblu pinplọn towe mẹ.

Bẹplidopọ yẹdide tọn: Visunnu de to pinplọn nado yiwanna núdùdù wunmẹ de, bọ ehe yí ojlẹ susu to e si. 1. Visunnu lọ yí núdùdù lọ do to aihunda. 2. To ojlẹ de godo, visunnu lọ wá jẹ núdùdù lọ dù ji. 3. Whenue visunnu lọ wá whẹ́n, e yiwanna núdùdù enẹ taun. — Dile mí gán plọn nado nọ dù núdùdù he mí ma nọ dù dai lẹ do, mọdopolọ mí sọgan plọn nado nọ duvivi Biblu hihia tọn

4. Plọn lehe a gán nọ duvivi Biblu hihia tọn do

E gán nọma bọawu nado bẹ Biblu hihia jẹeji. Amọ́, taidile mẹde sọgan tẹnpọn nado jẹ núdùdù he e ma nọ dù dai de dù ji do, e yọnbasi nado “wleawuna ojlo vẹkuvẹku” na Biblu hihia. Hia 1 Pita 2:2, enẹgodo dọhodo kanbiọ ehe ji:

Be a lẹndọ eyin a nọ hia Biblu to azán lẹpo gbè, e na wá lẹzun awuvivinu de he a na nọ to jejeji nado wà ya?

Hò VIDEO lọ nado mọ lehe mẹdelẹ wá jẹ vivi Biblu hihia tọn dù ji do. Enẹgodo dọhodo kanbiọ he bọdego lẹ ji.

VIDEO: Jọja lẹ Plọn Nado Yiwanna Ohó Jiwheyẹwhe Tọn (5:33)

To video ehe mẹ, avùnnukundiọsọmẹnu tẹwẹ jọja lọ lẹ pehẹ?
Etẹwẹ gọalọna yé nado tẹdo yanwle he yé zedai nado nọ hia Biblu go?
Etẹwẹ yé wà nado duvivi Biblu hihia yetọn tọn dogọ?

Ayinamẹ delẹ die he na gọalọna we nado bẹjẹeji:

Nọ zan lẹdogbedevomẹ Biblu tọn egbezangbe tọn he do jide de. A sọgan tẹ́n Lẹdogbedevomẹ Aihọn Yọyọ Tọn pọ́n, eyin e tin to ogbè towe mẹ.
Jẹnukọn whẹ́, nọ hia adà he a yiwanna hugan lẹ. Pọ́n ayinamẹ delẹ to apotin lọ “Bẹ Biblu Hihia Jẹeji” mẹ.
Nọ basi kandai dile a to Biblu hia. Yí apotin lọ “Basi Kandai Biblu Hihia Towe Tọn” zan, he tin to owe ehe mẹ.
Nọ zan aplikasiọn JW Library^®. Azọ́nwanu ehe gán gọalọna we nado nọ hia Biblu kavi dotó hoyidokanji etọn to fidepope he a te po alokan towe po kavi nuyizan mọnkọtọn devo depope.
Nọ yí nudọnamẹ dogọ he tin to Biblu Lẹdogbedevomẹ Aihọn Yọyọ Tọn mẹ lẹ zan. Yé nọ bẹ yẹdide otò tọn lẹ, apotin lẹ, po zẹẹmẹ hogbe lẹ tọn de po hẹn, he gán gọalọna we nado duvivi wehihia towe tọn dogọ.

5. Nọ wleawuna Biblu pinplọn towe

Hia Salmu lẹ 119:34, enẹgodo dọhodo kanbiọ ehe ji:

Naegbọn e nọ yọ́n nado nọ hodẹ̀ jẹnukọnna Biblu hihia kavi whẹpo do jẹ awuwlena Biblu pinplọn towe ji?

Nawẹ a sọgan nọ mọ nususu plọn to oplọn dopodopo whenu gbọn? Dile a to awuwlena nupinplọn de na oplọn ehe, tẹ́n nuhe bọdego ehelẹ pọ́n:

Nọ hia hukan bẹjẹeji tọn nupinplọn lọ tọn lẹ.
Nọ hùn wefọ he yin sislẹ lẹ bo nọ hia yé, bosọ nọ tẹnpọn nado yọ́n kanṣiṣa he yé tindo hẹ hosọ lọ.
Nọ zẹhudo nuagokun kavi hodidọ tangan he a na yizan to gblọndo towe mẹ lẹ glọ; ehe na gọalọna we nado dọhodopọ do nupinplọn lọ ji hẹ mẹplọntọ towe.

Bẹplidopọ yẹdide tọn: Yọnnu de to awuwlena nupinplọn Biblu tọn etọn. A. E to hukan tintan nupinplọn lọ tọn hia. B. E to wefọ he yin sislẹ do nupinplọn lọ mẹ lẹ hia sọn Biblu mẹ. C. E zẹhudo glọ na hogbe po hodidọ ayidego tọn he to nupinplọn lọ mẹ lẹ po.

Be a yọnẹn ya?

Kunnudetọ Jehovah tọn lẹ ko yí lẹdogbedevomẹ Biblu tọn susu lẹ zan. Amọ́, dehe mí yiwanna hugan wẹ Owe-Wiwe lẹ—Lẹdogbedevomẹ Aihọn Yọyọ Tọn, na e sọgbe bo họnwun, bosọ bẹ yinkọ Jiwheyẹwhe tọn titi hẹn wutu.—Pọ́n hosọ Intẹnẹt ji tọn lọ “Be Kunnudetọ Jehovah Tọn lẹ Tindo Biblu Yetọn Titi Wẹ Ya?”

MẸDELẸ NỌ DỌ DỌ: “Biblu pinplọn ma yin mẹde gbẹ́. N’ma do whenu kavi agbọ́ etọn.”

Hiẹ lo, etẹ a lẹn?

BLADOPỌ

Nado mọ nususu plọn sọn Biblu mẹ, basi tito ojlẹ he mẹ a na nọ hia ẹ te tọn, nọ hodẹ̀ nado mọnukunnujẹ nuhe a hia mẹ, bosọ nọ wleawu jẹnukọnna oplọn dopodopo.