Dapana Ayihafẹsẹnamẹnu lẹ to “Azán Wẹndagbe” Tọn Ehe Gbè — WESẸDOTẸN INTẸNẸT JI TỌN Watchtower Tọn

Dapana Ayihafẹsẹnamẹnu lẹ to “Azán Wẹndagbe” Tọn Ehe Gbè

PÒTỌNỌ ẹnẹ lọ lẹ lẹnnupọndo nuhe yé na wà ji. Mẹdepope ma nanú yé to họngbo tòdaho lọ tọn ji. Silianu lẹ glọnalina núdùdù nado biọ Samalia na huvẹ nido hù gbẹtọ lẹ kavi na yé nido jogbe. E vẹawu nado biọ tòdaho lọ mẹ; podọ núdùdù vẹahi taun. Linlin de tlẹ dohia dọ Samalianu delẹ dù gbẹtọ-lan.—2 Ahọ. 6:24-29.

‘Naegbọn mí ma na yì biọ osla Silianu lẹ tọn mẹ?’ wẹ pòtọnọ lọ lẹ lẹn. ‘Nudepope ma na gú mí.’ To whenue ozán kú, yé dedo. Whenue yé biọ osla lọ mẹ, filẹpo yin tó ó. Agbóhọtọ depope ma tin to finẹ. Osọ́ po kẹtẹkẹtẹ lẹ po to sìnsìn, ṣigba awhànfuntọ depope ma to finẹ. Yé omẹ ẹnẹ lẹ yìnnukun pọ́n gòhọ de mẹ. Mẹdepope ma to gòhọ lọ mẹ, ṣigba núdùdù po osin po to aimẹ susugege. Yé dù bo nù. Pòtọnọ lọ lẹ sọ mọ sika, fataka, avọ̀ lẹ, po nuhọakuẹ devo lẹ po. Yé bẹ onú enẹlẹ bo yì ze yé whlá, bo lẹkọwa nado bẹ dogọ. Silianu lẹpo wẹ họnyi bo jo osla lọ do. Jehovah gbọn azọ́njiawu-liho, hẹn Silianu lẹ nado sè awhágbe awhànpa daho de tọn. Silianu lẹ doge-wezun mẹ na yé lẹndọ yè tọ́nawhàn yé wutu. Nulẹpo wẹ yé jodo!

Pòtọnọ lọ lẹ to nuhọakuẹ lọ lẹ bẹ yì bo nọ yì whlá yé. Ṣigba, na onú Samalianu he to huvẹ kú lọ lẹ tọn biọ ayiha mẹ na yé wutu, ayihadawhẹnamẹnu yetọn jẹ avùnho hẹ yé ji. Yé jẹ didọna yedelẹ ji dọmọ: “Mí ma dagbe wà gba: azán he azán wẹndagbe de tọn wẹ.” Pòtọnọ lọ lẹ yawu lẹkọyi Samalia bo lá wẹndagbe nuhe yé mọ lẹ tọn na yé.—2 Ahọ. 7:1-11.

Mílọsu to gbẹnọ to ojlẹ de mẹ he mí sọgan ylọ dọ “azán wẹndagbe” tọn. To whenue Jesu to alọdlẹndo adà tangan ‘ohia vivọnu titonu lọ tọn,’ e dọmọ: “Yè nasọ dọ yẹwheho wẹndagbe ahọludu tọn he lẹ to aigba fininọ lẹpo mẹ na okunnu de hlan akọta lẹpo; whenẹnu wẹ opodo na wá.” (Mat. 24:3, 14) Nawẹ enẹ gando mí go gbọn?

Ahunmẹdunamẹnu Mẹdetiti Tọn lẹ Sọgan Hẹn Mí Gbọjọ

Na nuhe pòtọnọ lọ lẹ mọ hẹn homẹhun yé wutu, yé wọnji Samalia go na ojlẹ de. Yé ze ayiha do nuhe yé sọgan bẹ lẹ ji. Be onú mọnkọtọn de sọgan jọ do mí go ya? “Huvẹ” yin dopo to nuhe dohiagona vivọnu titonu lọ tọn lẹ mẹ. (Luku 21:7, 11) Jesu na avase devi etọn lẹ dọmọ: ‘Mì ni payi mìde go, vlavo ayiha mìtọn nikaa yin yíyí gigọfla do doagbànna, po nùnùmú gọna magbọjẹ gbẹ̀mẹ tọn lẹ po.’ (Luku 21:34) Taidi Klistiani de, mí dona tin to aṣeji ma nado dike ahunmẹdunamẹnu egbesọegbesọ tọn mítọn lẹ ni zọ́n bọ mí na wọnji dọ mí to gbẹnọ to “azán wẹndagbe” tọn gbè.

Mẹmẹyọnnu de he nọ yin Blessing ma dike nujlomẹ etọn titi lẹ ni hẹn ẹn gbọjọ. E sẹ̀n taidi gbehosọnalitọ de, fó wehọmẹ etọn, bo wlealọ hẹ azọ́nwatọ Bẹtẹli tọn de, podọ yin alọkẹyi taidi dopo to hagbẹ whẹndo Bẹtẹli Bénin tọn lẹ mẹ. E dọmọ: “Họmẹjladotọ de wẹ n’yin, podọ n’nọ duvivi azọ́ndenamẹ ṣie tọn taun.” Todin, homẹ nọ hùn Blessing dọ e ko sẹ̀n na owhe 12 to sinsẹ̀nzọn whenu-gigọ́ tọn mẹ, podọ ayajẹ etọn sọ sù dọ e ko ze ayidonugo etọn do “azán wẹndagbe” tọn he gbè mí to gbẹnọ te to dinvie ji.

Payi Nuhe Nọ Yí Whenu to Mẹsi lẹ Go

To whenue Jesu to devi 70 lẹ dohlan, e dọmọ: “Ojijẹ lọ yin susunọ, ṣigba azọ́nwatọ lẹ wẹ vude; enẹwutu mì hodẹ̀ hlan Oklunọ jijẹ tọn, na e ni do azọ́nwatọ hlan ojijẹ etọn mẹ.” (Luku 10:2) Kẹdẹdile gbàndindọn na jibẹwawhé sọgan zọ́n bọ jinukun glesi de tọn na gble do, mọdopolọ eyin mí gbẹkọ wẹndagbe lọ lilá go, enẹ na zọ́n bọ ogbẹ̀ gbẹtọvi lẹ tọn na yin hinhẹnbu. Enẹwutu Jesu yidogọ dọmọ: “Mì sọ dọnudo mẹdepope to aliho blo.” (Luku 10:4) To ogbè dowhenu tọn mẹ, hogbe lọ “dọnudo” sọgan nọma zẹẹmẹdo “na a te do” kavi “kúdo lewhenu” poun. E sọgan sọ bẹ mẹgbòfán po hodọdopọ gaa he sọgan wá aimẹ to whenue mí dukosọ hẹ họntọn de hẹn. Gbọnmọ dali, Jesu dọna hodotọ etọn lẹ nado dapana numadinu he nọ fẹayihasẹnamẹ lẹ bo yí whenu yetọn zan po nuyọnẹn po. Owẹ̀n he yé dona lá lọ yin owẹ̀n niyaniya tọn de.

Lẹnnupọndo whenu he ayihafẹsẹnamẹnu lẹ sọgan yí sọn asiwe ji. Na owhe susu, televiziọn ko yin pinpọnhlan taidi nuhe nọ yí whenu to mẹsi hugan to fisusu. Ṣigba, etẹwẹ dogbọn alokan apòmẹ tọn, po ọdinatẹẹ lẹ po dali? Dodinnanu de he yin bibasi to Grande-Bretagne do gbẹtọ 1000 ji he tindo mẹhowhe dohia dọ “madoawe Grande-Bretagne-nu lẹ tọn wẹ nọ yí nukunwhiwhe 88 do dọho to alokan ji, nukunwhiwhe 62 do dọho to alokan apòmẹ tọn ji, nukunwhiwhe 53 na wekanhlanmẹ to ọdinatẹẹ ji, podọ nukunwhiwhe 22 na wekanhlanmẹ to alokan ji.” Lẹndopọ whenu ehelẹ tọn hugan donu awe gànmẹ he gbehosọnalitọ alọgọtọ tọn de nọ yizan to lizọnyizọn lọ mẹ to gbèdopo! Whenu nẹmu wẹ a nọ yizan to alokan ji?

Ernst po Hildegard Seliger po nọ payi lehe yé nọ yí whenu yetọn zan do go. To pọmẹ, yé omẹ awe lẹ yí nuhe hugan owhe 40 zan to opá yasanamẹ Nazi tọn lẹ po gànpa Communiste tọn lẹ po mẹ. To whenue yé tọ́n sọn gànmẹ godo, yé sẹ̀n taidi gbehosọnalitọ kakajẹ whenue yé dotana azọ́n aigba ji tọn yetọn.

Mẹsusu wẹ nọ jlo na kanwehlan asu po asi po Seliger. Asu po asi po lọ sọgan ko nọ yí suhugan whenu yetọn tọn zan nado hia kavi wlan wekanhlanmẹ lẹ. Ṣigba, gbigbọnu lẹ wẹ nọ duahunmẹna yé hugan.

Na nugbo tọn, mímẹpo wẹ nọ jlo nado duvivi hodọdopọ tọn hẹ mẹyiwanna mítọn lẹ to alokan ji kavi gbọn wekanhlanmẹ dali podọ nudepope ma ylan to enẹ mẹ. Eyin mí nọ diọ nuwiwa egbesọegbesọ tọn mítọn lẹ, enẹ na hẹn ale wá na mí. Ṣigba, nuyọnẹnnu wẹ e na yin dọ mí ni tin to aṣeji nado deanana nuhe nọ yí whenu to mí si lẹ to azán wẹndagbe lilá tọn ehe gbè.

Nọ Dọyẹwheho lọ to Gigọ́ Mẹ

Lẹblanulọkẹyi nankọ die nado to gbẹnọ to “azán wẹndagbe” tọn ehe gbè! Na mí ni ma dike nude ni fẹayihasẹna mí dile pòtọnọ ẹnẹ lọ lẹ wà do jẹnukọn blo. Flindọ yé wá tadona lọ kọ̀n dọ: “Mí ma dagbe wà gba.” Mọdopolọ, mílọsu ma na wà dagbe eyin mí dike nujlomẹ mẹdetiti tọn lẹ kavi nuhe nọ yí whenu susu to mẹsi lẹ ni glọnalina mí nado tindo mahẹ gigọ́ to lizọnyizọn lọ mẹ.

To whẹho ehe mẹ, mí tindo apajlẹ ayidego tọn de nado hodo. To whenue apọsteli Paulu flin owhe 20 he e yizan jẹnukọn to lizọnyizọn lọ mẹ lẹ, e wlan dọmọ: “Yẹn ko dọyẹwheho wẹndagbe Klisti tọn to gigọ́ mẹ.” (Lom. 15:19) Paulu ma na dotẹnmẹ nudepope nado dekanpona zohunhun etọn. Taidi Paulu, mì gbọ mílọsu ni yin zohunhunnọ to owẹ̀n Ahọluduta lọ tọn lilá mẹ to “azán wẹndagbe” tọn ehe gbè.

[Yẹdide to weda 28]

Blessing ma dike nujlomẹ etọn titi lẹ ni yitẹn to lizọnyizọn whenu-gigọ́ tọn etọn si

[Yẹdide to weda 29]

Ernst po Hildegard po nọ payi lehe yé nọ yí whenu yetọn zan do go