Pipehẹ Nugbajẹmẹji Jọwamọ Tọn Lẹ

Dile sọha nugbajẹmẹji jọwamọ tọn lẹ tọn po obá he mẹ yé to nuhẹngble jẹ po fọ́n bo to jijideji, etẹwẹ sọgan yin wiwà nado pehẹ ninọmẹ lọ? Mì gbọ mí ni gbadopọnna afọdide yọ́n-na-yizan he sọgan yin zize delẹ.

Nọla na lẹdo owù tọn lẹ. “Omẹ zinzin ko mọ oylan donukọn, bo yí ede whlá; ṣigba wunvinọ lẹ juwayi, yè sọ sayahẹ yé,” wẹ Biblu dọ. (Howhinwhẹn lẹ 22:3) Ayinamẹ nuyọnẹn tọn de wẹ ehe yin bo sọgan yin yiyizan na nugbajẹmẹji lẹ. Eyin avase yin nina dọ to madẹnmẹ osó miyọ́nnọ de na wujẹgbonu, osin na gbàmẹ, yujẹhọn kavi jẹhọn ahizi de na yìn, nuyọnẹnnu wẹ e na yin dọ mẹhe tin to lẹdo lọ mẹ lẹ ni sẹtẹn yì fie tindo hihọ́ hugan. Ogbẹ̀ họakuẹ taun hugan owhé kavi nutindo agbasa tọn devo lẹ.

Mẹdelẹ sọgan de ma nado sawhé do lẹdo he tindo owù taun de mẹ. Kandai dejidego de dọmọ: “Owù lọ nọ tin taun dọ nugbajẹmẹji lẹ ni wá aimẹ to lẹdo tangan delẹ mẹ. Adà Aigba lọ tọn kleun delẹ ji wẹ owù nugbajẹmẹji lẹ tọn sù te hugan, podọ suhugan nugbajẹmẹji he na hẹnnugble taun to nukọn mẹ lẹ tọn na wá aimẹ to ofi enẹlẹ.” Ehe sọgan jọ to lẹdo ohù tọn he yìdo kavi lẹdo he sẹpọ fie aigba zẹ̀ to oglọ te lẹ mẹ. Eyin hiẹ sọgan dapana lẹdo he bẹ owù hẹn taun enẹlẹ mẹ ninọ kavi sẹtẹn yì fie tindo hihọ́ hugan de, yọnbasi lọ dọ a ni jiya nugbajẹmẹji lẹ tọn na depò taun.

Wleawuna tito nuyiwa tọn de. Mahopọnna obá he mẹ hiẹ ko wleawudai jẹ, e yọnbasi dọ hiẹ ni gbẹ́ jiya nugbajẹmẹji madonukun de tọn. E na bọawuna we hugan nado pehẹ ninọmẹ lọ eyin hiẹ ko basi tito jẹnukọn. Ehe sọ tin to kọndopọ mẹ hẹ ayinamẹ Howhinwhẹn lẹ 22:3 tọn he yin nùdego to aga. Be hiẹ ko wleawuna saki de he bẹ onú dandan tọn delẹ hẹn he a sọgan ze nado yawu họ̀ngán ya? Delẹ to nuhe owe lọ1-2-3 of Disaster Education na ayinamẹ nado ze hẹn lẹ mẹ wẹ: Amasin lẹ, osingò, núdùdù he ma na yawu gble gọna owe tangan delẹ. Humọ, nuyọnẹnnu wẹ e na yin nado vọ́ hodọdo nugbajẹmẹji wunmẹ he sọgan wá aimẹ lẹ po nuhe sọgan yin wiwà to ninọmẹ dopodopo mẹ lẹ po ji hẹ whẹndo towe.

Hẹn haṣinṣan pẹkipẹki de go hẹ Jiwheyẹwhe. Mọwiwà sọgan gọalọ to ninọmẹ depope mẹ. Biblu dọho gando Jiwheyẹwhe go taidi “Otọ́ lẹblanu sisosiso lẹ tọn podọ Jiwheyẹwhe homẹmimiọn lẹpo tọn, he nọ miọnhomẹna mí to nukunbibia mítọn lẹpo mẹ.” Wefọ devo do e hia taidi Jiwheyẹwhe “he nọ miọnhomẹna mẹhe jẹflumẹ lẹ.”—2 Kọlintinu lẹ 1:3, 4; 7:6.

Mọwẹ, Jiwheyẹwhe yọ́n nuhe nọ jọ do mẹhe yí i sè lẹ go kitokito. Jiwheyẹwhe owanyinọ de wẹ ewọ bo nọ wleawu tulinamẹ tọn to aliho voovo mẹ. (1 Johanu 4:8) Dẹ̀hiho nado biọ gbigbọ wiwe huhlọnnọ Jiwheyẹwhe tọn, kakati nado biọ azọ́njiawu, sọgan gọalọna mí to ninọmẹ depope mẹ. Gbigbọ wiwe sọgan gọalọna mẹhe to awusinyẹnnamẹ glọ lẹ nado flin wefọ Biblu tọn he na miọnhomẹ bosọ hẹn kọfanamẹ wá na yé lẹ. Na nugbo tọn, devizọnwatọ nugbonọ Jiwheyẹwhe tọn lẹ sọgan tindo numọtolanmẹ Davidi, ahọlu Islaeli hohowhenu tọn nkọ, mẹhe dọmọ: “Nugbo, eyin yẹn tlẹ to zọnlinzin gbọn agbàdo zinvlu gọ́ngọ́n tọn ṣẹnṣẹn, yẹn ma obu na di na oylan de: na hiẹ tin to dè e; aglọ towe po opò towe po, yé homẹmiọnna mi.”—Psalm 23:4.

Klistiani lẹ nọ gọalọna ode awetọ. To owhe kanweko tintan whenu, Agabu, yẹwhegán Klistiani de dohia dọ “huvẹ daho de na tọ́n to madẹnmẹ to aigba lọ pete ji; ehe jọ, na nugbo tọn, to ojlẹ Klaudiu tọn mẹ.” Susu devi Jesu tọn he tin to Jude lẹ tọn wẹ jiya huvẹ lọ tọn sinsinyẹn. Etẹwẹ devi he to fidevo lẹ wà to whenue yé sè dọ adán gbò Klistiani hatọ yetọn lẹ? Kandai lọ dọmọ: “Mẹhe yin devi lẹ magbe, yèdọ dopodopo yetọn sọgbe hẹ nuhe go yé pé, nado do alọgọ kọgbọ tọn hlan mẹmẹsunnu he nọ nọ̀ Jude lẹ.” (Owalọ lẹ 11:28, 29) Owanyi whàn yé nado gọalọ.

To egbehe, nudopolọ wẹ devizọnwatọ Jiwheyẹwhe tọn lẹ nọ wà to whenue nugbajẹmẹji sinsinyẹn lẹ wá aimẹ. Kunnudetọ Jehovah tọn lẹ yin yinyọnẹn ganji taidi mẹhe nọ gọalọna yisenọ hatọ lẹ. Di apajlẹ, to whenue aigba sisọsisọ he tindo huhlọn taun de gbànú to Chili, to 27 février 2010, Kunnudetọ Jehovah tọn lẹ yawu yinuwa nado gọalọna mẹhe adán gbò lẹ. Karla, owhé mẹhe tọn tsunami de gbà, dọmọ: “Homẹmiọnnamẹnu podọ tulinamẹnu wẹ e yin nado mọdọ to wunkẹngbe nugbajẹmẹji lọ tọn tlolo wẹ [Kunnudetọ hatọ lẹ] wá sọn lẹdo devo lẹ mẹ nado gọalọna mí. Matin ayihaawe, Jehovah miọnhomẹna mí gbọn dagbewà mẹdezejotọ enẹlẹ tọn gblamẹ. N’mọ owanyi po hihọ́ Jehovah tọn po.” Baba daho etọn he ma yin Kunnudetọ doayi alọgọ lọ go. E dọmọ: “Nuyiwa ehe gbọnvo pete na nuhe n’ko mọ na owhe susu to ṣọṣi ṣie mẹ.” Nuhe e mọ whàn ẹn nado biọ dọ Kunnudetọ Jehovah tọn lẹ ni plọn Biblu hẹ emi.

Gbẹdido hẹ mẹhe yiwanna Jiwheyẹwhe lẹ sọgan gọalọ taun to ojlẹ awusinyẹn tọn lẹ mẹ. Ṣigba, be nugbajẹmẹji lẹ na wá busẹ sọn aimẹ gbèdopo ya? Mì gbọ mí ni pọ́n nuhe Biblu dọ do whẹho ehe ji.

[Yẹdide to weda 6]

Be hiẹ ko wleawuna saki de he bẹ onú dandan tọn delẹ hẹn he a sọgan ze nado yawu họ̀ngán ya?

[Yẹdide to weda 7]

Dẹ̀hiho nado biọ gbigbọ wiwe huhlọnnọ Jiwheyẹwhe tọn sọgan gọalọna mí to ninọmẹ depope mẹ

[Yẹdide to weda 7]

Klistiani lẹ nọ gọalọna ode awetọ nado pehẹ nuyiwadomẹji nugbajẹmẹji lẹ tọn

[Yẹdide to weda 7]

“N’mọ owanyi po hihọ́ Jehovah tọn po”