Wà Nuhe Go A Pé Lẹpo Nado Hẹn Alọwle Towe Dote
“Anademẹ ehelẹ wẹ yẹn to nina mẹhe wlealọ lẹ, ṣogan e ma yin yẹn adavo Oklunọ.”—1 KỌL. 7:10.
BE HIẸ SỌGAN NA GBLỌNDO YA?
Linlẹn tẹ mẹ wẹ Jiwheyẹwhe kọ̀n alọwlemẹ lẹ dopọ te?
Nawẹ mẹho lẹ sọgan gọalọna Klistiani he tindo nuhahun to alọwle yetọn mẹ lẹ gbọn?
Nukun tẹwẹ mí dona nọ yí do pọ́n alọwle?
1. Nawẹ Klistiani lẹ nọ pọ́n alọwle hlan gbọn, podọ etẹwutu?
TO WHENUE Klistiani lẹ wlealọ, yé nọ dopà de to Jiwheyẹwhe nukọn. Azọngban he yé ma dona yí nukunpẹvi do pọ́n de wẹ ehe yin. (Yẹwh. 5:4-6) Taidi Dowatọ alọwle tọn, Jehovah kọ̀n mẹhe wlealọ lẹ dopọ. (Malku 10:9) Yé ko yin kinkọndopọ to nukun Jiwheyẹwhe tọn mẹ mahopọnna osẹ́n otò he mẹ yé tin te tọn. Devizọnwatọ Jehovah tọn lẹ dona nọ pọ́n alọwle hlan taidi tito he kọ̀n asu po asi po de dopọ, vlavo yé ko yin sinsẹ̀n-basitọ etọn whẹpo do wlealọ wẹo kavi lala.
2. Kanbiọ tẹlẹ wẹ mí na gbadopọnna to hosọ ehe mẹ?
2 Alọwle kọdetọn dagbenọ de sọgan hẹn ayajẹ daho wá. Ṣigba, eyin alọwle de wá tindo nuhahun, etẹwẹ sọgan yin wiwà? Be alọwle mọnkọtọn sọgan yin hinhẹn dote ya? Alọgọ tẹwẹ tin-to-aimẹ na mẹhe ma tindo jijọho to alọwle yetọn mẹ lẹ?
BE E NA YIN ALỌWLE AYAJẸNỌ YA KAVI LALA?
3, 4. Etẹwẹ sọgan jọ eyin mẹde basi nudide nulú tọn to whenue e to mẹhe e na wlealọ hẹ de?
3 Eyin alọwle Klistiani lẹ tọn tindo kọdetọn dagbe, e nọ hẹn ayajẹ wá bosọ nọ hẹn gbégbò wá na Jehovah. Eyin e ma tindo kọdetọn dagbe, e nọ hẹn awubla sinsinyẹn wá. Klistiani tlẹnnọ he to nulẹnpọn do alọwle ji de sọgan bẹ gbẹzan alọwle tọn jẹeji po kọdetọn dagbe po eyin e hodo anademẹ Jiwheyẹwhe tọn. Ṣigba, eyin mẹde basi nudide nulú tọn to whenue e to mẹhe e na wlealọ hẹ de, e sọgan hẹn awufiẹsa po flumẹjijẹ po wá ede ji. Di apajlẹ, jọja delẹ nọ biọ họntọn mẹ to whenue yé ma ko wleawufo nado didá azọngban he gando gbẹzan alọwle tọn go lẹ. Mẹdelẹ nọ dín mẹhe yé na wlealọ hẹ to Internet ji bo nọ dota alọwle he ma na tindo ayajẹ depope mẹ. Mẹdevo lẹ nọ jai jẹ ylando sinsinyẹn mẹ to whenue yé to họntọn mẹ. Gbọnmọ dali, yé sọgan hẹn sisi he yé tindo na ode awetọ bu. Eyin yé wá de nado wlealọ, alọwle yetọn sọgan nọma tindo dodonu he lodo de.
4 Klistiani delẹ ma nọ wlealọ “to Oklunọ mẹ kẹdẹ” bo nọ wá jiya awufiẹsa he nọ saba wá aimẹ to whédo he klan to sinsẹ̀n-liho lẹ mẹ tọn. (1 Kọl. 7:39) Eyin ninọmẹ towe niyẹn, hodẹ̀ hlan Jiwheyẹwhe bo biọ jona po alọgọ po. Ewọ ma nọ de kọdetọn he nuṣiwa mẹde tọn nọ hẹnwa e ji lẹ sẹ̀, ṣigba e nọ gọalọna mẹhe lẹnvọjọ lẹ nado doakọnna whlepọn lẹ. (Ps. 130:1-4) Wà nuhe go a pé lẹpo nado hẹn homẹ etọn hùn todin podọ kakadoi, podọ ‘ayajẹ Jehovah tọn na yin huhlọn towe.’—Nẹh. 8:10.
TO WHENUE ALỌWLE DE TIN TO NUHAHUN MẸ
5. Linlẹn tẹlẹ wẹ mẹhe alọwle yetọn tindo nuhahun lẹ dona dapana?
5 Mẹhe alọwle yetọn gọ́ na nuhahun lẹ sọgan kanse yede dọ: ‘Be e yọnbasi nado hẹn alọwle ṣie dote ya? Vlavo n’sọgan tindo ayajẹ eyin n’kúkú gbọ bo wlealọ hẹ mẹdevo!’ Yé sọgan jlo nado sánkanna alọwle yetọn po linlẹn lọ po dọ: ‘N’sọgan jẹ mẹdekannu whladopo dogọ! Be n’ma sọgan basi gbẹdai wẹ? Eyin n’ma tlẹ sọgan basi gbẹdai sọgbe hẹ Owe-wiwe lẹ, naegbọn n’ma na klan bo jẹ gbẹdu ji whladopo dogọ?’ Kakati nado nọ lẹnnupọn to aliho mọnkọtọn mẹ kavi kudlọ kléwhète tọn do nuhe to jijlo yé lẹ ji, Klistiani lẹ dona wà nuhe go yé pé lẹpo to ninọmẹ yetọn mẹ gbọn anademẹ Jiwheyẹwhe tọn hihodo dali.
6. Basi zẹẹmẹ nuhe Jesu dọ to Matiu 19:9 mẹ tọn.
6 Eyin Klistiani de basi gbẹdai janwẹ, ewọ sọgan vò sọgbe hẹ Owe-wiwe nado vọ́ alọwle kavi nọma vò nado wàmọ. Jesu dọmọ: “Mẹdepope he gbẹ́ asi etọn dai, bọ e ma yin na whẹwhinwhẹ́n galilọ tọn wutu, bo wlealọ hẹ devo, e deayọ.” (Mat. 19:9) Tofi, hogbe lọ “galilọ” bẹ ayọdide po ylando zanhẹmẹ tọn sinsinyẹn devo lẹ po hẹn. Enẹwutu, nujọnu wẹ e yin dọ mẹhe to nulẹnpọn do gbẹdai ji to whenue alọwlemẹ etọn ma ko jai jẹ ylando fẹnnuwiwa zanhẹmẹ tọn mẹ de ni biọ alọgọ Jiwheyẹwhe tọn to odẹ̀ mẹ.
7. Etẹwẹ mẹdevo lẹ sọgan lẹn eyin alọwle Klistiani lẹ tọn ma tindo kọdetọn dagbe?
7 Alọwle he wá dekọtọn do kinklan kavi gbẹdai mẹ de sọgan dohia dọ alọwlemẹ lọ lẹ ma lodo to gbigbọ-liho. Apọsteli Paulu fọ́n kanbiọ titengbe ehe dote: “Na nugbo tọn, eyin mẹde ma yọ́n lehe ewọ na penukundo whédo etọn titi go do, nawẹ ewọ na penukundo agun Jiwheyẹwhe tọn go gbọn?” (1 Tim. 3:5) Na nugbo tọn, eyin alọwlemẹ awe lọ lẹ dọ dọ emi yin Klistiani ṣogan bọ alọwle yetọn ma tindo kọdetọn dagbe, mẹdevo lẹ sọgan lẹndọ yé ma nọ yí nuhe yé nọ plọnmẹ lẹ do yizan mẹ.—Lom. 2:21-24.
8. Etẹwẹ dona ko jẹdò eyin Klistiani alọwlemẹ lẹ basi dide nado klan?
8 Eyin Klistiani alọwlemẹ lẹ to tito basi nado klan kavi basi gbẹdai he ma sọgbe hẹ Owe-wiwe, be nude dona ko jẹdò to haṣinṣan yetọn hẹ Jehovah mẹ. E họnwun dọ dopo to alọwlemẹ lọ lẹ mẹ kavi yé omẹ awe lẹpo ma to nunọwhinnusẹ́n Owe-wiwe tọn lẹ yí do yizan mẹ. Eyin yé ‘nọ yí ayiha yetọn lẹpo do dotudo Jehovah go’ nugbonugbo, e na vẹawu dọ alọwle yetọn ni gbakija.—Hia Howhinwhẹn lẹ 3:5, 6.
9. Nawẹ linsinsinyẹn Klistiani delẹ tọn to alọwle mẹ yin didona gbọn?
9 Susu alọwle he taidi nuhe na gbakija to bẹjẹeji lẹ tọn wẹ wá tindo kọdetọn dagbe to godo mẹ. Klistiani he ma yawu gbọjọ to whenue alọwle yetọn tindo nuhahun lẹ nọ saba mọaleyi to godo mẹ. Lẹnnupọndo nuhe sọgan jọ to whédo he klan to sinsẹ̀n-liho de mẹ ji. Apọsteli Pita wlan dọmọ: “Mì asi lẹ ni nọ yin mẹmẹglọ hlan asu mìtọn titi lẹ, gbọnmọ dali, eyin mẹde ma setonuna ohó lọ, yé sọgan yin dindọn gbọn walọyizan asi yetọn lẹ tọn dali matin ohó depope didọ, na yé yí nukun do mọ walọ wiwe mìtọn to pọmẹ po sisi sisosiso po wutu.” (1 Pita 3:1, 2) Mọwẹ, mayisenọ de sọgan kẹalọyi nugbo lọ na walọyizan dagbe alọwlemẹ etọn tọn wutu! Alọwle he yin hinhẹn dote mọnkọtọn lẹ nọ gbògbéna Jiwheyẹwhe podọ e sọgan hẹn dona mayọnjlẹ lẹ wá na asu, asi po ovi he yé sọgan tindo lẹ po.
10, 11. Nuhahun madonukun tẹlẹ wẹ sọgan fọ́n to alọwle mẹ, ṣigba jide tẹwẹ Klistiani de sọgan tindo?
10 Na yé jlo nado hẹn homẹ Jehovah tọn hùn wutu, suhugan Klistiani tlẹnnọ lẹ tọn nọ de nado wlealọ hẹ yisenọ hatọ lẹ. Ṣigba etlẹ yin to ninọmẹ mọnkọtọn mẹ, nuhe yè ma donukun lẹ sọgan wá jọ. Di apajlẹ, to whedelẹnu, alọwlemẹ de sọgan wá tindo nuhahun to apọ̀nmẹ. Kavi ojlẹ delẹ to alọwle godo, alọwlemẹ de sọgan lẹzun wẹnlatọ he gbọjọ. Di dohia, Linda,a Klistiani zohunhunnọ podọ onọ̀ owanyinọ de yí nukun etọn do mọ bọ asu etọn he ko yí baptẹm, gbọn lẹnvọjọ matindo dali doafọna aliho he jẹagọdo Owe-wiwe lẹ bo wá yin didesẹ sọn agun mẹ. Etẹwẹ Klistiani de dona wà eyin e taidi dọ alọwle etọn masọ tindo todido de ba na whẹwhinwhẹ́n mọnkọtọn lẹ wutu?
11 Hiẹ sọgan kanse dọ, ‘Be n’dona to vivẹnudo nado hẹn alọwle ṣie dote mahopọnna nudepope he sọgan jọ wẹ ya?’ Mẹdepope ma sọgan kavi dona basi nudide enẹ na we gba. Etomọṣo, whẹwhinwhẹ́n dagbe lẹ tin ma nado gbọjọ eyin alọwle towe tlẹ tindo nuhahun. Budisi Jiwheyẹwhe tọ́ he nọ doakọnnanu to alọwle he tindo nuhahun mẹ na ayihadawhẹnamẹnu yetọn wutu lẹ yin nuhọakuẹ to nukun Jiwheyẹwhe tọn mẹ. (Hia 1 Pita 2:19, 20.) Gbọn Ohó po gbigbọ etọn po gblamẹ, Jehovah na gọalọna Klistiani he nọ dovivẹnu vẹkuvẹku nado hẹn alọwle yetọn dote lẹ.
YÉ WLEAWUFO NADO GỌALỌ
12. Nukun tẹwẹ mẹho lẹ na yí do pọ́n mí eyin mí dín alọgọ yetọn?
12 Eyin hiẹ tindo nuhahun to alọwle towe mẹ, ma whleawu nado dín alọgọ gbigbọmẹ tọn sọn Klistiani he whèwhín lẹ dè blo. Lẹngbọhọtọ apó lọ tọn wẹ mẹho lẹ yin podọ homẹ yetọn na hùn nado do ayinamẹ gbọdo Owe-wiwe tọn lẹ hia we. (Owalọ 20:28; Jak. 5:14, 15) Ma wá tadona lọ kọ̀n dọ hiẹ po alọwlemẹ towe po na hẹn sisi he mẹho lẹ tindo na mì bu eyin mì dín alọgọ gbigbọmẹ tọn sọn yé dè bo dọhodo nuhahun alọwle tọn sinsinyẹn de ji hẹ yé blo. Owanyi he yé tindo na mì nasọ sinyẹn dogọ eyin yé mọdọ mì tindo ojlo ahundopo tọn nado hẹn homẹ Jiwheyẹwhe tọn hùn.
13. Ayinamẹ tẹwẹ yin nina to 1 Kọlintinu lẹ 7:10-16 mẹ?
13 Eyin Klistiani he tin to whédo he klan to sinsẹ̀n-liho lẹ mẹ biọ alọgọ mẹho lẹ tọn, mẹho lẹ sọgan zan ayinamẹ Paulu tọn he dọmọ: “Anademẹ ehelẹ wẹ yẹn to nina mẹhe wlealọ lẹ, ṣogan e ma yin yẹn adavo Oklunọ, dọ asi klan sọn asu etọn go blo; ṣigba eyin ewọ dona klan janwẹ, mì gbọ e wlealọ blo kavi eyin e ma yinmọ, ewọ ni gbọwhẹ hẹ asu etọn; podọ asu ni ma jo asi etọn do blo. . . . Na hiẹ asi, nawẹ hiẹ wagbọn do yọnẹn eyin hiẹ ma na whlẹn asu towe gán? Kavi hiẹ asu, nawẹ hiẹ wagbọn do yọnẹn eyin hiẹ ma na whlẹn asi towe gán?” (1 Kọl. 7:10-16) Dona nankọ die dọ alọwlemẹ mayisenọ de ni wá kẹalọyi sinsẹ̀n-bibasi nugbo lọ!
14, 15. Whetẹnu wẹ alọwlemẹ he yin Klistiani de sọgan de nado klan, ṣigba naegbọn e do yin nujọnu nado hodẹ̀ bo yí ahundopo do lẹnnupọndo whẹho lọ ji?
14 Ninọmẹ tẹlẹ glọ wẹ asi Klistiani de sọgan “klan” sọn asu etọn go te? Mẹdelẹ de nado klan na alọwlemẹ yetọn desọn ojlo mẹ bo gbẹ́ nado penukundo yé go. Mẹdevo lẹ ko wàmọ na alọwlemẹ yetọn nọ sayana yé kavi nọ ze gbigbọnọ-yinyin yetọn do owù mẹ.
15 Nudide mẹdetiti tọn wẹ e yin nado klan kavi lala. Etomọṣo, alọwlemẹ he yin Klistiani lọ dona hodẹ̀ bo yí ahundopo do lẹnnupọndo whẹho lọ ji. Di apajlẹ, be mayisenọ lọ kẹdẹ wẹ zọ́n bọ gbigbọnọ-yinyin alọwlemẹ etọn tọn do tin to owù mẹ ya, kavi Klistiani lọ lọsu nọ dovọ́na Biblu pinplọn, ma nọ yì opli lẹ to gbesisọ mẹ, bo ma yin gbesọtọ to lizọnyizọn lọ mẹ?
16. Etẹwẹ dona whàn Klistiani de ma nado basi nudide aplà gando gbẹdai go?
16 Na mí yọ́n pinpẹn haṣinṣan he mí tindo hẹ Jiwheyẹwhe po nunina alọwle tọn etọn po wutu, mí ma dona basi nudide aplà gando gbẹdai go. Taidi devizọnwatọ Jehovah tọn lẹ, klandowiwe oyín wiwe etọn tọn wẹ nọ duahunmẹna mí. Enẹwutu, mí ma na kàn ayiha gbede nado sánkanna alọwle mítọn po linlẹn lọ po nado vọ́ alọwle.—Jel. 17:9; Mal. 2:13-16.
17. Ninọmẹ tẹ mẹ wẹ mí sọgan dọ dọ Jiwheyẹwhe ko ylọ Klistiani he wlealọ lẹ do jijọho kọ̀n te?
17 Klistiani he tindo alọwlemẹ mayisenọ de dona dovivẹnu vẹkuvẹku nado hẹn alọwle etọn lodo. Ṣigba, Klistiani de ma dona dowhẹ ede eyin alọwlemẹ mayisenọ etọn gbẹ́ nado nọhẹ ẹ mahopọnna vivẹnu ahundopo tọn he ewọ do nado hẹn alọwle etọn dote. Paulu wlan dọmọ: “Eyin mayisenọ lọ ze afọdide nado klan, mì gbọ e ni klan; mẹmẹsunnu kavi mẹmẹyọnnu de ma to dandannu glọ to ninọmẹ mọnkọtọn lẹ mẹ gba, ṣigba Jiwheyẹwhe ko ylọ mì do jijọho kọ̀n.”—1 Kọl. 7:15.b
DEJIDO JEHOVAH GO
18. Eyin e ma tlẹ yọnbasi nado hẹn alọwle de dote, kọdetọn dagbe tẹwẹ vivẹnudido nado hẹn ẹn dote sọgan hẹnwa?
18 Eyin hiẹ to pipehẹ nuhahun depope to alọwle towe mẹ, lẹhlan Jehovah nado mọ adọgbigbo yí bosọ nọ dejido ewọ go to whepoponu. (Hia Psalm 27:14.) Lẹnnupọndo apajlẹ Linda, he go mí donù wayi tọn ji. Mahopọnna dọ e dovivẹnu na owhe susu nado hẹn alọwle etọn dote, gbẹdai mẹ wẹ alọwle etọn wá fó do. Be e lẹndọ emi jẹtukla do ovọ́ mẹ wẹ ya? “Paali, vivẹnudido ṣie lẹ dekunnu dagbe gando go e,” wẹ e dọ. E yidogọ dọmọ: “N’tindo ayihadawhẹnamẹnu wiwe de. Hú popolẹpo, owhe enẹlẹ gọalọna viyọnnu mítọn nado hẹn tenọgli go to nugbo lọ mẹ. E whẹ́n bo wá lẹzun Kunnudetọ klandowiwe Jehovah tọn de bosọ yin zohunhunnọ.”
19. Etẹwẹ sọgan yin kọdetọn lọ eyin mẹde dovivẹnu nado hẹn alọwle etọn dote?
19 Homẹ mẹmẹyọnnu de he nọ yin Marilyn tọn hùn dọ e dejido Jiwheyẹwhe go bo dovivẹnu dogọ nado hẹn alọwle etọn dote. E dọmọ: “N’yin whiwhlepọn nado klan sọn asu ṣie go, na e ma nọ penukundo go e to akuẹzinzan-liho bosọ nọ ze gbigbọnọ-yinyin ṣie do owù mẹ wutu. Asu ṣie ko sẹ̀n taidi mẹho agun tọn whẹpo do wá dota tito ajọwiwa tọn he ma sọgbe lẹ mẹ. E jẹ opli lẹ gọ̀n ji, bọ mí masọ nọ dọhodopọ ba. To whenue nukunbianamẹtọ lẹ hẹnnugble to tòdaho mítọn mẹ, budi mi sọmọ bọ n’sú dee bo ma nọ kẹnù do mẹde ji ba. Ṣigba n’wá mọdọ yẹnlọsu nọ yidogọna ninọmẹ mítọn podọ n’dona basi vọjlado. Yẹn po asu ṣie po vọ́ jẹ hodọdopọ ji, jẹ oplọn whẹndo tọn basi ji, bosọ jẹ opli lẹ yì ji to gbesisọ mẹ. Mẹho lẹ do mẹtọnhopọn hia bosọ gọalọna mí taun. Alọwle mítọn sọ gọjẹ yọyọ. Dile ojlẹ to yìyì, asu ṣie wá pegan na azọngban lẹ whladopo dogọ. Numimọ ylankan he mẹ n’plọnnu sọn de wẹ, ṣigba e wá dekọtọn do dagbe mẹ.”
20, 21. Na nuhe dù alọwle, etẹwẹ mí dona magbe nado wá?
20 Vlavo mí yin tlẹnnọ kavi alọwlemẹ, mì gbọ mí ni nọ yinuwa po adọgbigbo po bo nọ dejido Jehovah go to whepoponu. Eyin mí to pipehẹ nuhahun to alọwle mẹ, mí dona dovivẹnu nado didẹ yé bo hẹn do ayiha mẹ dọ mẹhe yin kinkọndopọ to alọwle mẹ lẹ “masọ yin agbasalan awe ba, adavo dopo.” (Mat. 19:6) Humọ, mì gbọ mí ni ma wọn gbede blo dọ eyin mí sinyẹnlin to whédo he klan to sinsẹ̀n-liho de mẹ mahopọnna awusinyẹnnamẹnu lẹ, mí sọgan duvivi ayajẹ he nọ wá sọn alọwlemẹ mayisenọ de hinhẹnwa sinsẹ̀n-bibasi nugbo mẹ tọn.
21 Mahopọnna ninọmẹ mítọn, mì gbọ mí ni magbe nado yinuwa to aliho dagbe mẹ nado sọgan mọ kunnudide dagbe yí sọn mẹhe to gbonu agun lọ tọn lẹ dè. Eyin mí tindo nuhahun to alọwle mítọn mẹ, e na yọ́n dọ mí ni hodẹ̀ vẹkuvẹku, gbeje mẹwhinwhàn mítọn lẹ pọ́n po ahundopo po, yí sọwhiwhe do gbadopọnna nuhe Owe-wiwe lẹ dọ, bo dín alọgọ gbigbọmẹ tọn sọn mẹho lẹ dè. Hú popolẹpo, mì gbọ mí ni magbe nado hẹn homẹ Jehovah Jiwheyẹwhe tọn hùn to onú lẹpo mẹ bo dohia dọ mí yọ́n pinpẹn nunina jiawu etọn tọn he yin alọwle.
[Nudọnamẹ odò tọn]
a Yinkọ lẹ ko yin didiọ.
b Pọ́n Mì Gbọṣi Owanyi Jiwheyẹwhe Tọn Mẹ, weda 219-221; Atọ̀họ̀-Nuhihọ́ lọ Tọn [Flansegbe] 1er novembre 1988, weda 26-27; 1er janvier 1976, weda 31.
[Nudọnamẹ tangan lẹ to weda 10]
Klistiani he ma yawu gbọjọ to whenue alọwle yetọn tindo nuhahun lẹ nọ saba mọaleyi to godo mẹ
[Nudọnamẹ tangan lẹ to weda 12]
Nọ dejido Jehovah go to whepoponu bo lẹhlan ewọ nado mọ adọgbigbo yí
[Yẹdide to weda 9]
Jehovah nọ dona Klistiani alọwlemẹ he nọ dovivẹnu nado hẹn alọwle yetọn dote lẹ
[Yẹdide to weda 11]
Agun Klistiani tọn sọgan yin asisa homẹmiọnnamẹ po alọgọ gbigbọmẹ tọn po tọn