Etẹwẹ Biblu Plọn Mí?

Mẹnu kavi etẹwẹ Lẹgba yin?

BE HIẸ NA DỌ DỌ Lẹgba yin . . .

• Nudida gbigbọnọ de?

• Ohia nuylankan de tọn to gbẹtọ homẹ?

• Linlẹn de to gbẹtọ homẹ?

NUHE BIBLU DỌ

Lẹgba dọho hẹ Jesu bo ‘whlé e pọ́n.’ (Matiu 4:1-4) Enẹwutu, Lẹgba ma yin linlẹn de poun, mọjanwẹ e masọ yin ohia nuylankan de tọn do niyẹn. Nudida gbigbọnọ ylankan de wẹ e yin.

NUDEVO TẸWẸ MÍ SỌGAN PLỌN SỌN BIBLU MẸ?

• Angẹli wiwe de wẹ Lẹgba yin to dowhenu, ṣigba ‘e ma nọte to nugbo mẹ.’ (Johanu 8:44) E lẹzun lalonọ bo ṣiatẹ sọta Jiwheyẹwhe.

• Angẹli devo lẹ kọnawudopọ hẹ Satani to atẹṣiṣi etọn mẹ.​—Osọhia 12:9.

• Lẹgba nọ tọ́nnukunna mẹsusu na yé nikaa yọnẹn dọ ewọ tin.​—2 Kọlintinu lẹ 4:4.

Be Lẹgba sọgan deanana gbẹtọvi lẹ ya?

MẸDELẸ NỌ DỌ DỌ oklọ de poun wẹ linlẹn lọ dọ Lẹgba nọ deananamẹ, podọ mẹdevo lẹ nọ dibu nado yin anadena gbọn gbigbọ ylankan lẹ dali. Etẹwẹ hiẹ lẹn?

NUHE BIBLU DỌ

“Aihọn lọ pete tin to huhlọn mẹylankan lọ tọn glọ.” (1 Johanu 5:19) Lẹgba nọ tindo nuyiwadomẹji sinsinyẹn do gbẹtọvi lẹ ji, amọ́ e ma nọ deanana mẹlẹpo.

NUDEVO TẸWẸ MÍ SỌGAN PLỌN SỌN BIBLU MẸ?

• Lẹgba nọ yí oklọ zan nado yinuwadomẹji dogọ.​—2 Kọlintinu lẹ 11:14.

• Gbigbọ ylankan lẹ sọgan deanana gbẹtọvi lẹ to whedelẹnu.​—Matiu 12:22.

• Po alọgọ Jiwheyẹwhe tọn po, a sọgan “diọnukunsọ Lẹgba” bo dudeji.​—Jakọbu 4:7.