Nawẹ Mí Gán Dohia Dọ Mí Yiwanna Mínọzo Gbọn?

Mẹdopolọ wẹ mí yin, na sunnu tintan lọ Adam wẹ ji mímẹpo. Dile etlẹ yindọ nọvi-nọvi lẹ dona yiwanna yenọzo bo nọ na sisi ode awetọ, owanyi mọnkọ hán to egbehe. Jiwheyẹwhe ma ka jlo dọ ni yinmọ.

NUHE OWE-WIWE DỌ GANDO OWANYI GO

“Hiẹ dona yiwanna gbẹtọ hatọ towe di dewe.”—LEVITIKU 19:18.

“Mì zindonukọn nado nọ yiwanna kẹntọ mìtọn lẹ.”—MATIU 5:44.

NUHE E ZẸẸMẸDO NADO YIWANNA HATỌ MÍTỌN

Pọ́n nuhe Jiwheyẹwhe dọ gando owanyi go to Ohó etọn mẹ to 1 Kọlintinu lẹ 13:4-7 mẹ:

“Owanyi nọ fahomẹ bo nọ yin homẹdagbenọ.”

Lẹnnupọndo ehe ji: Nawẹ e nọ ṣí na we eyin mẹlẹ gbẹ́ nọ fahomẹ bo nọ jọmẹ hẹ we mahopọnna nuṣiwa towe lẹ?

“Owanyi ma nọ whànwu.”

Lẹnnupọndo ehe ji: Nawẹ e nọ ṣí na we eyin mẹlẹ nọ vẹnudo we kavi nọ whànwu we?

Owanyi “ma nọ dín ale edetiti tọn lẹ.”

Lẹnnupọndo ehe ji: Nawẹ e nọ ṣí na we eyin mẹlẹ nọ dotoaina we bo ma nọ dohia dọ yetọn ji janwẹ e na gbò do?

Owanyi “ma nọ basi kandai nuṣiwa tọn.”

Lẹnnupọndo ehe ji: Jiwheyẹwhe nọ jona mẹhe ṣinuwa do e bo lẹnvọjọ lẹ. “Ewọ ma na ze ayidonugo do nuṣiwa mítọn lẹ ji to whepoponu, mọjanwẹ e ma na gblehomẹ kakadoi do niyẹn.” (Salmu lẹ 103:9) E nọ vivi na mí, eyin mẹhe mí ṣinuwa do jona mí. Enẹwutu, mílọsu dona nọ jona mẹlẹ eyin yé ṣinuwa do mí.—Salmu lẹ 86:5.

Owanyi “ma nọ jaya to mawadodo mẹ.”

Lẹnnupọndo ehe ji: Eyin adán gbò mí, mí ma nọ jlo dọ mẹlẹ ni kò mí. Enẹwutu, eyin mẹde tlẹ ṣinuwa do mí bo wá to yaji, mí ma dona kò e.

Eyin mí jlo dọ Jiwheyẹwhe ni dona mí, mí dona nọ yiwanna hatọ mítọn lẹ nugbonugbo mahopọnna owhe, akọ̀ po sinsẹ̀n yetọn po. Mọwiwà nọ biọ dọ mí ni gọalọna mẹhe to hudo mẹ lẹ.