Be Anademẹ Dejidego de Tin Na Sọgodo Dagbe Ya?

Dile mí mọ to hosọ he wayi lẹ mẹ do, nususu wẹ mẹlẹ nọ wà nado do sọgodo dagbe. Mẹdelẹ nọ lẹndọ biọwá mẹtọn-mẹtọn wẹ. Mẹdevo lẹ nọ doafọna wepinplọn, adọkun kavi nọ tẹnpọn nado yin mẹdagbe. Amọ́, mẹhe to afọdona onú enẹlẹ taidi mẹhe jei fide bo to alibu. Be enẹ dohia dọ anademẹ dejidego depope ma tin he gán gọalọna mí nado do sọgodo dagbe wẹ ya? Paali!

OMẸ DOPO GEE HE GÁN DEANANA MÍ

To whenue mí jlo na bayi nudide, mí nọ kanhobiọ mẹhe yin mẹho na mí kavi mẹhe yọnnuin hú mí. Mọdopolọ, mẹhe yin mẹho na mí bosọ yọnnuin hú mí taun de tin bo gán gọalọna mí nado do sọgodo dagbe. Ayinamẹ etọn lẹ to owe wiwe de mẹ he nọ yin Biblu. E ko yì nudi owhe 3 500 he yè jẹ owe ehe kàn ji.

Naegbọn a gán dejido Biblu go? Na e wá sọn Mẹhe yin mẹho hugan bosọ yọnnuin hugan to ogbẹ̀ lọ mẹ dè. Biblu ylọ ẹ dọ “Mẹhe Ko Tin sọn Hohowhenu lọ,” podọ “sọn madopodo jẹ madopodo.” (Daniẹli 7:9; Salmu lẹ 90:2) Ewọ wẹ “Jiwheyẹwhe nugbo lọ, he dá olọn, Mẹhe basi aigba.” (Isaia 45:18) E dọ dọ Jehovah wẹ emi nọ yin.—Salmu lẹ 83:18.

Sọgbe hẹ Biblu, aṣa kavi akọ̀ de ma pọnte hú devo, na mẹhe dá gbẹtọvi lẹpo dè wẹ Biblu wá sọn. Ayinamẹ he to Biblu mẹ lẹ ma nọ dohó pọ́n gbede, podọ gbẹtọvi he to aigba ji lẹpo wẹ gán mọaleyi sọn e mẹ. Biblu tin to ogbè susu mẹ, podọ owe ehe wẹ sọ gbayipe hugan to ogbẹ̀ lọ mẹ.a E bayi dọ gbẹtọvi lẹpo mahopọnna fie yé te wẹ gán hia Biblu bọ e na deanana yé. Nuhe Biblu lọsu dọ niyẹn:

“Jiwheyẹwhe ma yin mẹnukuntahopọntọ gba, ṣigba to akọta lẹpo mẹ, mẹhe nọ dibusi i bo nọ wà dodo wẹ e nọ kẹalọyi.”—OWALỌ LẸ 10:34, 35.

Mẹjitọ he yiwanna ovi etọn lẹ nọ gọalọna yé. Mọdopolọ, Jehovah Jiwheyẹwhe, he yin Otọ́ mítọn yiwanna mí bo nọ yí Ohó etọn Biblu do gọalọna mí. (2 Timoti 3:16) A gán dejido nue Biblu dọ lẹ go, na ewọ wẹ dá mí bo yọ́n lehe mí na zan ogbẹ̀ mítọn do bo do ayajẹ.

MÍ GÁN DEJIDO BIBLU GO

Mí gán kudeji dọ Biblu yin owe dejidego he gán gọalọna mí nado do sọgodo dagbe. To nudi owhe 2 000 die gbọ́n wẹ e ko dọ onú voovo he na wá jọ to ogbẹ̀ lọ mẹ lẹ po jijọ he na nọ tọ́n to walọ gbẹtọ lẹ tọn mẹ lẹ po. Nulọ lẹ pẹpẹ wẹ sọ to jijọ.

NUHE NA JỌ LỌ LẸ

“Akọta na fọ́n do akọta ji, podọ ahọluduta do ahọluduta ji. Aigba sisọsisọ daho lẹ na tin, núdùdù whèdomẹ lẹ po azọ̀nylankan lẹ po na tin sọn fide jẹ fide.”—LUKU 21:10, 11.

JIJỌ HE MẸLẸ NA DOHIA

“To azán godo tọn lẹ mẹ, ojlẹ awusinyẹn tọn he vẹawu nado pehẹ lẹ na wá tin. Na gbẹtọ lẹ na yin wanyina mẹdetiti tọ́, wanyina akuẹtọ, awagundotọ, saklanọ, nùzantọ, tolivẹ do mẹjitọ lẹ go tọ́, mayọndagbenọ, nugbomadọtọ, owanyi jọwamọ tọn matindotọ, gbigbọ gbekọndopọ tọn matindotọ, mẹhẹngbletọ, wazẹjlẹgonọ, kanylantọ, owanyi dagbewà tọn matindotọ, mẹdehiatọ, tasinyẹntọ, mẹhe nọ gbọn kikla dali yigo, wanyina gbẹdudu tọ́ kakati nido yin wanyina Jiwheyẹwhe tọ́.”—2 TIMOTI 3:1-4.

To whenuena e yindọ nue Biblu ko dọ sọn ojlẹ dindẹn die gbọ́n lẹ to jijọ domọ pẹpẹ, tadona tẹ kọ̀n wẹ a wá? Vlavo a na lẹn nudopolọ di dawe he nọ yin Leung bo wá sọn Hong Kong. E dọmọ: “Yè ko kàn dọdai Biblu tọn lẹ din e ma pọ́. Gbẹtọ ma gán dọ onú enẹlẹ bọ e na jọ domọ pẹpẹ. Enẹ dohia dọ mẹhe yọnnuin taun hugan mí dè wẹ Biblu wá sọn.”

Dọdai kanweko susu wẹ to Biblu mẹ bo ko mọ hẹndi.b Dọdai enẹlẹ he mọ hẹndi dohia dọ Biblu yin Ohó Jiwheyẹwhe tọn nugbo. Jehovah dọmọ: “Yẹn wẹ Jiwheyẹwhe, podọ mẹdevo de ma tin taidi yẹn. Yẹn ko nọ dọ kọdetọn lọ sọn bẹjẹeji.” (Isaia 46:9, 10) Po enẹ po, a gán dejido nue Biblu dọ dọ e na jọ to sọgodo lẹ go.

A NA MỌALEYI SỌN DIN SỌYI

Eyin a hodo ayinamẹ he tin to Owe Wiwe mẹ lẹ, dagbe hiẹ lọsu tọn wẹ. Ayinamẹ delẹ die.

AYINAMẸ DAGBE GANDO AKUẸ PO AZỌ́N PO GO

“Gbọjẹ vude pọnte hú kanvinván zẹjlẹgo po wezundido to jẹhọn godo po.”—YẸWHEHODỌTỌ 4:6.

GBẸZAN WHẸNDO TỌN

“Dopodopo mìtọn dona nọ yiwanna asi etọn dile e nọ wà na edetiti do; mọdopolọ, asi dona tindo sisi sisosiso na asu etọn.”—EFESUNU LẸ 5:33.

LEHE MÍ NA NỌ NỌ̀ HẸ MẸDEVO LẸ DO

“Jo homẹgble do bo gbẹ́ adidudu dai; a jẹflumẹ bo lẹhlan ylanwiwa kọ̀n blo.”—SALMU LẸ 37:8.

Eyin a nọ wà nue Biblu dọ lẹ, a na mọaleyi todin bọ sọgodo towe nasọ yọ́n. To Biblu mẹ, mí mọ opagbe jiawu he Jiwheyẹwhe do gando sọgodo go lẹ. Nudagbe he e na wà delẹ die

JIJỌHO PO HIHỌ́ PO

“Homẹmimiọnnọ lẹ wẹ na dugu aigba tọn, yé nasọ nọ mọ awuvivi susu to jijọho susugege mẹ.”—SALMU LẸ 37:11.

ADỌTẸN PO NÚDÙDÙ HE PEMẸNU PO

“Yé na gbá ohọ̀ lẹ bo nasọ nọ nọ̀ yé mẹ, yé na do vẹngle lẹ bo nasọ nọ dù sinsẹ́n yetọn.”—ISAIA 65:21.

AZỌ̀N PO OKÚ PO MA NASỌ TIN

“Okú ma nasọ tin ba, mọjanwẹ aluẹmẹninọ kavi avi kavi awufiẹsa ma nasọ tin ba.”—OSỌHIA 21:4.

Etẹwẹ a gán wà nado mọ sọgodo dagbe enẹ? Pọ́n nue hosọ he bọdego dọ.

a Nado mọ lehe Biblu nọ yin lilẹdogbedevomẹ bo nọ yin mimá do, yì www.pr2711.com ji bo zín NUHE BIBLU PLỌN MÍ > WHENUHO & BIBLU.

b Eyin a jlo na mọ zẹẹmẹ gigọ́, pọ́n weta 9tọ owe lọ La Bible: Parole de Dieu ou des hommes. Kunnudetọ Jehovah tọn lẹ wẹ zín owe ehe jẹgbonu bọ e sọ tin-to-aimẹ to www.pr2711.com ji. Pọ́n adà lọ WESẸDOTẸN > OWE LẸ PO ALỌNUWE LẸ PO.