Owanyi Nọ Gọalọna Mí Nado Duto Obu Ji

1. Etẹlẹ wẹ nọ dobuna mí to paa mẹ?

LẸNNUPỌNDO numimọ jọnun ehelẹ ji. Nestor po asi ẹ María po jlo na sẹ̀n to fie nuhudo sù te.b Amọ́, nado sọgan jẹ yanwle enẹ kọ̀n, e na biọ dọ yé ni basi vọjlado gando aliho gbẹninọ tọn yetọn go. Ṣigba, yé dibu dọ yé ma na tindo ayajẹ nugbonugbo eyin yé zan gbẹzan jlẹkaji tọn. Whenue Biniam lẹzun Kunnudetọ Jehovah tọn de to otò he mẹ azọ́n mítọn nọ yin nukundiọsọ te de, e wá mọdọ taidi dopo to omẹ Jiwheyẹwhe tọn lẹ mẹ, emi gán pehẹ homẹkẹn. Enẹ dobuna ẹn taun. Amọ́, nuhe tlẹ sọ dobuna ẹn hugan wẹ lehe whẹndo etọn gán yinuwa do, eyin yé sè dọ e ko bẹ sinsẹ̀n yọyọ de. Yè mọ azọ̀n kansẹẹ tọn ylankan de na Valérie, podọ e vẹawuna ẹn nado mọ doto de he na na sisi nuyise sinai do Biblu ji etọn lẹ gando ohùn go. Enẹwutu, e dibu dọ emi gán kú.

2. Naegbọn mí dona dovivẹnu nado nọ duto obu mítọn lẹ ji?

² Be a ko dibu to aliho mọnkọ lẹ mẹ pọ́n ya? Susu mítọn go wẹ e ko jọ do. Eyin mí ma plọn nado nọ dava obu mítọn lẹ, e yọnbasi dọ mí na basi nudide ylankan he tlẹ gán hẹn haṣinṣan mítọn hẹ Jehovah gble lẹ. Nuhe Satani jlo lọ pẹẹ niyẹn. E sọ nọ yí obu mítọn lẹ zan nado sisẹ́ mí nado vẹtolina osẹ́n Jehovah tọn lẹ, ehe bẹ gbedide lọ nado dọyẹwheho wẹndagbe lọ tọn hẹn. (Osọ. 12:17) Mẹylankan he dohuhlọn de wẹ Satani yin, podọ e masọ do lẹblanu. Amọ́, a gán basi hihọ́na dewe sọn e si. Gbọnna?

3. Etẹwẹ na gọalọna mí nado duto obu mítọn lẹ ji?

³ Eyin mí kudeji dọ Jehovah yiwanna mí bosọ to adà mítọn mẹ, mí gán gbawhàn Satani tọn. (Salm. 118:6) Di apajlẹ, mẹhe kàn Salmu lẹ 118tọ pehẹ ninọmẹ ayimajai tọn sinsinyẹn susu lẹ. E tindo kẹntọ susu, ehe bẹ mẹhe to otẹn he yiaga mẹ delẹ hẹn (wefọ 9, 10tọ). To whedelẹnu, e pehẹ kọgbidinamẹ sinsinyẹn (wefọ 13tọ). Podọ, e mọ mẹplọnlọ sinsinyẹn yí sọn Jehovah dè (wefọ 18tọ). Etomọṣo, salmu-kantọ enẹ yin whinwhàn nado dọmọ: “Yẹn ma na dibu.” Etẹwẹ zọ́n bọ e tindo numọtolanmẹ hihọ́ tọn sọmọ? E yọnẹn dọ dile etlẹ yindọ Otọ́ olọn mẹ tọn emitọn Jehovah domẹplọnlọ emi go, ewọ yiwanna emi taun. Salmu-kantọ lọ kudeji dọ mahopọnna ninọmẹ depope he emi pehẹ, Jiwheyẹwhe owanyinọ emitọn na to gbesisọ mẹ whepoponu nado gọalọna emi.—Salm. 118:29.

4. Obu tẹlẹ ji wẹ mí gán dute eyin mí deji dọ Jiwheyẹwhe yiwanna mí?

⁴ Mí dona kudeji dọ Jehovah yiwanna dopodopo mítọn. Nujikudo enẹ tintindo na gọalọna mí nado duto onú atọ̀n he nọ dobuna mí to paa mẹ delẹ ji, (1) obu lọ dọ mí ma na penugo nado penukundo whẹndo mítọn go, (2) obu gbẹtọ tọn, podọ (3) obu okú tọn. Mẹhe go mí donù to hukan bẹjẹeji tọn lọ mẹ lẹ penugo nado duto obu yetọn lẹ ji, na yé kudeji dọ Jehovah yiwanna yé wutu.

OBU LỌ DỌ MÍ MA NA PENUGO NADO PENUKUNDO WHẸNDO MÍTỌN GO

5. Ninọmẹ tẹlẹ wẹ gán nọ duahunmẹna tatọ́ whẹndo tọn de taun? (Pọ́n yẹdide he to wepa ji.)

⁵ Tatọ́ whẹndo tọn Klistiani de nọ ylọ azọngban etọn nado penukundo nuhudo agbasa tọn whẹndo etọn tọn go dọ nujọnu. (1 Tim. 5:8) Eyin tatọ́ whẹndo tọn de wẹ a yin, vlavo to azọ̀n bẹplamẹ agọe tọn lọ whenu, a gán ko hanú dọ azọ́n na gbledo emi. A gán ko dibu dọ emi ma na penugo nado mọ núdùdù na whẹndo emitọn kavi nado sú họkuẹ. A sọ sọgan ko hanú dọ eyin azọ́n gbledo emi, e ma na pà emi nado mọ devo. Kavi taidi Nestor po María po he go mí donù to bẹjẹeji, a sọgan ko whleawu nado basi diọdo lẹ to agbasazọ́n towe mẹ, na a lẹndọ e na yinuwado aliho gbẹninọ tọn towe ji wutu. Satani ko tindo kọdetọn dagbe susu to obu mọnkọ lẹ yiyizan mẹ.

6. Nujikudo tẹwẹ Satani nọ tẹnpọn nado hẹn mí tindo?

⁶ Satani nọ tẹnpọn nado hẹn mí kudeji dọ Jehovah ma nọ hò dopodopo mítọn tọn pọ́n, podọ dọ e ma nasọ gọalọna mí nado penukundo whẹndo mítọn go. Enẹwutu, mí gán wá tadona kọ̀n dọ mí dona wà nudepope he e biọ ma nado hẹn azọ́n he to alọmẹ na mí bu, eyin etlẹ biọ dọ mí ni tùnafọ nunọwhinnusẹ́n Biblu tọn lẹ ji.

7. Jidide tẹwẹ Jesu na mí?

⁷ Jesu he yọ́n Otọ́ olọn mẹ tọn mítọn hugan mẹdevo depope hẹn mí kudeji dọ Jiwheyẹwhe mítọn “yọ́n nuhe [mí] tindo nuhudo etọn lẹ, yèdọ whẹpo [mí] tlẹ do biọ.” (Mat. 6:8) Podọ, Jesu yọnẹn dọ Jehovah to gbesisọ mẹ nado wleawuna nuhe sin hudo mí do lẹ na mí. Taidi Klistiani lẹ, mí yin hagbẹ whédo Jiwheyẹwhe tọn lẹ. Mí gán deji dọ taidi Tatọ́ whẹndo tọn de Jehovah na yinuwa sọgbe hẹ nunọwhinnusẹ́n he ewọ lọsu zedai to 1 Timoti 5:8 mẹ.

8. (a) Etẹwẹ na gọalọna mí nado duto obu lọ ji dọ mí ma na penugo nado penukundo whẹndo mítọn go? (Matiu 6:31-33) (b) Nawẹ mí gán hodo apajlẹ asu po asi po he to yẹdide lọ mẹ bo hẹn núdùdù de wá na mẹmẹyọnnu de tọn gbọn?

⁸ Eyin mí kudeji dọ Jehovah yiwanna mí bosọ yiwanna whẹndo mítọn, e ma na vẹawuna mí nado yise dọ mí na tindo nuhe sin hudo mí do lẹ. (Hia Matiu 6:31-33.) Jehovah nọ jlo na wleawudaina mí. Lehe Otọ́ owanyinọ mítọn yin Awuwledainanutọ alọtlútọ de do sọ! Whenue e dá aigba, e wà nususu hú dandannu he mí tindo nuhudo etọn nado nọgbẹ̀ lẹ nina mí poun. E gbọn owanyi dali hẹn aigba lọ gọ́ na nuhe na zọ́n bọ mí na mọ awuvivi susugege lẹ. (Jen. 2:9) Eyin etlẹ nọ jọ to whedelẹnu bọ nuhe mí do hudo etọn lẹ kẹdẹ wẹ nọ to mí si, mí gán nọ jaya dọ mí gbẹ́ do enẹ. Jehovah ma nọ gboawupo nado wleawudaina mí. (Mat. 6:11) Mí dona hẹn do ayiha mẹ dọ avọ́sinsan depope he mí basi to agbasa-liho todin ma sọtẹ́n yijlẹdo nuhe Jiwheyẹwhe owanyinọ mítọn na na mí todin, podọ to sọgodo lẹ go. Nuhe mẹ Nestor po María po wá mọnukunnujẹ niyẹn.—Isa. 65:21, 22.

9. Etẹwẹ a gán plọn sọn apajlẹ Nestor po María po tọn mẹ?

⁹ Nestor po María po duvivi gbẹzan fẹẹmẹninọ tọn de tọn to Colombie. Yé dọmọ: “Mí lẹnnupọndo gbẹzan mítọn hinhẹn bọawu nado gbloada na lizọnyizọn mítọn ji, amọ́ mí dibu dọ mí ma na do ayajẹ eyin mí nọ nọgbẹ̀ po onú vude po.” Etẹwẹ gọalọna yé nado duto obu yetọn ji? Yé lẹnnupọndo aliho susu he mẹ Jehovah ko do owanyi etọn hia yé te lẹ ji. Na yé kudeji dọ ewọ na penukundo yé go to whepoponu wutu, yé jo agbasazọ́n yetọn he pekuẹ lẹ do. Yé sà owhé yetọn bo sẹtẹn yì lẹdo otò lọ tọn de mẹ fie nuhudo wẹnlatọ Ahọluduta lọ tọn sù te. Numọtolanmẹ tẹwẹ yé tindo gando nudide yetọn go? Nestor dọmọ: “Mí mọ nugbo-yinyin nuhe Matiu 6:33 dọ tọn. Mí ma jẹdò nude tọn pọ́n to agbasa-liho. Podọ, gbẹzan mítọn do ayajẹ dogọ todin.”

OBU GBẸTỌ TỌN

10. Naegbọn e do sọgbe dọ gbẹtọvi lẹ ni nọ dibuna gbẹtọvi hatọ yetọn lẹ?

¹⁰ Sọn whenue gbọ́n gbẹtọvi yin didá wẹ yé ko nọ hẹn awugble wá na ode awetọ. (Yẹwh. 8:9) Di apajlẹ, gbẹtọ lẹ nọ ṣì aṣẹpipa yetọn zan, sẹnhẹngbatọ lẹ nọ wà danú, nukundiọsọmẹtọ lẹ nọ zùn klasigbẹ́ yetọn lẹ to wehọmẹ bosọ nọ sìn-adán na yé, podọ mẹdelẹ tlẹ nọ yinuwa hẹ hagbẹ whẹndo tọn yetọn lẹ po kanyinylan po. Abajọ gbẹtọvi lẹ nọ dibuna gbẹtọvi hatọ yetọn lẹ! Nawẹ Satani nọ yí obu gbẹtọ tọn enẹ zan gbọn?

11, 12. Nawẹ Satani nọ yí obu gbẹtọ tọn zan sọta mí gbọn?

¹¹ Satani nọ yí obu gbẹtọ tọn zan nado sisẹ́ mí na mí nido jogbe bo doalọtena yẹwhehodidọ. To nuyiwadomẹji Satani tọn glọ, gandudu lẹ ko hẹnalọdotena azọ́n mítọn bosọ dohomẹkẹn mí. (Luku 21:12; Osọ. 2:10) Titonu aihọn Satani tọn voovo lẹ nọ hẹn nudọnamẹ oklọ tọn po lalo ylankan lẹ po gbayipe gando Kunnudetọ Jehovah tọn lẹ go. Mẹhe nọ yí lalo enẹlẹ sè lẹ gán nọ ṣàn mí kò kavi tlẹ wà danú do mí go. (Mat. 10:36) Be wlẹnwin Satani tọn enẹlẹ nọ paṣa mí wẹ ya? Paali. E ko yí yé zan to owhe kanweko tintan whenu.—Owalọ 5:27, 28, 40.

¹² Obu nukundiọsọmẹ tọn sọn gandudu lẹ dè ma yin adánwanu dopo gee lọ he Satani nọ yizan. Lehe hagbẹ whẹndo tọn mẹdelẹ tọn na yinuwa gando nugbo lọ go do nọ dobuna yé hugan danuwadomẹgo wunmẹ depope. Yé yiwanna hẹnnumẹ yetọn lẹ taun, podọ ojlo yetọn wẹ yindọ omẹ enẹlẹ ni wá yọ́n Jehovah bosọ yiwanna ẹn. E nọ vẹna yé eyin yé sè bọ hẹnnumẹ yetọn lẹ yí hogbe he ma do sisi hia lẹ zan na Jiwheyẹwhe nugbo lọ po sinsẹ̀n-basitọ etọn lẹ po. Amọ́ to ninọmẹ delẹ mẹ, hẹnnumẹ he ko diọnukunsọ nugbo lọ to bẹjẹeji lẹ nọ wá nugbo lọ mẹ to godo mẹ. Etẹwẹ lo eyin hagbẹ whẹndo tọn mítọn lẹ gbẹ́ mí dai mlẹnmlẹn na nuyise yọyọ mítọn lẹ wutu? Nawẹ mí na yinuwa gbọn?

13. Nawẹ nujikudo mítọn dọ Jiwheyẹwhe yiwanna mí gán gọalọna mí nado doakọnnanu whenue hagbẹ whẹndo tọn mítọn lẹ gbẹ́ mí dai gbọn? (Salmu lẹ 27:10)

¹³ Nulinlẹnpọndo hogbe dagbedagbe he to Salmu lẹ 27:10 mẹ lẹ ji gán miọnhomẹna mí. (Hia.) Eyin mí flin obá he mẹ Jehovah yiwanna mí jẹ, mí nọ mọ míde to hihọ́ glọ whenue mí pannukọn nukundiọsọmẹ. Podọ, mí nọ deji dọ ewọ na suahọ mí na akọndonanu mítọn wutu. Jehovah na penukundo nuhudo mítọn lẹ go to agbasa-liho, to numọtolanmẹ-liho podọ to gbigbọ-liho to aliho dagbe mẹ hugan mẹdevo depope! Nuhe go Biniam he hó mí dọ wayi doayi niyẹn.

14. Etẹwẹ a gán plọn sọn apajlẹ Biniam tọn mẹ?

¹⁴ Biniam lẹzun Kunnudetọ Jehovah tọn de mahopọnna dọ e yọnẹn dọ emi gán pehẹ nukundiọsọmẹ sinsinyẹn. Pọ́n lehe yinyọnẹn dọ Jehovah yiwanna emi gọalọna Biniam nado duto obu gbẹtọ tọn ji do. E dọmọ: “Nukundiọsọmẹ lọ mayọnjlẹ. Amọ́, nukundiọsọmẹ whẹndo ṣie tọn tlẹ sọ dobuna mi hugan gandutọ lẹ tọn. N’dibu dọ nudide ṣie nado lẹzun Kunnudetọ Jehovah tọn de na hẹn otọ́ ṣie he yin mayisenọ jẹflumẹ bọ whẹndo ṣie na lẹndọ nuvọ́nọ wẹ n’yin.” Amọ́, Biniam kudeji dọ Jehovah nọ penukundo mẹhe Ewọ yiwanna lẹ go to whepoponu. Biniam dọmọ: “N’lẹnnupọndo lehe Jehovah ko gọalọna mẹdevo lẹ nado doakọnna nuhahun akuẹzinzan tọn, nuvẹun, po danuwiwa gbẹtọgun lẹ tọn po do ji. N’yọnẹn dọ eyin n’tẹdo Jehovah go, e na dona mi. Whenue n’yin wiwle whlasusu, bo tlẹ sọ yin yasana, n’tindo numimọ obá he mẹ Jehovah nọ gọalọna mí to ojlẹ nuhudo tọn lẹ mẹ jẹ tọn, eyin mí hẹn nugbonọ-yinyin mítọn go.” Jehovah lẹzun Otọ́ nujọnu tọn de na Biniam, podọ omẹ Etọn lẹ do yede hia di whẹndo de na ẹn nugbonugbo.

OBU OKÚ TỌN

15. Naegbọn e do sọgbe nado nọ dibuna okú?

¹⁵ Biblu yigbe dọ kẹntọ de wẹ okú yin. (1 Kọl. 15:25, 26) Mí gán nọ hanú eyin mí lẹnnupọndo okú ji, titengbe whenue mílọsu kavi mẹyiwanna mítọn lẹ to awutu sinsinyẹn jẹ. Naegbọn mí nọ dibuna okú? Na Jehovah dá mí po ojlo lọ po nado nọgbẹ̀ kakadoi wutu wẹ. (Yẹwh. 3:11) Eyin mí nọ dibuna okú jẹ obá de mẹ, enẹ gán gọalọna mí nado basi hihọ́na ogbẹ̀ mítọn. Di apajlẹ, e gán whàn mí nado basi nudide dagbe lẹ gando nuhe mí nọ dù po aihundida lanmẹyiya tọn po go, nado dín alọgọ doto lẹ tọn bosọ zan amasin eyin e biọ domọ, podọ nado dapana ogbẹ̀ mítọn zizedo owù mẹ to aliho he ma yin dandan tọn mẹ.

16. Nawẹ Satani nọ tẹnpọn nado yí obu jọwamọ tọn mítọn na okú zan gbọn?

¹⁶ Satani yọnẹn dọ ogbẹ̀ mítọn nọ vẹna mí. Podọ, e sọalọakọ́n dọ nuhe mí tindo lẹpo etlẹ yin haṣinṣan mítọn hẹ Jehovah wẹ mí na yí do sanvọ́ nado basi hihọ́na ogbẹ̀ mítọn dintọn. (Jobu 2:4, 5) Lehe Satani klọ ede do sọ! Amọ́, na Satani wẹ “mẹhe tindo huhlọn nado hẹn okú wá lọ” wutu, e nọ yí obu jọwamọ tọn mítọn na okú zan nado sisẹ́ mí nado gbẹ́ Jehovah dai. (Heb. 2:14, 15) To ninọmẹ delẹ mẹ, devizọnwatọ Satani tọn lẹ nọ sìn-adán nado hù sinsẹ̀n-basitọ Jehovah tọn lẹ eyin yé ma mọ́n yise yetọn. To ninọmẹ devo lẹ mẹ, Satani sọgan yí ninọmẹ nukunpedomẹgo dotowhé tọn niyaniya tọn de zan nado hẹn mí nado jogbe. Doto kavi hagbẹ whẹndo tọn mayisenọ lẹ gán gbidikọna mí nado dohùn, yèdọ nude he ka na gbà osẹ́n Jiwheyẹwhe tọn. Kavi mẹde gán tẹnpọn nado diọlinlẹnna mí nado lẹnnupọndo nukunpedomẹgo devo he jẹagọdo nunọwhinnusẹ́n Owe-wiwe tọn lẹ ji.

17. Sọgbe hẹ Lomunu lẹ 8:37-39, naegbọn mí ma dona nọ dibuna okú to aliho depope mẹ?

¹⁷ Dile etlẹ yindọ mí ma nọ jlo na kú, mí yọnẹn dọ owanyi he Jehovah do na mí ma na doalọte, eyin mí tlẹ kú. (Hia Lomunu lẹ 8:37-39.) Eyin họntọn Jehovah tọn lẹ kú, yé nọ gbọṣi oflin etọn mẹ, taidi dọ yé gbẹ́ to ogbẹ̀ wẹ nkọ. (Luku 20:37, 38) E do ojlo vẹkuvẹku nado hẹn yé gọwá ogbẹ̀. (Jobu 14:15) Jehovah ko suahọ daho de, na mí nido “tindo ogbẹ̀ madopodo.” (Joh. 3:16) Mí yọnẹn dọ Jehovah yiwanna mí sisosiso bosọ nọ penukundo mí go. Enẹwutu, kakati nado jo Jehovah do whenue mí to azọ̀njẹ kavi whenue yè sìn okú dán na mí, mí nọ lẹhlan ewọ nado mọ homẹmimiọn, nuyọnẹn po huhlọn po yí. Nuhe Valérie po asu etọn po wà pẹẹ niyẹn.—Salm. 41:3.

18. Etẹwẹ a gán plọn sọn apajlẹ Valérie tọn mẹ?

¹⁸ Whenue Valérie do owhe 35, doto lẹ mọ azọ̀n kansẹẹ tọn ylankan he ma gbayipe sọmọ de na ẹn. Pọ́n lehe owanyi gọalọna ẹn nado duto obu okú tọn ji do. E dọmọ: “Awutu he yè mọ na mi lọ diọ gbẹzan mítọn to zánto dopo mẹ. Yè dona wazọ́n mẹzizẹ tọn he gẹdẹ de na mi whẹpo n’nado nọgbẹ̀. N’dọho hẹ doto mẹzẹtọ susu, amọ́ depope to yé mẹ ma yigbe nado wazọ́n na mi matin hùndido. Obu di mi taun, amọ́ sọgbe hẹ gbedide Jiwheyẹwhe tọn, n’ma dona kẹalọyi hùndido paali! To gbẹzan ṣie blebu mẹ, Jehovah ko do owanyi hia mi taun. Todin, dotẹnmẹ de hundote na mi nado do owanyi ṣie hia ewọ lọsu. Whedepopenu he n’sè owẹ̀n ylankan de, n’tlẹ nọ magbe dogọ nado hẹn homẹ Jehovah tọn hùn wẹ podọ ma nado dike Satani ni gbawhàn. To godo mẹ, mẹzizẹ lọ wá yì ganji matin hùndido. Dile etlẹ yindọ nuhahun agbasalilo tọn ṣie lẹ gbẹ́ zindonukọn, Jehovah nọ wleawu nuhe sin hudo mí do lẹ tọn na mí to whepoponu. Di apajlẹ, to opli agun tọn he mí basi to sẹfifo he jẹnukọnna azán he gbè yè mọ azọ̀n lọ na mi te ji, mí gbadopọnna hosọ lọ ‘Pipehẹ Nuhahun Gbẹ̀mẹ Tọn lẹ po Adọgbigbo Po.’c Hosọ ehe miọnhomẹna mí taun. Mí hia ẹ whlasusu. Hosọ mọnkọ lẹ gọna aṣa gbigbọmẹ tọn dagbe de tintindo ko zọ́n bọ yẹn po asu ṣie po tindo jijọho ahun mẹ tọn podọ yé ko sọ gọalọna mí nado hẹn jlẹkajininọ go bosọ basi nudide dagbe lẹ.”

DUDUTO OBU MÍTỌN LẸ JI

19. Etẹwẹ na jọ to madẹnmẹ?

¹⁹ Po alọgọ Jehovah tọn po, Klistiani lẹ lẹdo aihọn pé ko duto ninọmẹ he kàn dẹpẹ biọ lẹ ji bo ko sọ diọnukunsọ Lẹgba po kọdetọn dagbe po. (1 Pita 5:8, 9) E gán pà hiẹ lọsu. To madẹnmẹ, Jehovah na degbena Jesu po gandutọgbẹ́ etọn lẹ po “nado gbà azọ́n Lẹgba tọn lẹ.” (1 Joh. 3:8) Enẹgodo, omẹ Jiwheyẹwhe tọn he to sinsẹ̀n ẹn to aigba ji lẹ “ma na nọ dibuna nudepope, mọ nudepope ma na nọ dobuna” yé ba. (Isa. 54:14; Mika 4:4) Amọ́, kakajẹ whenẹnu, mí dona dovivẹnu sinsinyẹn nado nọ duto obu mítọn lẹ ji.

20. Etẹwẹ na gọalọna mí nado duto obu mítọn lẹ ji?

²⁰ Mí dona zindonukọn nado nọ hẹn nujikudo mítọn lodo dọ Jehovah yiwanna devizọnwatọ etọn lẹ bosọ nọ basi hihọ́na yé. E gán pà mí eyin mí nọ lẹnayihamẹpọn do lehe Jehovah ko basi hihọ́na devizọnwatọ etọn lẹ to hohowhenu do ji bosọ nọ dọho gandego. Podọ, mí gán hẹn lehe ewọ ko gọalọna dopodopo mítọn nado pehẹ ninọmẹ ayimajai tọn lẹ do dó ayiha mẹ. Po alọgọ Jehovah tọn po, mí gán duto obu mítọn lẹ ji!—Salm. 34:4