Kanbiọ Lẹ Sọn Wehiatọ Lẹ Dè

Whenue salmu-kantọ Davidi wlan to Salmu lẹ 61:8 mẹ dọ emi na pà oyín Jiwheyẹwhe tọn “kakadoi,” be hójlẹ wẹ e te ya kavi nuhe ma yọnbasi dọ wẹ e te?

Paali. Nuhe Davidi wlan yin nugbo bosọ yọnbasi.

Lẹnnupọndo nuhe Davidi wlan to wefọ enẹ po wefọ mọnkọ lẹ po mẹ ji, e dọmọ: “Yẹn na nọ jihàn pipà tọn lẹ do pà oyín towe kakadoi dile yẹn na to opà ṣie lẹ de egbesọegbesọ.” “Jehovah Jiwheyẹwhe ṣie E, yẹn na nọ pà we po ahun ṣie lẹpo po, bo nasọ nọ pagigona oyín towe kakadoi.” “Yẹn nasọ nọ pà oyín towe kakadoi podọ doidoi.”—Salm. 61:8; 86:12; 145:1, 2.

Whenue Davidi wlan hogbe ehelẹ, e ma to linlẹn dọ emi ma na kú gbede gba. E yọnẹn dọ Jehovah ko degbe dọ okú wẹ yin kọdetọn ylando tọn, podọ Davidi kẹalọyi dọ emi yin ylandonọ. (Jen. 3:3, 17-19; Salm. 51:4, 5) E mọnukunnujẹemẹ dọ etlẹ yin mẹdelẹ he Jiwheyẹwhe kẹalọyi taidi Ablaham, Isaki po Jakọbu po ko kú. Humọ, Davidi sọ yọnẹn dọ emilọsu na wá kú to gbèdopo. (Salm. 37:25; 39:4) Amọ́, hogbe etọn lẹ he to Salmu lẹ 61:8 mẹ do ojlo po gbemima etọn nado to Jiwheyẹwhe pà kakadoi po hia, enẹ wẹ nado to mọwà dile e na to ogbẹ̀ dẹnsọ.—2 Sam. 7:12.

To whedelẹnu, nuhe Davidi wlan delẹ nọ yin numimọ etọn titi, dile mí gán mọ do to nukinkan aga tọn Salmu lẹ 18tọ, 51tọ po 52tọ po tọn lẹ mẹ. To Salmu lẹ 23tọ mẹ, Davidi basi zẹẹmẹ Jehovah tọn taidi lẹngbọhọtọ de he nọ wleawuna anademẹ, kọfanamẹ po hihọ́ po. Lẹngbọhọtọ mọnkọ de wẹ Davidi yin. Podọ, ojlo etọn wẹ nado sẹ̀n Jiwheyẹwhe ‘to gbẹzan etọn lẹpo mẹ.’—Salm. 23:6.

Sọ hẹn do ayiha mẹ dọ Jehovah wẹ gbọdo Davidi nado wlan nuhe e wlan lẹpo. Nuhe e wlan lẹ bẹ dọdai nuhe na wá jọ to sọgodo lẹ tọn hẹn. Di apajlẹ, to Salmu lẹ 110tọ mẹ, Davidi dlẹnalọdo ojlẹ de whenue Oklunọ etọn na “sinai to adusilọ [Jiwheyẹwhe tọn] mẹ” to olọn mẹ bo na mọ aṣẹpipa daho yí. Nado wà etẹ? Nado gídí kẹntọ Jiwheyẹwhe tọn lẹ bosọ “hẹn whẹdida ṣẹ do akọta lẹ ji” to aigba ji. Davidi yin tọgbo Mẹsia lọ tọn, yèdọ mẹhe na dugán sọn olọn mẹ bo nasọ yin “yẹwhenọ de kakadoi.” (Salm. 110:1-6) Jesu dohia dọ emilẹ go wẹ dọdai he to Salmu lẹ 110tọ lọ mẹ gando, podọ e nasọ mọ hẹndi to sọgodo.—Mat. 22:41-45.

Mọwẹ, Davidi yin gbigbọdo nado wlanwe gando ojlẹ etọn po sọgodo po go, enẹ wẹ whenue e na yin finfọnsọnku bo na penugo nado yí ayajẹ do pà Jehovah kakadoi. Enẹwutu, Salmu lẹ 37:10, 11, 29 gán gando ojlẹ he mẹ e yin kinkan te po sọgodo po go. Podọ, wefọ ehelẹ mọ hẹndi to Islaeli hohowhenu tọn bo nasọ mọ hẹndi to sọgodo whenue Jiwheyẹwhe na hẹn opagbe etọn lẹpo di.—Pọ́n hukan 8tọ hosọ lọ “Hiẹ Na Tin Hẹ Mi to Paladisi Mẹ” tọn to zinjẹgbonu ehe mẹ.

Enẹwutu, Salmu lẹ 61:8 po wefọ mọnkọ devo lẹ po dohia dọ Davidi jlo na pagigona Jehovah to Islaeli hohowhenu tọn kakajẹ vivọnu gbẹzan etọn tọn. Podọ yé sọ do nuhe Davidi na wà to sọgodo hia whenue Jehovah na ko hẹn ẹn gọwá ogbẹ̀.