2023: ˈKle ˈjhe -zʋn: Dhɛwɛ- Biiblʋ a ˈtmʋn ˈdhe ɛɛˈ dɩ ˈdhi -ɛ?

ˈDhɩ -ɩan- nʋʋan ˈnɔn 2023 zʋn ˈdhi ɛ, ɩan toɛˈ -ka dhɩ -ɩanˈ ghwlu Biiblʋ cɛan ɩmɩn- -nɩn ˈo ɲnɩanˈ an “dhebhɔɔghwɩ-.” (2 Timothée 3:1) -Aʋ -ŋmʋn -ka dhɩ -ɩanˈ ghwlu Biiblʋ cɛan -e dhɩ -aa ˈjheaˈ ˈˈjhibhaˈ a nʋan -jie- dhueˈ -kpa sʋn ɛn.

Biiblʋ aˈ ˈtmʋʋndɩ -e dhɩ -ɩan- nʋʋan zɩanˈ -e

“Tʋ -e tʋ aˈ -manɩanˈ.”​—Matthieu 24:6.

• “Ɲʋn -nɩn tʋ -vɔanˈ ˈfɛ -duu ˈdhii da ˈbhlʋa ˈˈkpe.”a

“ˈBhlʋa ˈye trɛ ˈbhlʋɩ ˈdhii.”​—Marc 13:8.

• “-Ɛ tbha ˈdhe 2023 zʋn anˈ -dee ˈnan an, dhɛ ˈbhlʋa nʋan -trɛ sʋn ˈdhe ɔˈ ˈfɛ ɛˈ 13 bho ɛ, ɛ ˈse ˈan -nʋʋɛn- kpɔ dhueˈ .”b

“Dhɩ ˈbhleaˈ -faʋn anˈ ˈjheaˈ.”​—Luc 21:11.

• “ˈBhlʋa aˈ nɛnˈ -zɩɛ ɛˈ nɔnˈˈ ziˈ, ˈbhlʋa aˈ ˈˈplʋaˈˈ aˈ nɔnˈˈ -mɔn -ɔn jhi.”—Antonio Guteresɩ, ONI ɛˈ ˈˈdhrujhei- .c

“ˈMeɛn-.”​—Matthieu 24:7.

• “2023: -zʋn -dhee -ˈnʋʋn ɲʋn -ʋa- ˈjheaˈ ˈkle -wɛeˈ -ʋa- ˈˈɲɩanˈˈ ʋaˈ ˈˈgbuzɔncɛ dhiidhɩ ˈkpa ˈe ˈdhi.”d

“ˈKmʋn anˈ ˈˈɩkman- an muɛn -jieˈˈ -zi.”—2 Timothée 3:1.

• “ˈBho ɲʋn ˈˈmaan ˈɲnɩn ɛn, ɲɔn dhueˈ -ɔ ˈbhle ˈˈdhru ˈdhi ghwɛ.”e

Dhɛwɛ- -ɛɛ mʋn -nʋʋɛn- ˈdhe 2024 zʋn ˈdhi -ɛ?

Dhɛ -ɛɛ muan -nʋʋɛn- ˈˈklein ˈdhe 2024 zʋn ˈdhi -ɛ, ɲɔn ˈyeɛ jhibho- ɔ se -nɩn. ˈKlaa dhɩ -ɩan- nʋʋan ˈnɔn ˈkmʋn an toɛˈ -ka nɔnˈˈ -dhɛ ˈˈzaan sia ˈo Ɲɔnsoa aˈ ˈBheɔglɔ -aeˈˈ ɲʋnbhleglibha a muan ˈo ɲʋnbhleglibhɩ aˈ gɔˈ ɔˈˈ ˈˈsi ˈˈdhe ɔɔ muan dhɩ -ɩan- nʋɛn -wɛeˈ -glɔɲiɔn ɔn ˈyea ˈkle i -za.​—Daniel 2:44; Révélation 21:4.

-Da ɛɛˈ dhɛ tu ˈseaˈ ˈo ɲnin ke ɛ, -bho -aa sa zɔnˈ ˈˈdu ɛˈ, -a ˈˈbhii- ˈdhe Ɲɔnsoa bho ɔ ˈye -aʋ sʋn bho po. Dhɛ Biiblʋ ˈtmʋan ɛ ka:

“-Bho -faʋn an sa ˈʋn nʋn ɛnˈ, -mɔn ˈɩn de -gwlɩˈˈ.”​—Psaume 56:3.

-Kawɛ -a ˈbhɛɛ -a ˈyeɛ -to -ka -a dea Ɲɔnsoa -gwlɩˈˈ -ɛ? -Ka Biiblʋ ˈnaan-glɔɲiɔn ˈsea -sea- i ˈdhe ˈkmʋn anˈ ɲan an, -aa ˈdha aʋ ˈmɛn aʋ ˈye dhɩ -duuˈˈ i ˈŋwɔn ˈdhe ɛɛˈ dɩ ˈdhi . -Ka -a -nɩn ɲʋn an nʋan Biiblʋ ˈcɩan sʋn ɛn, ˈdɩn ɛnˈ nʋanˈ ɩn -wɛeˈ dhɩ -ɩanˈ ghwlu Biiblʋ cɛan, -ka mɔn -e -manˈ ˈˈgbuzɔncɛ ˈbhɛɛa aʋ ˈyɩ ˈjɛɛn ˈdhi ˈjhee- ɛ, -ˈyeɛ ˈjhe.