Anton Petrus/Moment via Getty Images
AƲ -DE ˈˈJHRIƐ I!
Bhlʋɩ aˈ klɛɛ ɛ muɛn bha tʋ bho -vɔn -ɔn?: Dhɛwɛ- Biiblʋ a ˈtmʋn ˈdhe ɛɛˈ dɩ ˈdhi -ɛ?
ˈBho ɲʋn anˈ -da -duuˈˈ -gwlɩˈˈ ɛ, ghwlu ˈi ˈŋwɔɛn- -nɩn ˈo ˈbhlʋɩ ˈɲnɩn ˈdhe zɩn anˈ 30 -ɩn zia ˈdhi. ˈKlaa, dhɩ -nʋʋan ˈnɔn -zɩn ˈbhɔɔa ˈbho nɩn ˈdhi a toɛˈ -ka dɩ ʋʋ ˈtmʋan ˈbhɛɛa ɩn ˈseaˈ tɔˈdɩ -nɩn in ɛn.
“Ɲʋn -nɩɛn- tʋ -a ˈkpaa ˈdhe Gaza aˈ -zɔnˈ ɔnˈ ˈˈduaˈˈ -mɛnˈ Israɛ -e Ɛzɩbola a pooɛ bha bi ˈdhe Liban -e Israɛ ɛˈ ˈˈduanˈˈ.”—Reuters, ˈˈCɛcʋ- 6 2024.
“Iran ˈbhleɛ ɲʋn -ʋa- vɔn ɲʋn bho dhɩ ˈmʋn in ˈˈdhe ˈbhlʋa -ˈnɔn ɔn ˈbɔn -kenɛnˈ ɔ ˈye bɔnbu nikleɛ ˈbhle. ˈBho -mɛnˈ ˈˈbun ɛn, Risi -e Sinɩn -nɩn Iran -nanˈ. -Ɩn -ˈnɩn anˈ klɛɛ -nɩɛn ˈkledɩ- -ˈnɩɩn ɛɛ jha ˈbhlʋɩ nɩan ˈe Elɔpʋ bho.”—The New York Times, ˈˈCɛcʋ- 7, 2024.
“Bi Risi a poa ˈdhe Ikrɛnɩn ɛn, ɩan kpa dhɩ ˈkɔɔɛ- ɲan.”—UN News, ˈˈCɛcʋ- 11, 2024.
“Dhɛ Sinɩn ɛnˈ ˈˈghwlii- a dia ˈˈɩ ˈˈdhe ɛɛ ˈsʋlɩˈˈ aˈ ˈˈɩkman- an ˈkpa ˈˈkpe ˈˈdhe ɲʋn ˈˈtiaˈˈ Taiwanɩn ʋaˈ ˈbhlʋa aˈ dɩkman an ˈkpa ˈˈkpe ˈˈdhe Sinɩn ɛnˈ ɲʋnbhleʋn -e Etazinɩn ɛn ɲʋnbhleʋn anˈ ˈŋwɔan ghwlu ˈi ɛ, ɛɛ toɛ -ka nɔnˈˈ ˈˈoo nɔnˈˈ ʋʋ ˈbhɛɛa ʋʋ ˈyea vɔn.”—The Japan Times, ˈˈCɛcʋ- 9, 2024.
-Glii- -ɩan ˈkpaa ˈbhlʋɩ ˈdhii -aa ˈjhea, dhɛwɛ- Biiblʋ a ˈtmʋn ˈdhe ɩanˈ dɩ ˈdhi -ɛ? Ɩn ˈye tʋ ˈbho ˈbhlʋɩ aˈ klɛɛ ˈɲnɩn po?
Dhɩ -ɩan nʋʋan ˈzɩan an, Biiblʋ -zaa dɩ ɲan ʋn ye ɩan dɩ ˈtmʋn
Biiblʋ ˈse dɩ ɲan -zaa ʋn ˈse ˈbhlʋɩ -ɩn ˈdhe ˈdhi tʋ a ˈkpaa ˈzɩan anˈ dɩ ˈtmʋn. ˈKlaa, ʋn -siiɛ nɔnˈˈ ɲan ʋn ye tʋ ˈnɛan in ˈnɔn -aaˈ nɔnˈˈ ˈdhi aˈ dɩ ˈtmʋn -ka dhɩ -ɩan- “za ˈflɛ da ˈbhlʋa ˈˈkpe” nɩan.—Révélation 6:4.
Daniel ɔˈ ˈsɛɛ -zɛɛ ɲan ɛ yeɛ ˈtmʋn -ka “ˈdhe dhebhɔɔ- -ghwɩ ˈdhi,” ˈbhlʋɩ ˈbhleaˈ ˈˈɩkman- ˈˈdhe -ɩan dooa i ˈyea bha “i ˈˈtuun-” -aeˈˈ ɩn ˈyea ɲʋn ˈbhleɛ ˈtʋnan- an. Dhɛ idooɛ- -ˈnɛn ɛn deea i -mɛn -nɩn ʋʋ ˈye tʋvɔndhɩ -klaeˈˈ aˈ ˈbhlea i ˈbɔn ˈˈdhe ʋʋ ˈye “ˈˈghwlii-” -aeˈˈ ˈghwɛiˈ -duuˈˈ ˈˈbun -za.—Daniel 11:40, 42, 43.
Tʋ nɩan -jieˈˈ
Biiblʋ a toɛˈ -ka ˈkmʋn anˈ ŋwɔn -kman an muan -jieˈˈ -zi -wɛeˈ dhɩ ˈyea -ta aˈˈ ˈkpa. Zezi -zɛɛ ɲan ɔ yeɛ ˈtmʋn -ka “ˈklejheɛ -klaaˈˈ a [muan] ˈkpaa- -ka ɛ ˈsea ˈkpa ˈdhue -ɛ ˈghwlʋa ˈe ˈkmʋn anˈ -dee -ˈnan an.” (Matthieu 24:21) “ˈKlejheɛ -klaaˈˈ” -ˈnɛn ɛn muɛn ˈo Aamagedɔn tʋ ˈˈkpe ˈbhɔɔ-. Tʋ -ˈnʋn ɛn, Biiblʋ ˈnaan ɛ nɩn “Ɲɔnsoa ˈbhleaˈ ˈˈɩkman- anˈ klɛɛ ɛˈ -zɔn -klaaˈ aˈ tʋ.”—Révélation 16:14, 16.
ˈKlaa, Aamagedɔn ɔn muɛn ɲʋn ˈpʋʋ-, ɛ ˈse ɲʋn in -za i. Ɲɔnsoa a muɛn tʋ -ˈnʋn i jhii- ɔ ˈye -glɔɲiɔn ɔnˈ ɲʋnbhleɛ -ɛɛ za tʋ ˈˈbhlo i -za. -Ka Aamagedɔn ˈyea ˈflɛ -jha sʋn nʋn -bho -ˈyeɛ jhibho- ɛˈ, -mɛnˈ zro ˈcɩaandhɩ- nɩn: