Ɲʋn anˈ -da -duuˈˈ ˈplʋ a nʋan an, dhɛwɛ- ʋʋ ˈye nʋn -ɛ ˈyʋbʋ sʋn bho po -ɛ?

• “Ɲʋnjɛʋn- anˈ -da -duuˈˈ nɩan ˈe Meikɩ bhlʋaˈ ˈnaan dhɛ ʋʋ nɩan dhueˈ ɛɛˈ dɩ ɛ, ɛɛ nʋɛn ˈplʋ a yʋbʋ nʋn. Ɲʋnjhae aˈ -da -duuˈˈ ˈplʋ a nʋn -ɛ zi ˈo dhi”—Our Epidemic of Loneliness and Isolation: The U.S. Surgeon General’s Advisory on the Healing Effects of Social Connection and Community, 2023 [Notre épidémie de solitude et d’isolement : Rapport du ministère américain de la Santé sur les bienfaits du lien social et de l’entourage, 2023]).

• “Organisation mondiale de la sante poɛ -glibha dhueˈ kpɔ ɔˈˈ -ɔ ˈyeɛ nʋn -wɛeˈ ɲʋn ˈye bha i ˈkpaa-. Ɔ ˈye ɲʋn sʋn bho po ʋʋ ˈyeɛ i ˈŋwɔn -ka ˈplʋ ˈbhɛɛa ɛ ˈyea ɲʋn ˈghwɛ po ɛ. ˈBho -mɛnˈ ˈdhe ɛ, ɔ ˈyeɛ nʋn ɲʋn ˈye ɲʋn -ˈnʋʋn anˈ dɩ ˈˈduɛ- ɲan -kɔɔn ˈdhe ʋaˈ ˈkmʋn ˈdhi. -Glibha -ˈnɔn ˈye ˈˈjhriɛ ˈˈɩ -de -wɛeˈ dɩ ɔ za ˈo -ˈnɩn ɛn, ɲʋn ˈyɩ ˈˈjhriɛˈˈ ˈˈdu ˈbhlʋɩ aˈ klɛɛ ˈdhi i -bho ˈbhlʋɩ -ˈnɩn ˈbhle ˈˈghwlii -aeˈˈ ɩn se dhɛ ˈbhle -mɔnˈ -de ɛˈ.”​—OMS, 15 novembre 2023.

Biiblʋ a toɛ ˈo ˈsrɩn -ɩn ˈbhɛɛ -ɩn ˈye ɲʋn sʋn bho po ʋʋ ˈye ˈdhaiˈˈ -ˈˈwe ˈbhle.

ˈSrɩn ˈsɔɔn ˈghwlʋa ˈe Biiblʋ ˈdhi ɛ

Dhɩ ˈbhɛa -ɩn ˈyeɛ nʋn -wɛeˈ ˈyea -manˈ ˈˈjɛ ˈfɔ bho po ɛ, cɩn ˈˈkpe. Ɩanˈ kpɔ dhueˈ -mɛn -nɩn, ˈˈnɔn -duuˈˈ -nʋʋɛn ˈbho ɛntɛɛnɛtɩ ˈˈkpe. ˈBho -ˈmɛn ɛnˈ ˈgɔ ɔˈˈ ɔ, dhɩ ˈbhɛɛa ˈyea nʋn -wɛeˈ -nɩn ɲʋn ˈyea ˈjhee ɛ, ɩmɩn- -ˈye nʋn. -Bho nʋɛn ɛnˈ, -man muɛn ˈdhaiˈˈ -ˈˈwe jɛʋn ˈbhle-.

• Biiblʋ aˈ ˈsrɩn: “Dhaiˈˈ ˈdhɔɛe ɔɔ kman ɲʋn anˈ dɩ nɔnˈˈ ooˈˈ nɔnˈˈ, ˈˈdhe ɛ nɩn ˈdhoudhi -ɔ ˈghwlʋ nɔnˈˈ -saʋn ɔnˈ dɩ.”—Proverbes 17:17.

ˈˈBon ɲʋn -ˈnʋʋn anˈ sʋn bho poaˈ i. -Bho -aa sa ɲʋn -ˈnʋʋn dhɛjɛɛn ˈˈdhrui nʋn ɛnˈ, jhbhɛɛ- nɩan ˈbho -a ˈɲnɩn ɛn kuɛ i, ˈbho -mɛnˈ ˈdhe ɛ, ɛɛ poɛ -aaˈ ˈˈjɛ ˈmʋnan inˈ.

• Biiblʋ aˈ ˈsrɩn: “ˈMʋnan ɲɔn ɔn ˈjhea ˈbho ɲɔn ɔnˈ dhɛ ˈˈɲɩanˈ -diɛˈˈ ɛ ye -jɛn ɲɔn ɔn ˈjhea -bho ɲɔn ˈˈɲɩʋn- dhɛ -zii.”​—Acts 20:35.

Mun ˈo -aaˈ ɛntɛɛnɛtɩ aˈ -deɩn ˈˈkpe -wɛeˈ Biiblʋ aˈ ˈsrɩn -ɩan- ˈtmʋan dhaiˈˈ dhɛ ɛˈ dɩ -ˈyɩ ˈjhe.