ˈKledɩ- pluˈ a za ˈˈbhlo ɩan ˈkpa ˈˈkpe: Dhɛ Biiblʋ a ˈtmʋn an

Ɛ ˈse ˈo -gwle dhɛ ɲʋn dea ˈˈjhriɛ ˈˈkpe ˈbhlʋɩ aˈ klɛɛ ˈdhii -mɛn -nɩn,a ˈbho ɲʋn ɲiɛn ˈˈkpe ɛ, ɲɔn dhueˈ pluˈ a nʋn.

• “Ɲɔn ooˈˈ ɲɔn, -ka ɔɔˈ zɩn ˈjhe ɩn -dɩ, -da ɔ ˈjhe ɔ -nɩn -mɔnˈ -dhe ɛˈ, pluˈ ˈbhɛɛ ʋn ˈyeɔ nʋn -ka ɔɔˈ nɩan dhueˈ ɔɔˈ -dea i ɛ.”—Chido Mpemba, co-présidente de la Commission de l’Organisation mondiale de la santé sur le lien social.

ˈBho ɲʋn anˈ -da -duuˈˈ -gwlɩˈˈ ɛ, ɛ nɩn gɩlɩˈˈ -e ɲʋn nɩan dhueˈ -ʋʋ dea i ʋaˈ ˈsʋ -mɔn pluˈ a nʋn. ˈKlaa pluˈ ˈbhɛɛˈ ʋn ˈye ɲʋnjhae- -e ɲʋn flɔan kuizɔin -e ɲʋn -an ˈkpa dhɛ -e ɲʋn -nɩn ɲɔn ˈˈtiia ˈˈbhli nʋn. -Bho ɲɔn -nɩn ɲʋn -nʋʋn anˈ ˈkpa -dadhueˈ -e pluˈ aˈ ɲʋn -nʋɛn ˈbhɛɛˈ ɛ ˈye ɲɔn ˈghwɛ po ˈˈdhe ɛ ˈye ɲɔn ˈˈzruaˈˈ ˈˈbun ˈˈdu.

• “Ɛ se zruaˈ aˈ ˈsʋ pluˈ a jha ɲʋn bho -nɩn,” ˈkamɔn- Dr. Vivek Murthy -ɔ nɩan Etazinin anˈ dɔsrɔ -ˈˈwe aˈ ˈˈdhrujhei ˈdha. Ɔ de ˈo ɔ ˈnaan: “-Ka siklai -kpai- aˈ 15 anˈ ˈnan ˈdhe zɔn ˈdhi ɛɛ nʋan ɲʋn ˈdhbha sʋn ɛn, ˈkamɔn- -bho ɲʋn anˈ dɩ se ɲɔn ɔnˈ dɩˈ -nɩn ɛnˈ, ɛ ˈbhɛɛˈ ɛ ˈyeɔ ˈdhbha -ke.”

Dhɛ Biiblʋ a ˈtmʋn an

-Aaˈ Nʋin- ˈse ˈbɔn -a ˈye -aaˈ ˈˈjɛ ˈfɔ bho po. Dhɛ Ɲɔnsoa a ˈbɔan see -mɛn -nɩn -glɔɲiɔn ˈye ˈdhaidhɛ ˈdhɔɛeˈ -ɛɛ bhlua ɲɔn ɔnˈ -pɛɛ ˈmʋnanˈ ˈdhi ˈjhee-.

• Biiblʋ aˈ ˈsrɩn: “Ɲɔnsoa ˈnaan: ‘Ɛ se ˈo dhi -nmɔn ɲiɔn ˈye dhueˈ -nɩn.’”—Genèse 2:18.

Ɲɔnsoa a ˈbɔn -jhbhɛɛ ˈye ˈbho ɔmɔn- -e -abʋ ˈɲnɩn -nɩn. Ɔ cɛn ghwlu ɔ ˈnaan ɔɔ muɛn -aʋ i ˈkpaa- -bho -aa sa ˈe ˈkpɩ po -aa sɔ i ˈkpaa aˈ.—Jacques 4:8.

• Biiblʋ aˈ ˈsrɩn: “Ɲʋn -ʋʋ jhibhi -ka ʋʋ sea dhɛ jhibho- ˈdhe Ɲɔnsoa ˈˈjhri ˈdhe ɛ, ʋʋ -nmɔnˈˈ, dhɛ nɩan ˈo ɛ, ʋbʋ -kɔn ˈBheɔglɔ- nɩan ˈe jhaun ˈdhi.”—Matthieu 5:3.

Ɲɔnsoa a ˈbɔn -a -nɩn ɲʋn -ˈnʋʋn ˈye -dadhueˈ ˈkpa -a ˈyeɔ ˈˈɲɩn. -Bho -aa sɛ nʋn ɛnˈ ɛɛ poɛ -aʋ sʋn bho -aa yea ˈmʋnain -nɩn.

• Biiblʋ aˈ ˈsrɩn: “-A ˈˈdu bha aˈ dɩ dhueˈ dhueˈ -wɛeˈ -a ˈye bha ˈkpɩ po ˈbho ɲʋndɩkman -e dhɩ ˈjɛɩn anˈ nʋanˈ, -aaˈ ˈbhɔ -e -aaˈ ˈˈdhruigbooɛ ˈbho -dhe, [...] ˈklaa -a po bha ˈkpɩ dhueˈ dhueˈ -ka -aa ˈjhea -zɔn -ˈnɔn ɔn ˈˈkʋaan in ɛn..”—Hébreux 10:24, 25.

Dhɛɛdɩ- ɛ -kɔandɩ -a ˈyea pluˈ bho vɔn ɛn, -bho ˈye dhɩ -duuˈˈ i ˈŋwɔn ˈdhe ɛɛˈ dɩ ˈdhi ɛˈ, zro ˈcɩaandhɛ- “La solitude à l’ère de la communication” ˈdhii.