Täräkwata ni nübaikrä Jesukwe ja nire biani ni ütiäre Ngwankäre Törö jai
1. ¿Nitre Gobran Ngöbökwe kukwei driekä käkwe dre nuaindi köbö 21 marzo yete ja känenkäre aune ñobätä nuaindi kwetre?
1 Jueves 9 abril kä 2009 yete, kä jökräbiti tibien nitre Jehová mikaka täte käkwe ja ükaikrö töbikakäre ni kä nebätä tare kri bämikani tuare yebätä (Rom. 5:6-8). Jesukwe ja nire biani ni ütiäre nikwe Ngwainta Törö jai ye ngwane, nitre kwati krubäte tö kukwe Ngöbökwe mikai gare jai käkwe ja ükaikrö nibe. Yekäre köbö 21 marzo yete ja känenkäre täräkwata döräidi kä jökräbiti tibien ni nübaikrä kukwe ye ngwankäre törö jai.
2. ¿Täräkwata ni nübaikrä ye driedre aune dre ngwandre törö jai?
2 Kukwe ngwandre törö jai. Jondron üai bämikani, kukwe ngwantarita bätä texto mikani täräkwata ni nübaikrä yebätä ni raba blite. Ñodre, jondron bämikani kena täräkwata yebätä ye ni raba mike tuare biti niedre: “Tita mä nübaire Kristo ja nire biani ni ütiäre ye ngwankäre törö jai nunbe, ye rabai bare jueves 9 abril kä 2009 yete”. Ye bitikäre, kukwe tikani kena bätä kukwe ngwantarita täräkwata ni nübaikrä yebätä ñäkädre. Mäkwe mika gare nitre nünanka gwi ye ie, raba mräkätre kwe bätä nitre mada ye nübaire ja mukore ye näire arato.
3. ¿Nitre nübaidre ye bitikäre ni raba dre nuainne mada?
3 Konkrekasion nikwe ye käi ere kukwe driekäre angwane, nitre umbre raba täräkwata ye mikatemana ni ñaka gwi ye gwirete. Bämän krüte yebätä täräkwata La Atalaya bätä ¡Despertad! ye drie raba täräkwata ni nübaikrä yebe. Nitre tuabitita mäkwe, nitre ja tötikaka Bibliabätä mäbe, mä mräkätre, nitre nänkä kwelate mäbe, sribimuko, nitre nünanka mä ken bätä nitre mada gare mäi ye mäkwe ja töimika nübaire jökrä. Kä känente, ja ngwai merire iti käkwe mräkätre kwe 30 nübaibare aune gätä ye ütiäte krubäte nämene ngwen törö ietre. Mräkätre kwe 25 janamene gätä yebätä, ¡ye käi namani juto krubäte niarabätä! Ye bitikäre, 4 käkwe ja tötika Bibliabätä ye kani ngäbiti.
4. ¿Drekäre nikwe köbö ükadrete biare jai aune ñobätä?
4 Ja ükadrete biare. Nitre kukwe driekä kwati raba kukwe driere bäri sö marzo bätä abril yebätä. Monso tärä mäkwe o ni ja tötikaka Bibliabätä mäbe abokän tä nirien kukwe ja üairebiti, jämi ja ngökö ñöte raba ja mike kukwe driekä sö yebätä. Jehová bätä Jesukwe ni tare bäri krubäte ni jökräbiti ta ye bämikani tuare kwetre. Ye ngwankäre törö jai, ni raba köbö ükete biare jai ne kwe nikwe kä diandrekä bäri jai nitre nübaikäre (Juan 3:16; 15:13).