Kukwe drieta ji ngrabare ye kwin krubäte
1. ¿Jesús erere nikwe ja töi mikadre ño?
1 Jesús nükani kä tibienbätä ye ngwane nämene kukwe driere ji ngrabare aune nitre nämene kwati yekänti (Luc. 9:57-61; Juan 4:7). Niara tö namani kukwe ütiäte ye mikai gare ni kwati ie. Kä nengwane, kukwe drieta ji ngrabare ye köböire ni raba nitre mada dimike kukwe Ngöbökwe ye mike gare jai (Pro. 1:20). Sribi ye rabadre bare kwin nie yekäre nikwe ja töi mikadre nuainne käne aune töbikadre kwin nuainkäre.
2. ¿Ñobätä ja töi mikadre käne kukwe driekäre ji ngrabare?
2 Ja töi mike nuainne käne. Ni ñaka rabadre kwekebe nünaninkä o täkäni tibien kä keteitibe känti nitre ngübare nüke jakänti, ñakare aune ni rikadre blite bentre ye bäri kwin. Kä mikadre kötare ja ngwärebätä, nitre mikadre ñärärä, blitadre töi jämebiti aune kä jutobiti bentre. Ni kukwe driekä mada tädre näin mäbe angwane, rikadre blite ni madabe ye bäri kwin. Ni mada töi mikakäre kukwe Ngöbökwe yebätä, yekäre nikwe ja töi mikadre käne dimikabätä. Blitadre ünä ben angwane, ñongwane mä raba blite bäri ben ye mäkwe ngwantari ie. Ji kratibe yekänti nitre kukwe driekä ruäre tätre niken kukwe driere, ye köböire tätre blite bati bobu nitre ye arabe ben aune tätre nitre ye töi mike kukwe Ngöbö yebätä.
3. ¿Nikwe töbikadre ño kwin kukwe driekäre ji ngrabare?
3 Töbikadre kwin. Medente aune nire ie mä törba kukwe driei yebätä mäkwe töbika kwin käne. Ni itire itire rikadre ni bäre ta ie kukwe driedre ye ñan ai ribeta nie. Nitre mikadre ñärärä. Ñodre, nitre rikadre jura ye ngwane mikadre näin jerekäbe ta. Mä tädre kukwe driere jondron rürübäinta ye ken angwane, mäkwe töbika kwin nuainkäre, ne kwe sribi bäkänkä ye ñaka töbikadre blo mäbätä. Nitre tä niken käteri jondron kökö ye ngwane ñaka blitadre bentre, ñakare aune jatadreta jubäre ye ngwane blitadre bentre. Mä rikadre jäme nitre kokwäre ne kwe kä jürä ñaka rabadrebätä. Arato, ñongwane tärä drie raba yebätä töbikadre kwin käne. Ni iti ñaka törbadre kukwe mikai gare jai angwane, mä raba täräkwata kia ye bien kati ie.
4. ¿Ñobätä kukwe driedre ji ngrabare ye kwin krubäte?
4 Kukwe drieta ji ngrabare ye köböire ni raba kukwe metre ye mike gare ni kwati ie (Ecl. 11:6). Nita niken kukwe driere ju ju te ye ngwane nitre ruäre ñaka tä kwen gwi nie ye raba kwen ji ngrabare nie. Kukwe driedre ji ngrabare ye kwin krubäte aune ye köböire kukwe kwin tä nemen bare, aisete, ¿ñobätä mä ñan köbö ükete jai nuainkäre?