Kukwe ngwantarita

◼ Ni brare kukwe driedre kaibe meri ie o meri kukwe driedre kaibe ni brare ie, aune kukwe driedre kaibe ja ngwai ben ye ngwane, ¿ja ngübadrebiti ño?

Gare kwin nie kukwe keta kabrebätä ja mräkätre aune ja ngwaitre töita kwatibe ja ngwankäre kwin. Akwa, nitre blo aune ni mada tuanmetreta kukwe blo nuainne ye ngätäite nita nüne, ja ngwandre kwin ye ñaka ütiäte kräketre. Ni töita kukwe kwin ye aibe nuainbätä, akwa käre nikwe ja ngwandre mokre ne kwe ni mada ñaka ni kädriedre blo aune nikwe ñaka kukwe blo nuaindre. Ne tä mike gare nie ni tädre kukwe driere ye ngwane nikwe ja ngübadrebiti kwin.

Kukwe drieta ye ngwane käre ja mräkä ie meri tä kwen gwi o ja ngwai ie ni brare tä kwen gwi ye töta nemen kukwe metre mikai gare jai. Ni tädre kukwe driere kaibe aune ni mada ñaka tädre gwi ni yebe angwane, bäri kwin blitadre jukwebätä ben aune ni ñaka rikadre käteri. Törbadre kukwe mikai gare jai angwane, ni rikadre tuinbitita ni kukwe driekä madabe o ni mada tädre ben gwi ye ngwane ni rikadre tuinbitita. Ñaka rabadre nuäre nuaindre ye erere nie angwane, bäri kwin ni gwi ye brare ngwane ja mräkä rikadre tuinbiti o meri ngwane meri rikadre tuinbiti. Ni rikadre ja ngwai ben o ja ngwai rikadre ja mräkä ben ni mada tötike Bibliabätä ye ngwane kukwe ne ngwandre törö jai. (Mat. 10:16.)

Ni törbadre nire ngwain kukwe driere jabe ye känenkri töbikadre kwin käne. Ni tädre näin kabre jabe ye ngwane ruäre ngwane ja mräkä raba kukwe driere ja ngwai ben aune ja ngwai raba kukwe driere ja mräkä ben. Ja ngwai ye ñaka ni muko o ja mräkä ye ñaka ja ngwai muko angwane bäri kwin ñaka tädre raire kä kaibe känti jabe aune rikadre kukwe driere ye ngwane ñaka rikadre kaibe jabe. Yebätä, ja mräkä tä nitre braibe kukwe driekä jie ngwen yekwe töbikadre kwin käne ja mräkätre aune monsotre ñäkäbitikäre kukwe driere.

Nikwe ja ngwain kwin kä jökrä ngwane ye köböire “ni mda mdakwe ñan ñäkädre blo”, nibätä o ja mräkätre mada yebätä. (2 Cor. 6:3, Kukwe Kuin Ngöbökwe.)