Kukwe nemen bare metre

◼ Australia. John, ni ja tötikabare krubäte, nämene chi ye ngwane nämene niken iglesiate; akwa ja känenkäre töi namani, “ni kräke Ngöbö ñaka jire” ye erere. Bati, prekursor iti käkwe täräkwata ¿Es la vida obra de un Creador? biani ie, aune köbö mada ngwane, täräkwata El origen de la vida ye biani kwe ie. Törbadre kukwe mikai gare bäri jai yekäre, prekursor ye nämene niken täräkwata Ni Mikaka Mokre bätä ¡Despertad! ye ngwena sö kratire kratire kräke aune jondron sribebare o kukwe rabai bare niebare Bibliabätä kädrie nämene täräkwata yebätä ye ngwane nämene blitebätä ben. Tärä La Biblia... ¿la Palabra de Dios, o palabra del hombre? ye mikadrete kwe ie namani tuin ie angwane, biani kwe ie. John ñäkäbare tärä yebätä, ye bitikäre töi jatani ni “agnóstico moderado” (ni ie Ngöbö tärä o ñakare ye ñaka gare metre) ye erere niebare kwe. Ye bitikäre, prekursor yekwe tärä Dre drieta página 20 párrafo 8 ye mikani tuadre ie, biti Dre drieta páginas 23 aune 24 párrafos 13 nemen 16 yebätä blitabare kwe ben. Texto Bibliabätä tä mikani yete ye namani tuin kwin krubäte John ie, yebätä niebare kwe: “Ti rabadre kukwe Bibliabätä mike gare bobukäre jai raba ruin tie”.

◼ México. Biblia ye Ngöbö Kukwei metre nieta ye ñaka nämene tuin era ni iti ie niebare kwe ni kukwe driekä iti ie. Biblia ye kite metre Ngöbökri ye ni kukwe driekä ye raba mike gare kukwe ruärebiti ni yei niebare kwe ie, aune namani debe ni ye kräke. Ni kukwe driekä yekwe blitabare bä kabre ni yebe, aune ni ye nämene ñäke Bibliabätä ye jatani mate brukwäte. Aune ja ngwandre kwin yebätä Biblia tä dre niere namani gare ie yekwe töi mikani ñan krütare. Niara niebare ni kukwe driekä ie: “Kena ni nämä ñäke Bibliabätä angwane kukwe ye dianinkä tärä ngwarbebätä nämä ruin tie aune ti ñaka nämä mike tuin ütiäte jai. Akwa nengwane, batire batire nita ñäke Bibliabätä, metrere ja ngwandre kwin yebätä tä dre niere yebätä nita ñäke angwane, ti töi nemen ti nike”.

◼ Estados Unidos. Kukwe ükaninte mrä kukwe driekäre jutate ye erere ja mräkä iti aune muko kwe nämene nuainne ye ngwane, meri iti nünanka Taiwán Ngöbö mikaka era jai akwa Biblia ye nitre nünanka nindrini kräke nämene nütüre ye nükani jondron tärä mikara tuadre yekänti. Akwa yebiti ta, Biblia niara dimikadre nüne kwin ie nämene tö ngwen, ñobätä ñan aune jondron nämene ere kwe, akwa ja nämene ruin ngwarbe ie bätä ulire. Ja mräkä aune muko kwe ye jatani tötike tärä Dre drieta aune täräkwata Cómo hallar paz y felicidad duraderas yebätä. Ñaka tötikani kwetre tärä Dre drieta kapitulo 2 yebätä, ñakare aune täräkwatabätä sección kädekata, “Una guía para toda la humanidad” yebätä tötikani kwetre. Sección yekänti párrafo 1 nemen 6 yebätä ñäkäbare meri yekwe angwane, töi namani ñan krütare yebätä niebare kwe, Biblia ye ñaka tärä sribeta nitre kukwebätä yekwe ye erere. Kukwe rabadre bare niebare Bibliabätä namanina bare yebätä tötikani angwane, niebare kwe: “¡Tärä mada ñaka kukwe mike gare metre Biblia ye erere raba ruin tie!”.

◼ Japón. Ni iti ñaka Ngöbö mike era jai yebe ni kukwe driekä iti blitabare. Akwa, jankunu ja mräkä ye nämene niken tuinbiti jötrö täräkwata ¡Despertad! yebätä kukwe kädrieta jatäri kädekata, “¿Casualidad o diseño?”, ye mikakäre tuadre ie. Bätärekä jatäri, ni ye jatani ja töi kwite aune Ni ni Sribekä tärä ye jatani tuin metre ie. Kä nengwane Ngöbö tärä ye metre kräke, aune ni kukwe driekä ye tä tötike täräkwata Ngöböta kukwe kwin mike gare nie yebätä.

◼ Canadá. Meri iti gwi nikani mentokwäre jämi niken karo kwe yete ye känenkri meri Testiko iti käkwe täräkwata Ni Mikaka Mokre bätä ¡Despertad! biani ie ye kani ngäbiti kwe. Köbö mada ngwane, meri Testiko ye nikaninta meri ye känti angwane, ñaka tö namani kukwe mikai gare jai ñobätä ñan aune ñaka nämene Ngöbö mike era jai niebare kwe metre ie. Meri Testiko yekwe ñaka ja di ngwani nekä aune ja töi mikani kwe niken täräkwata Cómo lograr una vida llena de satisfacción ye ngwena kräke. Nikaninta meri ye känti angwane, meri ye ñaka nämene Ngöbö mike era jai namanina gare ie, akwa nämene monso kwe ngübare kaibe yebätä tö namani dimikai niebare kwe ie. Käne página 4 yebätä párrafo 6 ye mikani tuare kwe ie, yekänti nieta kukwe kwin ni dimikakäre ye ñaka nemen nuäre kwandre nie. Biti kukwe nieta parte 2 yebätä ñäkädre kwe niebare kwe ie, yekänti monsotre ngübadre ño ye mikata gare. Meri yekwe täräkwata ye kani ngäbiti kä jutobiti.