¿Tärä o täräkwata meden raba nitre ñaka Ngöbö o Biblia mike era jai ye dimike?
1. ¿Ñobätä nitre ruäre ñaka töi raba nemen ja tötike tärä Dre drieta yebätä?
1 Nitre rabadre Ngöbö mike täte yekäre dre drieta Bibliakwe ye rabadre mike gare jai. Akwa, nitre ruäre ñaka kristiano yei Biblia ye Ngöbö Kukwei nieta ye ngwane ñaka nemen tuin metre ietre. Nitre mada abokän ñaka Biblia aune Ngöbö mike era jai. Nitre ye töi ñaka raba nemen ja tötike tärä Dre drieta yebätä. Akwa, ¿tärä o täräkwata meden nitre ye erere dimikanina? Nitre kukwe driekä juta gre känti käkwe ni mada dimikanina ño niebare kwetre ye erere ni raba nuainne ño ye mikata gare ja känenkäre.
2. Ni iti ñaka Ngöbö mike era jai niedre kwe nie angwane, ¿dre mikadre gare jai, aune ñobätä?
2 Nitre ñaka Ngöbö mike era jai. Ni iti ñaka Ngöbö mike era jai niedre kwe nie angwane, ñobätä töita ye erere ye nikwe mikadre gare jai. ¿Jondron nire jatani nikwite jatäri nieta yekri tä ja mike? ¿Kukwe käme nuainta ni madabätä o nitre iglesiate ja bämike jerekäbe Ngöbö mike täte tuin ie yebätä ñaka niena tödeke? ¿Nitre kräke Ngöbö ñaka ye käite nämene nüne yebätä? ¿Ni ye töi ñaka jire Ngöbö mikabätä era jai? Nitre kukwe driekä kwati tä kukwe ne ngwentari ni ye erere ie, “¿Käre mätä töbike ye erere?”, ye ngwane töita ño ye tä niere. Ütiäte krubäte nikwe ni ye kukwe nuadre aune ñaka blitadre kukweite ta, ñobätä ñan aune ni raba dimike ño rabadre gare nie yekäre, ñobätä ñaka Ngöbö mike era jai ye nikwe mikadre nüke gare käne jai. Ye köböire nikwe dre niedre aune tärä o täräkwata meden driedre ie ye rabai gare nie (Prov. 18:13).
3. ¿Nitre aune kukwe mikata täte kwetre ye nita mike tuin ño ütiäte jai?
3 Mäkwe blitadre ni ye erere ben angwane, dre niedre kwe ye mäkwe mika tuin ütiäte jai. Juta Estados Unidos yete kukwe ne mikani gare nunye: “Ni itire itire tä kukwe meden den mikadre täte jai ye mikadre tuin ütiäte jai. Nitre ben nita blite ye ñaka tä kukwe metre niere ye nikwe ñaka niedre ie, ñakare aune bäri kwin kukwe ngwandretari ie mikakäre töbike kukwe yebätä aune kukwe ye metre o ñakare ye rükadre gare akwle ie”. Ye erere ni ni tuabitikä iti tä nuainne. Tä ni mada tuenmetre blite ye bitikäre, tä kukwe ne ngwentari ie: “¿Ruäre ngwane mä tärä töbike kukwe mada nebätä?”. Ye bitikäre tä blite jankunu.
4. ¿Nikwe kukwe driedre ni budista ie ye ngwane dre ngwandre törö jai?
4 Ngöbö tärä nieta ye ñaka metre nitre budista kwati kräke. Ni ye erere ben nitre kukwe driekä ruäre Gran Bretaña tä blite angwane, tätre täräkwata Cómo hallar paz y felicidad duraderas yebiti kukwe driere ie ye köböire kukwe kwin tä nemen kwetre. Kukwe kädrieta kena ye ruärebätä tätre blite ni yebe, ye bitikäre sección kädekata, “¿Existe un Creador todopoderoso?” yebätä tätre blite ben. Köbö mada ngwane, tätre sección kädekata “Una guía para toda la humanidad” ye kädriere ben. Aune ye bitikäre, niaratre raba nuainne angwane, tätre ni yei kukwe ne niere tärä Dre drieta ye driekäre ie: “Mä ñaka Ngöbö mike era jai, akwa mäkwe ja tötikadre Bibliabätä yekwe mä dimikai, ñobätä ñan aune kukwe kwin nietabätä mäträkäre nibätä”. Juta Estados Unidos yekänti prekursor iti tä kukwe driere nitre chino ie käkwe niebare: “Nunta kukwe driere nitre ie ye tö ñäkäbätä täräbätä, yebätä nunta tärä o täräkwata mikete ietre biti nunta nikenta tuinbiti angwane, nemena ñäke jökräbätä. Akwa nitre ye kwati ie ñokäre ni mada tötikata Bibliabätä ye ñaka nüke gare. Yebätä tita niken kena niaratre känti ye ngwane, tita täräkwata Kukwe kwin ye mikete ietre, ye sribebare blitakäre ni madabe”. Ja mräkä konkrekasion chino tuabitikä juta Estados Unidos yekänti tä niere, nitre tuabitita kena ye ngwane ni raba tärä Dre drieta ye driere ietre arato. Akwa, kapitulo 1 tä blite Ngöböbätä ye kädrie ñaka raba bentre, ñakare aune bäri kwin kapitulo 2 yebätä blitadre bentre, yekänti blitata Biblia yebätä.
5. ¿Ñobätä ni rabadre ni mada ngübarebätä bätärekä?
5 Ni ñaka tä tödeke bengwairebe Ngöböi, yebätä nikwe ni mada ngübadrebätä bätärekä. Nikwe blitai batibe ni madabe ye ñan aibe köböire Ni ni Sribekä tärä ye rükai gare ie. Akwa nikwe tuaibiti bä kabre angwane, Ngöbö tärä ye raba nemen tuin metre ie aune ñobätä nitre mada tä Ngöbö mike era jai ye raba nüke gare ie.
6. ¿Kukwe medenbätä nitre ruäre ñaka töta nemen kukwe Bibliabätä mikai gare jai?
6 Nitre ie Biblia ñaka tuin ütiäte o ñaka mike era jai. Nitre Ngöbö mike era jai yebe käre nita blite akwa Biblia kite Ngöbökri ye ñaka tä mike era jai, yebätä kukwe mikata garebätä ye ñaka ütiäte kräketre. Juta ruäre te nitre jökrä bäsi ñaka kristiano yekänti kukwe ye tä nemen bare aune Biblia ye nitre iglesiate ja bianka kristiano yekwe nieta kwetre. Juta ruäre te nitre tä ja bien kristiano yekänti kukwe ye erere tä nemen bare arato, kä yekänti nitre ie Biblia ñaka niena tuin ütiäte. ¿Nikwe dre nuaindre ne kwe Biblia ye rabadre tuin ütiäte nitre yei aune rabadre ja tötike tärä Dre drieta yebätä?
7. ¿Dre nuaindre nitre töi mikakäre Biblia mike tuin ütiäte jai?
7 Sukursal juta Grecia yekänti tärä tikani abokänbätä niebare: “Nitre ie Biblia ñaka tuin ütiäte yei Biblia mikadre tuare aune dre nietabätä ye mikadre gare ietre dimikakäre. Nitre kukwe driekä kwati ie tä nemen gare, niaratre kukwe niedre ye ñaka ai käkwe nitre dimikadre, ñakare aune kukwe nieta Bibliabätä ye nemen mate bäri nitre brukwäte (Heb. 4:12). Ngöbö kä tä tikani Bibliabätä ye mikata tuare nitre ie angwane nitre kwati töta nemen kukwe mikai gare jai”. Sukursal juta India yete kukwe ne tikani: “Biblia tä kukwe meden niere gata aune ja nire yebätä ye nemen tuin kwin krubäte nitre hindú ie. Ni mada mikata tuin ngwarbe jai ñaka rabaira käbämikata Ngöbökwe abokän mikata gare ietre ye nemen tuin kwin ietre”. Kukwe meden tä nitre mike töbike yebätä nitre kukwe driekä tä blite bentre angwane, ye köböire tätre Biblia ye mike tuare ietre aune Gobran Ngöbökwe kukwe blo diainkä nietabätä ye tätre mike gare ietre.
8. ¿Nitre ja bianka kristiano köböite nitre mada ñaka töbike kwin Bibliabätä yei nikwe dre niedre?
8 ¿Nitre ja bianka kristiano ye köböite Biblia ñaka tuin ütiäte ni ruäre ie angwane, nikwe mikadre gare ietre kukwe drieta kwetre aune kukwe nuainta kwetre ye erere drie ñaka Bibliakwe. Sukursal juta India yekänti mikani gare: “Biblia ye ñaka nitre ja bianka kristiano yekwe ye nikwe mikadre gare nitre ie”. Sukursal yekänti niebare arato, nitre hindú yei sección 4 täräkwata ¿Qué propósito tiene la vida? ¿Cómo descubrirlo?, ye nemen tuin kwin krubäte, ñobätä ñan aune nitre iglesiate yekwe Ngöbö Kukwei ye driebarera ño jene o ja di ngwanina juen ngwarbe kwetre ye mikata gare metre täräkwata yebätä. Prekursor nünanka juta Brasil yete tä niere krörö nitre ie: “Nitre kwati ñaka näin kukwebätä, akwa tätre ja töi mike kukwe Bibliabätä ye mike gare jai. Mä raba ye erere nuainne arato. Kukwe kwin rabai gare mäi yebätä mä töi rabai ñan krütare”.
9. ¿Nitre ñaka tö ja tötikai Bibliabätä niedre kwe nie angwane, ñobätä nikwe ñaka ja di ngwandre nekä?
9 Dreta nitre brukwäte ye tuin Jehovai (1 Sam. 16:7; Prov. 21:2). Aune tä nitre brukwä kwin ye töi mike näin kukwe metre yebätä (Juan 6:44). Nitre ye kwati ie Ngöbö ñaka nämene gare aune ñaka nämene ja tötike Bibliabätä. Nita kukwe driere ye köböire “kukwe era metre” tä nemen gare ietre aune ye köböire “diaintari” (1 Tim. 2:4, Kukwe Kuin Ngöbökwe). Yebätä, nire ñaka tö ja tötikai Bibliabätä niedre kwe nie angwane, ñaka ja di ngwandre nekä. Tärä o täräkwata keta kabre tä kukwe driekäre nie, ye meden raba nemen tuin kwin nitre yei yebätä blitadre bentre. Ja känenkäre, tärä ni mada tötikara Bibliabätä tä nikwe yebiti ni raba dirire nitre ie: ye abokän tärä ¿Dre drieta erametre Bibliakwe?
[Rekwadro página 4]
Nitre ñaka Ngöbö mike era jai ye dimikadre ño
• Ñobätä ñaka Ngöbö mike era jai rabadre gare nie yekäre nikwe ngwandretari ie: “¿Käre mätä töbike ye erere?”.
• Ni ye budista angwane, täräkwata Cómo hallar paz y felicidad duraderas páginas 9 nemen 12 yebätä blitadre ben.
• Jondron nire jatani nikwite jatäri nieta yekri tä ja mike angwane, nikwe video o täräkwata ruäre nebiti diridre ie:
¡Despertad! yebätä kukwe kädrieta jatäri kädekata, “¿Casualidad o diseño?”
Video Las maravillas de la creación revelan la gloria de Dios
Täräkwata Cómo lograr una vida llena de satisfacción parte 4, aune ¿Es la vida obra de un Creador? bätä El origen de la vida. Cinco cuestiones dignas de análisis
• Kukwe käme nuainta ni madabätä aune ja tare nikata ye köböite ni ye ñaka niena tödeke Ngöböi angwane, ni raba tärä o täräkwata nebiti dirire ie:
Tärä ¿Existe un Creador que se interese por nosotros? kapitulo 10
Täräkwata ¿De veras se interesa Dios por nosotros? parte 6 aune täräkwata ¿Qué propósito tiene la vida? ¿Cómo descubrirlo? sección 6
• Ni ye jatadre Ngöbö mike tuin era jai rabadre tuin nie angwane, ni raba tärä Dre drieta ye driere ie. Kapitulo 2 o kapitulo mada ye meden rabadre tuin kwin ie yebätä blitadre ben.
[Rekwadro página 5]
Nitre ñaka Biblia mike era jai ye dimikadre ño
• Tärä La vida... ¿cómo se presentó aquí? ¿Por evolución, o por creación? kapitulo 17 aune 18 yebätä blitadre bentre.
• Ni ye hindú angwane, täräkwata ¿Por qué debemos adorar a Dios con amor y verdad? yebätä blitadre ben.
• Ni ye Judío angwane, täräkwata ¿Habrá algún día un mundo sin guerra?, páginas 3 nemen 11 yebätä blitadre ben (täräkwata ye imprimi ñaka niena suliare).
• Kukwe Bibliabätä ja jie ngwankäre ye erere nuainta ye köböire kukwe kwin tä nemen bare ye nikwe niedre. Ni raba video o täräkwata ruäre nebiti dirire:
¡Despertad! yebätä kukwe kädrieta jatäri kädekata, “Ayuda para las familias”
Video La Biblia: el poder que ejerce en su vida
Täräkwata Ngöböta kukwe kwin mike gare nie kukwe ja tötikara 9 aune 11, aune Un libro para todo el mundo páginas 22 nemen 26 (täräkwata ye imprimi ñaka niena suliare) bätä Cómo lograr una vida llena de satisfacción parte 2
Ni ye budista angwane, täräkwata El camino de la paz y la felicidad páginas 3 nemen 7 yebätä blitadre ben
Ni ye musulmana angwane, täräkwata La fe verdadera, la puerta a una vida feliz sección 3 yebätä blitadre ben
Nitre ñaka Biblia kain ngäbiti ye käibiti ni ye tä nüne angwane, ni rabadre kena känti ye ngwane bäri kwin nita kukwe driere ye kite tärä medenbätä ye ñaka niedre ie
• Kuwe rabai bare niebare Bibliabätä tä nemen bare ño ye nikwe mikadre gare. Mikakäre gare, ni raba video o täräkwata ruäre nebiti dirire:
Video La Biblia: historia exacta, profecía confiable
Täräkwata Un libro para todo el mundo, páginas 27 nemen 29 (täräkwata ye imprimi ñaka niena suliare)
• Kukwe keta kabre mikata gare ño Bibliakwe ye ni ye tö jatadre mikai gare jai rabadre tuin nie angwane, ni raba tärä Dre drieta yebiti dirire ie.
[Rekwadro página 6]
Ni iti niedre: “Ti ñaka Ngöbö mike era jai” ye ngwane
• Ni raba ngwentari ie: “¿Dre köböire Ni ni Sribekä tärä namani gare tie ye mä törba gai?”. Biti tärä Razonamiento yebätä kukwe nieta páginas 87 nemen 89 yekänti ye ruärebätä blitadre ben. Tärä o täräkwata meden ni dimikani ye ni näin ngwena kräke nikwe niedre ie.
• Ni raba ngwentari ie: “Ni ni Sribekä tärä angwane, ¿rabadre ja töi mike ño raba ruin mäi?”. Kukwe ne ngwantarita nitre kwati ie angwane tätre niere, Ngöbö ye rabadre kukwe kwin nuainne, ñaka rabadre ni kitete, töi rabadre kwin aune rabadre ni mike tuin bobre jai. Nikwe ni ye kukwe nuadre, ye bitikäre Ngöbö töi ye erere ye nikwe mikadre gare Biblia yebiti ie. (Tärä Dre drieta kapitulo 1 ye känändre nikwe aune blitadre ben párrafo 6 yebätä ja käne.)
Ni iti niedre: “Ti ñaka Biblia mike era jai” ye ngwane
• Ni raba niere ie: “Nitre kwati tä töbike mä erere. Nitre ja tötikaka krikri tä kukwe mike gare ye erere Biblia ñaka mike gare o Biblia ñaka raba ni dimike kä nengwane nitre ruäre tä nütüre. Akwa ¿mäkwe ñäkäbarerabätä? [Mäkwe tuanmetre blite. Biti täräkwata Cómo lograr una vida llena de satisfacción parte 3 párrafos 1 aune 2 ye kädriedre ben.] Kukwe kwin ni dimikakäre tä Bibliabätä abokän kädrieta ruäre täräkwata nebätä ye ti törba mikai gare mäi köbö mada ngwane”.
• O ni raba niere: “Nitre kwati tä kukwe ye erere niere nunye. Akwa bersikulo keteiti ti töi mikaba ñan krütare ye ti törba mikai gare mäi [ani ñäke Job 26:7 o Isaías 40:22 yebätä, texto ye tä mike gare Biblia tä kukwe metre niere ye erere tä nemen gare nitre ja tötikaka krikri yei]. Kukwe keta kabre kwin tä Bibliabätä abokän raba nitre ja mräkäre dimike arato. Ti raba kiteta mäkänti mikakäre gare keteiti mäi”.
• Ni raba niere arato: “Mä töita ño mäkwe miri gare metre tie yebätä tä debe. Akwa Ngöbökwe tärä biani nie akräke, ¿kukwe meden meden mikadre kwe tärä yebätä raba ruin mäi?”. Biti dre niedre kwe ye erere kädrieta Bibliabätä ye nikwe mikadre gare ie.