Blita kömikadre ño täräkwata kia yebiti

Enero 2018 yete ja känenkäre ni raba blita kömike ño ye mikata gare täräkwata Kukwe ja jie ngwankäre gätäte yete. Ni töi mikata metrere blite nitre ben aune ñaka täräkwata bien jerekäbe ietre. Kukwe ye rabadre gare nie yekäre video sribeta “Kukwe nieta kukwe driekäre” ye kräke, känti ni raba blita kömike ño Biblia yebiti ye bämikata tuare. Akwa, ni ñaka raba täräkwata bien jire chi nita niken kukwe driere ju ju te ngwane, ¿ye ai gärätä? Ñakare. Ñodre, tärä kia ye kwin krubäte blita kömikakäre nitre ben. Nita kukwe drierebiti ngwane ni raba ne nuainne.

1. Kukwe tä mikani kena ye ngwandretari ietre aune kukwe ketamä tä mikani ye tuadremetre niere keteiti.

2. Página ketebukäre yete texto tä mikani mintrini ye mikadre tuare ie. Kä tärä ni yei ngwane, ñäkädrebätä aune kukwe ye kädriedre ben.

3. Tärä kia ye biandre ni yei aune raba ngwane ñäkädre täte kwe tärä yebätä niedre ie.

4. Ni jämi blite ünä ben ye känenkri kukwe ngwantarita tä “Mäkwe ngwantari jai” yekänti, mikadre tuare ie aune köbö mikadreta kukwe ye mikakäre gare Bibliabiti ie.

Ni rikadreta ye ngwane kukwe ngwantarita mikaninte ye mikadre gare aune kukwe mada ngwandretari blitakäre köbö madate. Kukwe ngwantarita tä Internet käi nikwe yete o täräkwatabätä mikata tuare página mrä tärä kiabätä ye ngwandretari keteiti. Aune ñongwane rabadre tuin bäri kwin nie ye ngwane, tärä Ngöböta kukwe kwin mike gare nie o tärä mada dirikäre bäri abokänbiti nita nitre tötike Bibliabätä ye driedre keteiti.