¿Ñongwane nitre tuadrebiti?

1. ¿Nikwe dre nuaindre nitre tötikakäre?

¹ Nitre tö gobran Jehovakwe mikai gare jai rabadre tuin nie, angwane nitre ye tuadrebiti tötikakäre (Mat. 28:​19, 20). Nitre tuadrebiti ye ngwane ora meden bäri kwin niaratre yekrä bätä nikrä, yebätä nikwe töbikadre. Akwa ¿ñobätä ñaka kä mikadre niken raire ta?

2, 3. ¿Ñobätä nikwe ñaka kä mikadre niken raire ta nitre tuabitikäre?

² ¿Ñobätä tuadrebiti bengwairebe? “Kukwe kuin [gobran Ngöbökwe]” drieta ye abokän tä nirien bäri, aune kä nibira nökrö ja ken nitre käme gatekäre (Mat. 24:14 Kukwe Kuin Ngöbökwe [KKN]; 1 Ped. 4:⁠7). Akwa nire tö kukwe mikai gare jai yekrä ‘köbö täbe diantarikäre’. Yebätä, kukwe Ngöbökwe driedre ye bäri ütiäte kä nengwane, ye medenbätä nitre tö kukwe mikai gare jai ye tuadrebiti bengwairebe nikwe (2 Cor. 6:​1, 2; 2 Tim. 4:⁠2).

³ Nita Gobran Ngöbökwe kukwei ye mike nemen nitre brukwäte aune ye Satanás tä ja di ngwen denkä mento (Mar. 4:​14, 15). Nitre ruäre tö kukwe Bibliabätä ye mikai gare jai, akwa mräkätre bätä nitre sribi muko kwe o ni mada nemen kötaire ye raba töi kwite, ye medenbätä nikwe ñaka kä mikadre niken raire ta blitakäre bentre.

4. ¿Nikwe blitadre kena nitre madabe ye ngwane dre nuaindre tuabitikäre?

⁴ Köbö aune ora ükadrete. Blita mikakäre krüte ni madabe ye känenkri, köbö aune ora medente ni raba niken tuinbitita ye ükadrete ben. Ni raba kukwe ngwentari ie mikakäre gare tuadrebiti ye ngwane. Nire tuadrebiti nikwe ye kä tikadre täräbätä. Mäkwe blitadre matare ni iti ben aune tö kukwe mikai gare jai angwane, mä raba nikenta jetebe känti angwane mäkwe nuain. Ni ye tä sribire yebätä ñaka kwen gwi mäi angwane, mä raba niken tuinbiti bämän krüte yebätä. Mäkwe köbö mikadreta ie ye erere mäkwe nuaindre (Mat. 5:37).

5. ¿Ñobätä nikwe nitre tuadrebiti bengwairebe Jesukwe sribi mikani ni kisete ye nuainkäre?

⁵ Kukwe keta kabrebätä nikwe nitre tö kukwe mikai gare jai ye tuadrebiti bengwairebe. Erametre, “kä kitera neme braibe ni käne,” ye medenbätä, nikwe köbö aune ora ükadrete kwin jai nitre tuabitikäre bengwairebe (1 Cor. 7:29 KKN ). Nitre tö Gobran Ngöbökwe kukwei mikai gare jai, ye nikwe ñaka kä mikadre niken raire ta tuabitikäre angwane, ye raba ni dimike sribi mikani ni kisete ye nuainne bäri kwin.