Mäkwe diri bäri kwin: mäkwe kukwe ngwantari nitre ie tuabitikäreta

Ñobätä ütiäte. Nitre tö kukwe mikai gare jai kwandre nie angwane, tädre gwi ye ngwane ni rikadreta känti ñö metakakäre kukwe metre nökani nikwe yebiti (1 Cor. 3:6). Ruäre ngwane, ni jämi nikenta ye känenkri nikwe ngwandretari nitre yei ñongwane ni raba nikenta tuinbiti. Nikwe kukwe ngwandretari ietre kädriekäre bentre ni rikadreta känti ye ngwane, ye erere nikwe niaratre töi mikai kukwe mikabätä gare jai. Nikwe kukwe ngwandretari ye mikata gare tärä o täräkwata mikadrete nikwe ietre yebätä angwane, raba ñäkebätä. Nikwe kukwe niedre nitre ie kädriekäre köbö mada ngwane bentre ye kwin krubäte ñobätä ñan aune nikwe blitai kukwe medenbätä ye rabaira gare nie bätä drebätä nikwe blitai ye rabaira gare nitre yei arato. Ni rikadreta känti ye ngwane, ni nikaninta känti kukwe ngwanintari nikwe ietre ye kädriekäreta bentre aune blitakäre bäri bentre nikwe niedre ietre.