Mäkwe diri bäri kwin: mäkwe blita kömika kukwe driekäre kä jökrä ngwane

Ñobätä ütiäte. Nita kukwe driere ju ju te ye ngwane, nitre ruäre ñaka tä kwen gwi nie yebätä ni ñaka tä blite bentre. Akwa, raba kwen nie bus ngübata yekänti, hospital yete, kä bianta ja dükara ietre sribikänti ye ngwane o recreo bianta kwelate ye ngwane, aune kä madakänti. Nitre jökrä käkwe kukwe kwin Gobran Ngöbökwe yebätä kukwe nuadre ie Jehová tö (1 Tim. 2:3, 4). Nikwe ja töi mikadre niken käne nitre känti aune blita kömikadre bentre kukwe driekäre ietre.

Nuaindre ño:

Nire raba blite kwin mäbe yebe mäkwe blita. ¿Nitre ye bä ni töi jäme ye erere aune tö blitai? ¿Kä ye ngwane ni raba blite töi jämebiti bentre? Nitre kukwe driekä ruäre tä käne nitre ye mike ñärärä aune tätre kä mike kötare ja ngwärebätä. Nitre ye tätre kä mike kötare ja ngwärebätä angwane, tätre blita kömike bentre.
Kä jürä raba mäbätä blitakäre angwane mäkwe drekebe orasion nuain kaibe ja töite (Neh. 2:4; Hech. 4:29).
Mäkwe kukwe braibe nie blita kömikakäre, ñodre, mä raba ñantörö niere. Jesús blita kömikani meri Samaria ben ye ngwane ñaka blitabare käne kwe Gobran Ngöbökwe yebätä (Juan 4:7). Ruäre ngwane ni raba kukwe kwin niere nitre ie, ñodre, ni raba kukwe ne erere niere ietre: “Monsotre mäkwe ye ja ngwen kwin krubäte”. Ni raba kukwe ne erere ngwentari ietre arato: “¿Mäkwe noticia tuaba jändrin deu?”.
Mäkwe blita kömikadrera ye ngwane, mä raba kukwe kwin ye mike gare angwane mäkwe nuain, akwa ñaka nuain biarebe. Mäkwe blita kwin jabe kwärikwäri. Bäri kwin nitre törbadre kukwe meden mikai gare jai aune raba töi mike kukwe ngwentari yebätä mäkwe blita bentre. Ñodre, mä tädre blite ni ja mräkäre yebätä angwane, mä raba niere krörö: “Kukwe kwin nieta monso ngübakäre abokän tä käre nitre dimike yebätä tikwe ñäkäba”. Noticia ruärebätä mä tädre blite angwane, mä raba niere krörö: “Krire kä nuära tikwe ñäkäba kukwe kwin krubätebätä yekwe kä mikaba juto tibätä”. Mä jämi kukwe driere ye känenkri blita mikadre krüte mäbe ye ngwane mäkwe ñan ja di ngwan nekä.
Mä rika täräkwata kia o tärä mada mada ngwena jai biankäre nitre törbadre kukwe mikai gare jai yei.

Mäkwe kukwe ne nuain sö krati:

Bämän kratire kratire mäkwe blita kömika ni iti ben kukwe driekäre kä jökrä ngwane.