¿Kukwe drieta ye nita mike käne?

1. ¿Kukwe drie ye namani ütiäte Jesukrä ye bämikani ño kwe?

¹ Jesús nämene käre kukwe drie ye mike käne kukwe mada yebiti ta. Niara nämene sribi ye nuainne krubäte, nämene niken gürere nemen mäbe kä Palestina yekänti kukwe driekäre nitre kwati ie. Ñaka ja töimikani kwe jondron mada jiebiti, ne kwe rabadre kukwe driere köbö jökrä te aune nitre dimike (Mat. 8:20). Nitre kwati tönamani niara ketaite nitre bren ye mikakäreta kwin, ye ngwane niarakwe niebare ietre: “Ngöbö kite gobrane [...] ye tikwe mikadre gare juta ketareketare te, abkokäre Ngöbökwe ti juani” (Luc. 4:​43, Kukwe Kuin Ngöbökwe).

2. ¿Ñobätä kukwe drie ye Jesukwe mikani tuin bäri ütiäte jai?

² ¿Ñobätä kukwe drie ye Jesukwe mikani tuin bäri ütiäte jai? Niara tönamani Ngöbö kä ye mikai deme (Mat. 6:⁠9). Arato, nämene Rün kä kwinbiti ye tarere, ye medenbätä, Rün kwe töinämene ño ye erere tönamani nuain aune mikabätä täte (Juan 14:31). Ne madakäre, töinämene nitre madabätä aune tönamani dimikai (Mat. 9:​36, 37).

3. ¿Kukwe drieta ye nita mike käne ye nikwe bämikadre ño?

³ Nuaindre niara erere. Jondron kä nebätä kätä kä denkä krubäte nikän bätä tä ni töimike kukwe mada jiebiti, ye medenbätä, Jesukwe kukwe kwin bämikani ye ruäre ñan nuäre nuaindre nikrä (Mat. 24:​37-39; Luc. 21:34). Ye medenbätä, kukwe meden bäri ütiäte yebätä nikwe ja töimikadre aune kä diandrekä jai ja tötikakäre bätä kukwe driekäre käre (Fili. 1:10). Jondron ribeta metrere jai ye aibebiti nikwe nünandre aune ñaka ja töimikadre krubäte jondron kä nebätä ye jiebiti (1 Cor. 7:31).

4. ¿Ñobätä kä nengwane kukwe drie ye mikadre käne?

⁴ Nitre töbike kwin ja käne, ie kä ñaka nemente krubäte angwane tä jondron bäri ütiäte ye mike nuainkäre käne jai. Ñodre, murie kri jatadre ye ngwane mäkwe ja di ngwandre käne mä mräkätre ye üke bätä kukwe ye mikakäre gare nitre nünanka mä bäre yei, aune jondron mada ye mäkwe mikadrete nuainkäre mrä, ¿ñan ererea? Ye erere, Rü kri Ngöbökwe ye nibira känime ni ken (Sof. 1:​14-16; 1 Cor. 7:29). Aisete, nita dre mike käne o nita kukwe driere ño konkrekasionte o nitre madai yebätä nikwe töbikadre, ne kwe ni aune nitre ie nita kukwe driere ye rabadrete nire (1 Tim. 4:16). Erametre, nita kukwe drie ye mike käne angwane ye köböire ni raba nemente nire.