Nikwe ja töi ngubadrebiti
1. ¿Gätä kri köböbu nuaindi kä 2013 ye kädekata ño, aune ñokäre kukwe ye ükaninte?
1 Nitre ja tötikaka rabadre Jehová tarere ja brukwä tätebiti, ja nire tätebiti aune ja töi tätebiti ye Jesukwe driebare ietre (Mat. 22:37, 38). Gätä kri kä nete kräke ye tä ükaninte ni dimikakäre ja brukwä üaire ye mike dite. Garera muen ye erere, gätä kri köbömä ye kräke kukwe dianinkä kädekata “Nikwe ja brukwä ye kriemikadre”. Gätä kri köböiti kä 2013 kräke ye kädekata “Nikwe ja töi kriemikadre”, aune gätä kri köböbu nuaindi jatäri sö madabätä ja känenkäre ye kädekata “Nikwe ja töi ngubadrebiti”, ye tä dianinkä Mateo 22:37 yebätä. Gätä kri köböbu nuaindi ye käkwe ni mikadre töbike ja töi yebätä ne kwe tädre kwin Jehová okwäkänti.
2. ¿Kukwe meden meden ngwantarita abokän mikai gare jatäri kukwe kädriei yete?
2 Dre kädriei. Gätä kri köböbu krütai ye bitikäre, ni tö kukwe ütiäte ye ngwainta törö jai. Ye medenbätä bäri kwin kukwe ngwantarita ne mikadi gare ño ye nikwe tikadre täräbätä jai:
• ¿Ño ni raba ñaka ja töi kwitamana nitre mada töi yei?
• ¿Nitre tä kä drüne te ye ni raba dimike ño nemen kwäre kukwe yebätä?
• ¿Ni rabadre ja töi mike ño?
• ¿Nita töbiketari kwin ye köböire dre dre tä nemen nikwe?
• ¿Ño ni raba Jehová tuenmetre ja töi kwite?
• Ni brare gure, meritre gure, nitre rüne aune monsotre, ¿rabadre dre nuainne nünankäre kä jutobiti jabe?
• ¿Ño ni raba nemen juto köbö Jehovakwe ye kräke?
• ¿Töbikadre kwin ja käne sribi nuainkäre ye dre gärätä?
• ¿Nitre ie kukwe nüke gare erere tä nuainne ye köböire dre kwin tä nemen kwetre?
3. ¿Ñobätä ni rabadre niken gätä kri köböbu nuaindi yebätä aune kukwe kädriei ye kukwe nuadre kwin aune kukwe kwin niedi ye mikadre täte?
3 Satana tö ni töi juain ngwarbe aune tä ja di ngwen krubäte nuainkäre ne kwe rabadre bare ie (2 Cor. 11:3). Ye medenbätä nikwe ja töi ngubadrebiti, ja töi jie ngwandre kwin, ja töi mikadre Kristo ye erere, aune ñaka nitre kukwe blo nuainkä ye erere (1 Cor. 2:16). Nikwe ja di ngwandre rabakäre gätä kri köböbu nuaindi yebätä aune kukwe kädriei ye nikwe kukwe nuadre kwin. Kukwe kwin niedi gätäte ye nikwe mikai täte, ye käkwe ni töi mikai dite sribi Gobran Ngöbökwe ye nuainkäre kä jutobiti (1 Ped. 1:13).