Gätä kri köbömä, Jehová käikitakakäre
1. ¿Dre kätä mike gare juta Israel nämene bieta nuainne ye ja erebe gätä kri köbömä nuainta kä nengwane yebe?
1 Bieta nuain nämene kä kwatire kwatire te Jerusalén yete, yebätä José, María, monso kwetre bätä nitre mada nämene niken käre. Köbö ye ngwane niaratre nämene ja töimike kukwe ja üaire yebätä, aune kukwe nämene töi nike yebätä ñaka nämene töbike krubäte. Bieta nuain nämene ye ngwane niaratre nämene töbike bätä blite Jehová töi kwin ni madakrä yebätä, aune niaratre nämene ja tötike Ngöbö kukwei yebätä. Ye erere arato, gätä kri köbömä nuaindi yete ni raba Jehová käikitekä kä jutobiti.
2. ¿Kukwe meden ükadrete gätä kri köbömä ye kräke?
2 Ja ükadrete. Jesús mräkä nämene niken bätä kiteta kä Nazaret ye ngwane nämene näin 200 kilómetro (120 millas). Jesús eteba bätä ngwai nibe ye ñaka gare metrere nie, akwa ni raba töbike José bätä María nämene ja ükete bätä ja di ngwen krubäte rabakäre bieta yebätä. ¿Mätä kukwe ükete nänkäre gätä kri köbömä yete? Mä raba blite jefe mäkwe yebe o blite ni monso mäkwe tötikaka kwelate yebe, ne kwe köbö biandre rabakäre gätä yebätä. ¿Hotel medente mä rabai yekrä mäkwe kukwe ükaninante? Nitre konkrekasionte kätä ja di ribere, ¿ye mä raba ja töimike käne dimikabätä ne kwe kwandre gätä kri yebätä? (1 Juan 3:17, 18.)
3. ¿Juta Israel nämene bieta nuainne yete kukwe meden nuain nämene kwetre?
3 Ja dimikata kwärikwäri. Nitre judío nämene bieta nuainne ja dimikakäre kwärikwäri nitre mada Jehová mikaka täte yebe. Erametre, Jesús mräkä ye tö nämene ja tuaita ja ketamuko kwetre yebe. Arato, Jerusalén ye känti bätä ji ngrabare ja ketamuko mada nämene kwen ietre nitre judío kwati bätä nitre ñaka judío abokän nämene ja mike judío ye ngätäite.
4. ¿Nita ja ükökrö ja mräkätrebe ye nita mike tuin ütiäte jai ni raba bämike ño?
4 Nitre sribikä täte metre bätä töbätä ñaka tä kukwe kädrieta gätä kri yete ye mike gare nie täräkwata sribeta yebiti, ñakare aune tä kukwe ükete ne kwe nikwe ja ükadrekrö kukwe kädriedre ye kukwe nuakäre. ¿Ñobätä? Kukwe keta kabrebätä, ñodre, ne kwe nikwe ja di mikadre kwärikwäri (Heb. 10:24, 25). Ye medenbätä, nikwe kukwe ükadrete rabakäre gätä yebätä ni gätä kömikaka jämi blite bätä musika kömika jämi ye känenkri, ne kwe nikwe blitadre ja mräkä mada yebe. Nunta mun nübaire droa ngwena jai akwa ñaka ere, ne kwe mun ñaka rikadre mrö kökö jai kä mada känti ñänä ruäre ye ngwane, ñakare aune ja mikadrete blitakäre ja mräkätre ben. Nita ja ükökrö ja mräkätre ben ye abokän jondron ütiäte Jehovata bien nie ye nikwe ñaka käi kwitadrekä jabiti (Miq. 2:12).
5. ¿Dre nuaindre ne kwe kukwe kädriedre ye kukwe nuadre kwin?
5 Ja tötikata. Jesús nämene monsore ye ngwane, nitre judío nämene bieta nuainne yete nämene ja tötike bäri Rün kwe kä kwinbiti yebätä (Luc. 2:41-49). ¿Dre nuaindre ne kwe ni aune ni mräkä käkwe gätä ye kukwe nuadre kwin? Kukwe kädriedre ye ngwane mä rabadre täkäni kwekebe aune ñaka blite ngwarbe. Teléfono bätä jondron mada ye mäkwe kukwei ötadre, ne kwe ñaka mä bätä ni mada töi nikadre. Ni kukwe kädriekä ye mäkwe mikadre ñärärä bätä kukwe nieta kwe ye mäkwe tika täräbätä jai. Nitre ja mräkäre käkwe täkädre gwairebe ja ken, ne kwe monsotre tädre gätä ye kukwe nuin rabadre gare rün o meye ie. Ye bitikäre, niaratre raba kä denkä deu jai blitakäre kukwe meden namani tuin kwin ietre yebätä.
6. ¿Ja ngwäkitata bätä ja ükateta yebätä dre ngwandre törö jai?
6 Ja ngwäkitata bätä ja ükateta. Jesús mräkätre bätä nitre mada Ngöbö mikaka täte nämene niken bietabätä o kiteta ja gwirete, ye ngwane ji ngrabare nämene nüke gare kwin nitre juta madate nämene kite jondron rürübäine yei. ¿Ñobätä? Dän kwetre ye köräbäre dänkwä mada nämene mikani bätä dänkwä ye arabebätä kö asul nämene mikani, yebätä nämene nüke gare (Núm. 15:37-41). Kä nengwane nitre kristiano ñaka ja ngwäkite ye erere, akwa nita ja ngwäkite bätä ja ükete kwin yebiti ni nüke gare. Gätä nuainta yekänti ni rikadre o ni jatadreta ja gwirete ye ngwane ja ükadrete kwin. Ruäre ngwane gätä tä krüte ye bitikäre nita ja ngwä kwite, akwa nikwe ja ngwäkitadre kwin bätä solapa ngwandre jabätä Ngöbö käikitakakäre. Ye köböire ni mada ie rabai gare ni abokän Testiko Jehovakwe aune blitadi kwin kwetre nibätä.
7. ¿Ñobätä nikwe ja töi mikadre sribikäre gätä kri nuainta yete?
7 Nitre ribeta sribikäre. Gätä kri rabadre bare kwin yekäre nitre ribeta kwati sribikäre. ¿Mä raba ja töi jeñebiti ja mike sribi nuainkäre? (Sal. 110:3.) Sribi nuainta gätä kri yekrä ye sribi ütiäte arato, bätä ye raba ni mada mike blite kwin Ngöbö yebätä. Kä känti gätä kri nuainbare yekänti ni iti kädekani kä ye ngübabitikä töi ñan namani krütare, nitre käkwe ja töi jeñebiti kä ükaninte kwin gätä yekrä yebätä, aisete kukwe ne tikani kwe: “Gätä nuainbare kwin krubäte abokän ti ñan tuabare jire chi, ye medenbätä tita debe bien munye. Käre nieta tie mun testiko Jehovakwe abokän ñaka ja erebe nitre mada yebe, munta gätä kri nuainne ye bitikäre munta kä tuanmetre kwin mrebe ñaka nitre mada ye erere. Mun jökrä testiko Jehovakwe kätä kukwe kwin bämike nitre nünanka kä ye känti kräke aune nitre töi kwin ti ñaka tuabare abokän kätä sribi ye nuainne”.
8. Ni tädre gätä kri yebätä ye ngwane, ¿ni raba dre nuainne kukwe mikakäre gare ni madai?
8 Kukwe drie raba. Nitre nünanka kä känti gätä nuainta ye kätä nitre tuin ja ngwäkite kwin aune solapa ngwen jabätä nemen gätä yebätä; aune ye raba nitre ye töimike kukwe ngwentari nie bätä ni raba kukwe mike gare ietre gätä kri yebätä. Tärä mrä biani gätä kri yete ye monso kä kobokäbiti nikani ngwena mrö rürübäin käi yekänti bätä mikani tuare kwe meri sribikä yete yei, ye köböire rün bätä meye kwe käkwe meri ye nübaibare gätä kri yebätä.
9. ¿Jesús mräkätre käkwe kukwe Ngöbökwe ye mikani tuin ütiäte jai, ye erere ni raba bämike ño?
9 Nitre judío tö nämene kukwe Ngöbökwe mikai gare jai, nämene bieta kirabe ye ngübare kä jutobiti (Deu. 16:15). Jesús mräkätre nämene ja di ngwen rabakäre bieta yete aune ja tötikakäre kwin Ngöbö kukwei yebätä, ye nämene kä mike juto niaratre yebätä. Ye erere arato, gätä kri köbömä nuainta ye nita mike tuin ütiäte jai, ne ñan ñobätä aune ni Rün kä kwinbiti ni tarekä kätä kukwe kwin ye bien nie (Sant. 1:17). ¡Nikwe ja ükadrete gwäune Jehová käikitakakäre kä jutobiti gätä kri nuaindi yete!
[Rekwadro de las páginas 6 y 7]
Kukwe ngwanta törö gätä kri köbömä yekrä
◼ Ora gätäkrä. Gätä kri köbömä ye jökrä kömikai 9.20 dekä. Jukwe tikai 8.00 dekä. Musika kömikai dekä ye ngwane, ni jökrä käkwe täkädre täkärä yete, ne kwe gätä ye kömikadre kwin. Bierne bätä sabado gätä krütai 4.55 dere aune dominko krütai 3.40 dere.
◼ Kä karo mikatekäre. Kä biani nie karo mikatekäre ye ñaka ütiä käräi aune karo rabai nüke ye ererebätä ükaite jatäri. Placa mikani karobätä nitre bren kräke, karo ye aibe mikadrete kä dianinkä nitre bren kräke ye känti. Kä ñaka bianta krubäte karo mikatekäre, ye medenbätä raba angwane mun raba niken karo kwatibe te.
◼ Täkärä. Nitre nänkä mäbe karote, nitre ja tötika mäbe o mä mräkätre ye aibe kräke mä raba täkärä denkä (1 Cor. 13:5).
◼ Mrö. Ni rikadre mrö ngwena jai ye bäri kwin, ne kwe ni ñaka rikadre kökö jai kä madakänti ñänä ruäre yete. Nevera chi mika raba täkärä täni, aibe ni raba niken ngwena. Jondron bidriore ye ñaka jänrikadre arato.
◼ Ngwian. ¿Ni raba debe bien ño gätä kri yebätä? Ngwian biandre ja töi jeñebiti sribi Ngöbökwe nuainta kä jökräbiti ye dimikakäre, yebiti ni raba nuainne. Ye nuain raba Ju ja Ükarakrö yete o gätä kri yete. Ngwian biandre chekere angwane, sribedre “La Torre del Vigía” ye käbiti.
◼ Kukwe tare rabadre bare. Gätä nuainta yete kukwe tare rabadre bare ye ngwane, nitre ni käi ükatekä yei nikwe mikadre gare jötrö ngwarbe. Niaratre käkwe mikai gare nitre Ni dimikaka kukwe tare yebätä ye käi känti, ne kwe niaratre käkwe ni mada juandre ni bren tuin känti aune kräkäi mike. Kukwe kri krubäte rabadre bare angwane nitre Ni dimikaka kukwe tare yebätä käkwe ñäkädre numero 911 yete; ne kwe ñaka ñäkädre ngwarbe numero yete kukwe ñaka ütiäte yebätä.
◼ Sabato. Kä kwatire kwatire te nitre tä ngoto juin nemenkä o mate tibien sabato yete. Mäkwe sabato kwin känän, ne kwe mäkwe nändre kwin kalera yebätä.
◼ Nitre ie ni kukwe ñaka ruin kwin. Kä ruäre känti kukwe kädriei gätä kri yete, ye mikai kukwe nuakäre radiote (FM) yete. Yekäre, mä raba radio bätä audifono ngwena kukwe nuakäre.
◼ Kukwe grabadre. Gätä kri nuainta yete ni ñaka raba radio o jondron mada ye ketekä electridad yebätä kukwe grabakäre. Akwa radio o jondron kukwe grabakäre ñaka raba ni mada töi nike angwane kukwe graba raba.
◼ Karo monso kia ngwankäre bätä täkärä mada. Ni ñaka rikadre karo monso kia ngwankäre bätä täkärä jeñe nikwe ye ngwena gätä yekänti. Täkärä kia monso kräke mika raba ja ken ye aibe ni raba niken ngwena.
◼ Jondron ja rä mikara. Ruäre gätä kri nuainta kä ketaninkä känti, yebätä abaniko mikata. Ye medenbätä jondron ja rä mikara, ye nikwe ñaka mikadre krubäte jabätä, ne ñan ñobätä aune ye raba nitre dokwä mike tare o mike bren (1 Cor. 10:24).
◼ Täräkwata Sírvarse visitar. Täräkwata Sírvase visitar (S-43) ye ni rikadre ngwena kati o kobu, ne kwe nikwe kukwe driedre angwane, nire nire törbadre kukwe mikai gare jai ye nikwe kä tikadrebätä. Gätä krütadre angwane täräkwata ye bian raba Tärä Bianta ye känti o ni kukwe konkrekasionte tikaka yei (Sribi Nikwe Ngöbökrä noviembre kä 2009, pág. 4, mikadre ñärärä).
◼ Mrö rürübäin käi. Ni rikadre mröre mrö rürübäinta yekänti angwane ja ngwandre kwin, ye kätä Jehová käikitekä. Kä keta kabre känti ngwian (propina) mikateta 15 bätä 20%, nitre sribikä yei.
◼ Hotel. 1) Kwarto ribedre kwäbe mäkwe ye aibe kärädre bätä ñaka ni mada mikadre kübien yete. 2) Kwarto käräbare mäkwe, yete mä ñaka rabai angwane mäkwe mika gare jötrö hotel yei. 3) Jondron mikata tribe ngwankäre ye ribedre angwane mä raba niken ngwena biti mikadreta täte ni mada kräke. 4) Ñaka mrö riadre kwartote nieta ye erere nikwe nuaindre. 5) Mäkwe ngwian (propina) mikate ni sribikä kwartote yei köbö kwatire kwatire te. 6) Mrö, kabe o jondron mada mikateta kwetadre hotel yete, ye nikwe kwetadre debe näre. 7) Ngöbö üai kätä ni töimike kwin, ye nikwe bämikadre blitadre nitre sribikä hotel yebe ye ngwane. Nikwe ngwandre törö jai, nitre kwati tä nemen hotel yete ye nitre sribikä kätä dimike, ye medenbätä nikwe ja töi mikadre kwin nitre yekrä bätä ngübadre bätärekä ye kwin niaratre kräke.
◼ Ja töi jeñebiti sribidre. Nita sribire ja töi jeñebiti ne kwe gätä kri ye rabadre bare kwin ye kätä kä mike bäri juto nibätä (Hech. 20:35). Nire törbadre sribi nuain ye raba ja kä bien Nitre Käkwe Ja Mikani Sribikä käi yekänti. Monsotre kä jämi 16 bititre raba sribire arato, akwa ni mada, rün o meye kwe ye käkwe ngübadrebiti.