Kukwe nuadre aune ja tötikadre kwinbätä
1. ¿Ñobätä ñaka tä nemen nuäre ja töi mikakäre kwatibe kukwe kädrieta gätä kri köbömä te yebätä?
1 Gwäune gätä kri köbömä 2013 ye kömikai. Ja di ngwanta krubäte kukwe ja üaire ükatekäre ne kwe nitre kä jökräbiti tibien tä kukwe ja üaire ribere jai yekwe rabadre nemen. ¿Mäkwe kukwe ükaninante jai ne kwe mä kwandre köbö gätä nuainkäre ye jökrä te? Gätä kri ye näire kukwe keta kabre tä nemen ni töi mike kukwe mada jiebiti, ye medenbätä ñaka tä nemen nuäre ja töi mikakäre kukwe kädrieta yebätä. Kukwe ükaninte ye bäri tä nuin raire gätä nuainta konkrekasionte ye kräke, ye medenbätä nikwe ja töi mikadre bäri kukwe kädrieta ye kukwe nuakäre. Aune nita nemen nainte nänbätä o kukwe madabätä. ¿Dre käkwe ni dimikai ja töi mike kwatibe kukwe kädriei ye kukwe nuakäre aune ja tötikakäre kwin? (Deut. 31:12.)
2. ¿Ni raba ja brukwä ükete ño biare gätä kri ye kräke?
2 Gätä kri ye känenkri. Internet käi www.pr2711.com/es yekänti, kukwe ükaninte kädriedre ye kwain mäi aune kukwe jökrä kädriei ye kädekata ño ye rabai gare mäi bätä texto keteiti o ketebu bäri ütiäte kwandi mäi. Internet tärä mäkwe angwane, mäkwe kukwe ne känäin ye köböire mä rabai ja brukwä ükete biare gätä kri ye kräke (Esd. 7:10). Ja Tötika ni Mräkäbe nuaindre mäkwe ye ngwane mä raba mä mräkätre ye töi mike kukwe kädriei yebätä.
3. ¿Dre käkwe mä dimikai kukwe kädriei ye kukwe nuin kwin?
3 Gätä kri näire. Raba nemen bare mäi ngwane mä raba niken käne narakrö yete gätä kömika jämi ye känenkri. Aune mä raba celular ye kukwe ötö ne kwe blitadrebiti mäbe o kukwe juandre mäi ye ñaka mä töi nikadre aune mä ñaka töi rabadre kukwe juanbätä arato gätä ye näire. Nane mäkwe celular ye tuanmetre okwä mikaninkä angwane, mäkwe ükadrete ne kwe blitadrebiti mäkwe ye ngwane ñaka ni mada töi nikadre kwe. Tableta mäkwe yebiti mä törba kukwe tikai angwane mäkwe ñaka ni mada töi nikabiti. Mäkwe ñaka jondron kweta aune tomana ña gätä ye näire (Ecl. 3:1). Mäkwe nikra kwekebe ni kukwe kädriekä yebätä aune niarakwe ñäkä textobätä angwane mäkwe ñäkä siba textobätä Biblia mäkwe yete. Kukwe kädrieta ye mäkwe tika täräbätä jai arato.
4. ¿Nitre rüne rabadre monsotre kia dimike ño ne kwe rabadre kukwe kädrieta ye kukwe nuin aune ja tötikebätä?
4 Ni tö monsotre kia nikwe tuai kukwe kädriei ye kukwe nuin aune ja tötike arato. Proverbios 29:15 tä niere: “Monso tuanmetreta jerekäbe ye tä meye mike jakaire”. Ye medenbätä bäri kwin monsotre kia rabadre täke rün ye ken ne kwe niaratre tädre mokre bentre aune monsotre ye tädre kukwe kädrieta ye kukwe nuin aune ñaka tädre blite bätä kukwe juen o näin jerekäbe gwita tibien. Monsotre kia yei kukwe kädrieta ye jökrä ñaka nüke gare, akwa tädre ngwäte aune kwekebe ye drie raba ietre.
5. ¿Kukwe kädriebare gätäte ye ñobätä ütiäte kädriedreta jabe aune ni raba nuainne ño?
5 Gätä ye bitikäre. Mäkwe ñaka kübia kä raire te deu. Mäkwe ja düka kwin. Kukwebätä mäkwe ja tötikai rare ye kädriekäre mä mräkätre yebe mäkwe kä dianka jai, ne kwe kukwe ye ngwandre törö kwetre jai aune ñaka käi kwitadrekä jabiti kwetre. Mrö rürübäinta yekänti mä rika ja ketamuko mäkwe yebe angwane, kukwe keteiti o ketebu namani tuin ütiäte mäi ye mä raba kädriere ben. Kukwe tikani mäkwe jai yebiti mä raba nuainne. Ja känenkäre, mäkwe ja tötika mä mräkätre yebe angwane kukwe ye nuain raba ño ye mäkwe kädrie mä mräkätre yebe. Bämän kratire kratire yete mä raba kä denkä jai ja tötikakäre kukwe tä täräkwata mrä yebätä.
6. ¿Ñobätä ñan ni janandre jerekäbe gätä kri yebätä?
6 Ni janandre mrö sribedre krubäte yekänti akwa nikwe ñaka mrö ye bänä nuadre aune käi ngwandre juto jabätä ye ngwane ngwarbe ni janandre. Ye erere nie raba mrö ja üaire bianta krubäte gätä kri köbömä nuainta yebätä. Nikwe ja di ngwandre krubäte rabakäre kukwe kädriei ye jökräbätä, aune kukwe nuin kwin bätä kukwebätä ja tötikai ye nuainne arato.