Ngöbö Kukwei ye kwin dirikäre
1. ¿Gätä kri köböbu nuaindi kä 2014 yete ye kädekata ño, aune kukwe meden ngwantarita abokän mikai gare gätä yete?
1 Jehová ye ni “Tötikaka Kri”, niara ye dirikä bäri kwin kä jökräbiti (Is. 30:20, 21). Tärä keteiti ñaka tärä mada erere yebiti niara tä dirire nie: ye abokän Biblia, ye niara Kukwei tikani üai deme kwe yebiti. ¿Kukwe drieta kwe ye raba ni dimike ño ja ngrabare yebiti, ja töi yebiti aune kukwe ja üaire yebiti? Gätä kri köböbu nuaindi kä 2014 yete kukwe ngwantarita ye mikai gare. 2 Timoteo 3:16 yebätä kukwe dianinkä gätä ye kräke abokän kädekata: “Ngöbö Kukwei ye kwin dirikäre”.
2. ¿Kukwe meden meden ngwantarita abokänbiti kukwe ütiäte kädriei ye rabai gare nie?
2 Kukwe ütiäte kädriei. Kukwe ngwantarita jatäri nebiti kukwe ütiäte kädriei ye rabai gare nie:
• ¿Ngöböta ni tötike ye tä mate ño nibätä? (Is. 48:17, 18.)
• ¿Nikwe kukwe ükadrete jai sribikäre köbö täte Jehová kräke ye ngwane kukwe meden ie nikwe tö ngwandre? (Mal. 3:10.)
• ¿“Kukwe [...] jene” driedre ye nikwe mikadre tuin ño jai? (Heb. 13:9, Ngöbö Täräe [NGT], tärä okwä ükaninte.)
• ¿Jesukwe “diribare” ye erere ni raba nuainne ño? (Mat. 7:28, 29, Kukwe Kuin Ngöbökwe.)
• ¿Nitre tä dirire konkrekasionte ye ñobätä rabadre dirire akwle jai arato? (Rom. 2:21.)
• ¿Drekäre Ngöbö Kukwei ye kwin? (2 Tim. 3:16.)
• ¿Ngöbökwe juta jökrä “ngrükaite” ye matai ño ni kä tibienbätä yebätä? (Ageo 2:6, 7.)
• ¿Kukwe medenbätä Jehovata tö ngwen nie? (Efes. 5:1.)
• ¿Ñobätä ni rabadre ja di ngwen jankunu nünankäre Jehová tä ni tötike ye ererebätä? (Luc. 13:24.)
3. ¿Ñobätä ütiäte krubäte kukwe kädriei gätäte ye nikwe kukwe nuadre jökrä?
3 Textobätä kukwe dianinkä gätä ne kräke ye känenkri, bersikulo mada yekänti kukwe meden meden rabai nakainkä kä krüte nete ye mikata gare. Kukwe tare tä nakainkä, yebätä Pablo kukwe ne tikabare: “Nitre käme, aune ni ngökö, nebrä näin bäri käme krubäte; rabai ni ngökö, aune nitrekwe niara ngökai” (2 Tim. 3:13, NGT). Ñaka ni ngökadre yekäre, ütiäte krubäte kukwe drieta Ngöbökwe nie ye nikwe kukwe nuadre aune mikadre täte. Yebätä, nikwe ja di ngwandre kukwe kädriei gätäte ye jökrä kukwe nuin.