¿Mä nibira juto mrö ja üaire yekrä?

1. ¿Dre dre nuainta mrö kwin sribekäre?

¹ Mrö kwin sribedre ni kwati nübaikäre ye sribi krubäte: ñodre, jondron ketakabre kökadre, sribedre, bänä mikadre bätä döräidre; nitre diandrekä mrö döräikäre bätä kä ükadrete kwin. Akwa nitre nübaibare ye ie nändre mente angwane, rabadre ja ükete kwin biare arato. Sribi krubäte nuaindre, akwa mrö bänänte ye kwetadre ni mräkätre aune ja ketamuko nikwe yebe, ye raba kä ngwen juto krubäte nibätä, ¿ñan ererea? Ye kwrere, kä jökräbiti tibien nitre testiko Jehovakwe käkwe ja ükaikrö kä jutobiti gätä kri yete, mrö ja üaire ye kan ngäbitikäre. Gätä kri Köbömä kädekata: “Munkwe ja ngwan mokre”, ye abokän köböi nibira ja ken. Sribi nuainta krubäte kukwe kädriei ye ükatekäre bätä jondron mada nuainkäre gätä kri yekrä. Akwa ni itire itire nübaita ye jökrä rabadre ja ükete biare arato, ne kwe ni tädre ja ükaninkrö kukwe kädriei ye kukwe nuakäre täte (Pro. 21:⁠5).

2. ¿Nikwe dre nuaindre ne kwe mrö ja üairebiti ye rabadre nikwe?

² Mäkwe ñaka juan ja bäre. ¿Mäkwe dre nuainbarera ne kwe mrö ja üaire ye rabadre mäkwe gätä kri yete? Mäkwe blita jefe mäkwe yebe, bätä mäkwe köbö kärä ngwarbe ie, ne kwe mä kwandre gätä ye jökräbätä. ¿Drete mä näin bätä medente mä rabai ye niena gare mäi? Nitre umbre ji ngwanka konkrekasionte käkwe kukwe ükadrete, ne kwe nitre niena umbre, nitre bren ye dimikadre; arato ja mräkätre kätä ja di ribere ye ñaka käi kwitadrekä jabiti (Jer. 23:4; Gál. 6:10).

3. Gätä kri juta keta kabre kräke yebätä ni nübai ñaka angwane, ¿ñobätä ni ñaka rikadre?

³ Gare nie erere, gätä kri juta keta kabre kräke nuaindi juta ruäre känti. Kä gätäkrä ye känti ni nibe raba nemen bätä kwarto kwäbe tärä hotel yete ye sukursal käkwe ükaninante ye nikwe ngwandre törö jai. Ye medenbätä, konkrekasion o nitre nübaibare ye aibe raba niken gätä yebätä. Nitre nübai ñaka aune rikadre gätä kri nuaindi kä mada känti yebätä angwane, kä ñaka raba kwen kräke.

4. ¿Kukwe meden käkwe ni dimikai kukwe kädrie köbö kwatire kwatire te ye kräke?

⁴ Mäkwe ja töimika nüke köbö jökrä te gätä kri ye känenkri, ne kwe täkärä kwandre mäi. Kukwe ükaninte kädriekäre yebätä mäkwe ñäkä gätä kri ye känenkri, ne kwe mäkwe ja brukwä ükadrete kukwe ye kräke (Esd. 7:10). Ni gätä kömikaka käkwe gätä kömikadre musika kena yebiti angwane mäkwe kukwe nua kwin, mäkwe ja töimika kantare bätä orasion nuaindi kena ye kukwe nuin.

5. ¿Mä mräkätre raba dre nuainne ne kwe gätä kukwe nuadre täte kwetre?

⁵ Nitre ja mräkäre jökrä käkwe täkädre jabe gätä kri yete angwane, nitre rüne raba monsotre kwe dimike, ne kwe kukwe kädriei ye kukwe nuadre kwin kwetre (Deu. 31:12). Ni jökrä nübaita ñäke texto yebätä Bibliabätä. Ne madakäre, kukwe ütiäte nikrä ye nikwe tikadre täräbätä, ye käkwe ni dimikai kukwe kädriedre ye kukwe nuin aune ye bitikäre ni raba kukwe ütiäte ye ngwenta törö jai. Mäkwe ja töimika ñaka blite o nüke krö ngwarbe kukwe kädriedre ye ngwane. Celular tärä mäkwe angwane mäkwe ñaka kukwe mika, ne ñan ñobätä aune ye raba ni bätä ni mada töi kwite ngwarbe. Kukwe kädriedre köbö kwatire kwatire yete, meden abokän rabadre ütiäte nikrä ye nikwe kädriere ni madabe.

6. ¿Kukwe meden kwin tä nemen bare gätä kri yete bätä nikwe dre nuaindre ne kwe rabadre nikwe?

⁶ Kätä kri köbömä yete kukwe kwin krubäte tä nemen nikwe: nita ja mäke kwin ja mräkätre kristiano yebe, ye abokän erere nitre ñaka kukwebätä ñaka nuainne jire chi (Sal. 133:​1-3; Mar. 10:​29, 30). Ja mräkätre käkwe täkädre mä ken ye ie mäkwe ja mika gare bätä ñänä ruäre mäkwe blita bentre. Ye medenbätä ni rikadre mrö ngwena angwane, ni raba ja mikete gätä käi yekänti aune ni ñaka rikadre mrö kökö kä madakänti. Mäkwe ja töimika blite ni madabe ja dimikakäre kwärikwäri (Rom. 1:​11, 12).

7. ¿Nikwe ja ngwäkitadre ño gätä kri yekrä?

⁷ Ja ngwäkita. Kirabe nitre israel ye käkwe dänkwä mikadre dän ye kräbäre jai bätä kö bä ño mikadre dän yebiti kwetre, ye Jehovakwe niebare ietre (Núm. 15:​37-41). Ye nämene ngwen törö ietre, niaratre juta deme dianinkä Ngöbökwe ja mikakäre täte. Ye erere kä nengwane, nikwe ja ngwäkitadre kwin gätä kri yekrä aune ñaka ja ngwäkitadre nitre ñaka kukwebätä ye erere; ye köböire ni raba nemen gare bätä kukwe metre ye mike gare ni madai. Ye medenbätä, nikwe dän kwin kitadre jabätä.

8. ¿Gätä kri ye käi känti ni raba kukwe driere ño?

⁸ Kukwe driedre. Nikwe ja töi mikadre känenkri aune nikwe ja di ngwandre angwane, ni raba kukwe driere gätä kri ye käi känti. Ñodre: ja mräkä iti nikani muko kwe yebe, mrö kökö jai mrö rürübäinta yekänti gätä ye bitikäre. Blita kömikakäre solapa ye mikani tuare kwe ni sribikä iti ie, biti ngwanintari kwe: “¿Mä ni kwati turira nere solapa ne ngwen jabätä?”. Ni sribikä käkwe jän niebare ie, akwa ñobätä ye ñaka nämene gare ie niebare kwe. Blitabare jabe kwetre, biti ja mräkä ye käkwe nübaibare gätä kri yebätä.

9. ¿Jehová Ni Nübaikä ye ie ni raba debe bien ño?

⁹ Ja mräkätre kätä kukwe jökrä ye kädriere, blite ni madabe bätä kukwe bämike gätä yete. Akwa Jehová ni Rün kä kwinbiti Ni Nübaikä, kätä mrö ja üaire ye sribere nikrä kä kwatire kwatire te ni tare kwe yebätä (Isa. 65:​13, 14). Ni tö debe biain kukwe nebätä angwane, ni rikadre köbö ye jökrä te aune kukwe Bibliabätä kädriei ye ñaka juandre ja bäre. ¿Mä nibira juto biare mrö ja üaire ye kräke?