“Juta tikwe ükökrö”
1. ¿Nitre Israel nikani mento Egipto ye bitikäre ja ükaninkrö kwetre ye ñobätä ja erebe gätä kri köbömä aune gäta kri känti nitre juta madate nübaita yebe?
1 Nitre Israel nikani mento Egipto ye bitikäre, Moisekwe juta Jehovakwe ükadrekrö ngudre Sinaí yebiti kukwe Kwe ye kukwe nuakäre niebare kwe ie, ne kwe niaratre rabadre niara jürä ngwen jabätä aune rabadre monsotre kwetre tötike ji Kwe yebätä (Deut. 4:10-13). Köbö ye namani ütiäte krubäte raba ruin nie ñobätä ñan aune tödeka kwetre namani dite. Sö kite ja känenkäre yebätä, juta Jehovakwe ja ükaikrö gätä kri köbömä aune gätä kri känti nitre juta madate nübaita yete ne kwe Jehovakwe tötikadre. ¿Nikwe dre nuaindre ne kwe ni dimikadre bäri kwe?
2. ¿Nikwe dre nuaindre ja mikakäre juto gätä kri köbömä ye kräke?
2 Nikwe ja mikadre juto. Nitre Israel ja ükadrekrö ngudre Sinaí yebiti ye kräke rabadre juto niebare Jehovakwe ietre (Éx. 19:10, 11). Ye erere arato, nitre kukwe kädriekä ye ñan aibe rabadre ja mike juto, ñakare aune nitre jökrä näin gätä kri köbömä yebätä ye rabadre nuainne arato. Ñodre, nitre kwati ie kä biandre ngwarbe sribikänti ye tätre ribere jai. Mä raba ja tuin kukwe ruäre ben Nehemías erere. Niara nämene sribire rei Artajerjes kräke yekänti tö nämani kä diainkä ngwarbe jai nänkäre ki ükete Jerusalén, akwa reikwe ñaka niara juain ye nämene gare ie. Ye medenbätä Nehemías orasion nuainbare, dre niei kwe yebätä töbikabare kwin käne kwe aune ñaka kä jürä ngwani kwe jabätä nuainkäre. Reikwe kä biani ie nänkäre aune dimikani kwe ki ükatekäre (Neh. 2:1-9). Mäkwe köbö kärädre jefe mäkwe ie, akwa ¿mä näin ño aune mä rabai medente ye mäkwe mikanina gare? Nire tä ja di ribere ye nitre umbre käkwe dimikai kä jutobiti. Mäkwe kukwe ükadrete jai ne kwe mä rabadre dekä kukwe kädriei ye känenkri, aune mä tädre juto “olo ketad[ekäre] kwatibe” kukwe kädriei ye kukwe nuakäre (Heb. 2:1, Kukwe Kuin Ngöbökwe).
3. ¿Dre käkwe ni dimikai ja brukwä ükete gätä kri kräke?
3 Ni tädre juto yekäre, nikwe ja brukwä ükadrete kukwe kädriei ye kukwe nuakäre aune mikakäre gare jai ye ütiäte krubäte arato (Esd. 7:10). Kukwe ükaninte kädriedre gätä krite ye täi mikani Internet käi jw.org yete, aune kukwe kädriei ye jökrä kädekata ño bätä bersikulo meden medenbätä blitai ye keteiti o ketebu täi mikani yete arato. Ja Tötikadre ni Mräkätre Yebe ye ngwane, gätä kri köbömä nikwe ye bämäin känenkri ja tötikadre kukwe kädriei yebätä ye kwin krubäte. Kukwe ükaninte kädriedre ye nitre kukwe driekä ruäre tä imprimire jai aune kukwe kädrieta ye ngwane tä kukwe tikebätä jai.
4. ¿Gätä kri köbömä yete kukwe kädrieta yebiti nitre rüne raba monsotre kwetre tötike ño?
4 Munkwe monsotre munkwe tötika. Gätä nuainbare ngudre Sinaí yekänti ye nuainbare ne kwe nitre Israel monsotre kwe tötikadre Jehová kukwei yebätä (Deut. 4:10). Gätä kri köbömä nuainta ye kwin kukwe ye erere nuainkäre. Nitre rüne aune meyere rabadre täke ja ken monsotre kwe yebe kukwe kädriei ye kukwe nuakäre aune rabadre dimike olo mike kukwe kädriei yei. Köbö rikadre köböitire köböitire ta yete kukwe meden namani gare nitre ja mräkäre ie ye raba kädriere jabe, o raba nuainne Ja Tötikadre kwetre Mräkätre Ben ye ngwane.
5. ¿Ni näin gätä kri köbömä yebätä yekwe ni dimikai ño?
5 Gätä kri nuainbare ngudre Sinaí yebiti yekwe nitre Israel dimikani nämenentre juta Ngöbökwe yete ye mike ütiäte jai (Deut. 4:7, 8). Gätä kri köbömä nuaindi ye ükaninte ni dimikakäre ye erere arato. Köbö köbömä jire nikwe ja diainkä nitre gobrainta Satanakwe bämikata kä ngwarbe nötare abokän käme kwrere yebätä, ne kwe ni rabadreta dite aune ni tädre keteitibe jabe kä bä nuäre ja üaire yete (Is. 35:7-9). Köbö Jehovakwe tä nökrö ja ken, yebätä ja ükakröta ja dimikakäre kwärikwäri ye nikwe ñaka juandre ja bäre (Heb. 10:24, 25).