Kukwe drieta ni jökrä ngwärekri ye nuainta bäri kwin
1. ¿Konkrekasion tä kukwe driere yekänti nitre tä näin kwati ta yei dre ribeta nuaindre?
1 Konkrekasion tä kukwe driere yekänti nitre tä näin kwati ta yei ribeta rabadre kukwe ükete kukwe driekäre ni jökrä ngwärekri mesa o jondron tärä bätä täräkwata mikara tuadre yebiti. Jondron tärä bätä täräkwata mikara tuadre yebiti kukwe driedre angwane, ni kukwe driekä tädre iti nünaninkä ken o täkäni tibien ken. Mesa yebiti tärä o täräkwata mikadre angwane ni kukwe driekä tädre nibu ken. Nitre ye jökrä ja di ngwandre ja töi mike jäme aune kä tädre jutobätä. Nitre rükadre jondron tärä bätä täräkwata mikara tuadre ye ken angwane, ni kukwe driekä iti raba niere krörö blita kömikakäre: “¿Biblia tä dre niere kukwe nebätä ye mä tärä ngwentari jai?”. Ye ngwane ni kukwe driekä mada iti o nibu tädre jondron tärä bätä täräkwata mikara tuadre yekänti aune rabadre blite nitre madabe.
2. Jondron tärä bätä täräkwata mikara tuadre yebiti kukwe drieta ni jökrä ngwärekri ye köböire kukwe kwin namani bare ye niere.
2 Kukwe drieta ni jökrä ngwärekri ye köböire nitre kwati niena ja tötike Bibliabätä. Ñodre, meri nänkä kwela krite käkwe ja töi mikani kukwe tike ni testiko Jehovakwe yebätä, akwa Ju ja Ükarakrö ñaka kwani jire ie. Bämän nikani krati ta ye bitikäre kwela kri yekänti tärä bätä täräkwata jutuabare mesabiti ie. Ye ngwane jatani ja tötike Bibliabätä, aune kä nengwane niara tä ja ngökabare ñöte bätä tä kukwe driere siba ni jökrä ngwärekri.
3. ¿Nitre tä kukwe driere ni jökrä ngwärekri ye tä dre niere kukwe drieta ye kwrere yebätä?
3 Meri Testiko iti tä kukwe driere ye kwrere ni jökrä ngwärekri käkwe niebare: “Nitre ruäre tä nüke täräkwata Ni Mikaka Mokre bätä ¡Despertad! sö kratire kratire ye käräkäre jai. Nitre mada abokän ie ni testiko Jehovakwe ñaka gare jire. Kukwe drieta ye erere köböire kukwe drie raba nitre kwati ie”. Meri Testiko mada käkwe niebare: “Kukwe drieta bä jene aune kwin krubäte ñobätä ñan aune nitre tä kite ni kokwäre, ruäre ngwane dre nuainta ye töta nemen gai jerekäbe yebätä”.
4. ¿Jondron tärä bätä täräkwata mikara tuadre ye nikwe mikadre kä arabe känti, köbö arabe te aune ora arabe te ye ñobätä bäri kwin?
4 Jondron tärä bätä täräkwata mikara tuadre ye mikadre kä arabe känti, köbö arabe te aune ora arabe te ye bäri kwin. Ye erere nuaindi angwane, nitre täi tuin käre jite, yebätä rabai bäri nuäre kräketre kukwe ngwantarikäre o tärä bätä täräkwata käräkäre jai. ¿Konkrekasion mäkwe kukwe ükaninante kukwe driekäre ni jökrä ngwärekri? Mäkwe ja töi mika nuainbätä aune kä rabadre juto mäbätä “Ngöböta gobrane ño [...] ye [...] kädrie[käre] ni mda mdabe” (Luc. 9:60, Kukwe Kuin Ngöbökwe).