Nikwe ñaka kä juandre ngwarbe ta nita kukwe driere ye ngwane
Sribi Ngöbökwe nuainbare kä 2014 yete ni testiko Jehovakwe käkwe kukwe driebare 1,945,487,604 ora, yebiti nita bämike ni töita kwatibe ja di ngwen sribire Jehová kräke (Sal. 110:3; 1 Cor. 15:58). “Kä kitera neme braibe ni käne” yebätä, ¿nita kä denkä jai kukwe driekäre ye ngwane ni raba blite bäri nitre kwati ben? (1 Cor. 7:29, Kukwe Kuin Ngöbökwe [WBT].)
Nikwe ja töi mikadre biare kukwe ruäre nuainkäre ne kwe nikwe ñaka kä juandre ngwarbe ta nita kukwe driere ye ngwane. Ñodre, ruäre ngwane nita niken kukwe driere akwa kätä niken ora krati o bäri ta aune ni ñaka blite jire ni iti ben, ¿ni raba dre nuainne ne kwe nitre mada kwandre nie? Nita kukwe driere yekänti kukwe ñaka tä nemen bare ja erebe, akwa kukwe nieta ja käne ne raba ni dimike ne kwe nikwe ñaka kä juandre ngwarbe ta aune ni ñaka ja di ngwain ngwarbe (1 Cor. 9:26).
Kukwe drieta ju ju te. Kä kwati krubäte te ja mräkätre tätre kukwe driere dekäkri ju ju te. Akwa, nitre kwati tätre sribire dekä nemen dere, yebätä ¿kukwe drieta ju ju te ye ni raba nuainne derekri o kätä kite de ye ngwane? Ora ye näre nitre tätre gwi aune töita bäri jäme. Ne madakäre, dekäkri ni raba kukwe driere bäri kwin ji ngrabare o jondron rürübäinta yekänti.
Kukwe drieta nitre tä nemen kwati yekänti. Mesa bätä jondron tärä mikara tuadre ye mikadre nitre kwati tä näin ta yekänti, akwa kä medenkänti konkrekasion käkwe kukwe driedre ye erere känti mikadre (mäkwe Sribi Nikwe Ngöbökrä julio 2013, página 5 ye mika ñärärä). Kukwe rüarebätä nitre ñaka rabadrera näin kwati ta kä yekänti angwane, Nitre Umbre Sribi Ngöbökwe Jie Ngwanka Konkrekasionte raba jondron ye kwitamana kä madakänti aune mikadre nitre tä näin kwati ta yekänti.
Nitre tuadrebiti bätä tötikadre Bibliabätä. Kukwe drieta yekänti ora ruäre te nitre ñaka tä kwen krubäte nie. ¿Ora ye näre ni raba niken nitre tuinbiti aune nitre tötike Bibliabätä? Ñodre, kukwe drieta ju ju te dekäkri sabadote ye ngwane nitre kwati tä kwen nie angwane, ¿ni raba niken nitre tötike Bibliabätä derekri o kätä kite de ye ngwane? O nita niken karote nitre tuinbiti angwane, ni rikadre braibe karo jene jene te ye bäri kwin ne kwe nikwe ñaka kä juandre krubäte ta.
Nita kä denkä jai kukwe driekäre ye ni raba täine, akwa nikwe blitadre bäri nitre kwati ben ye käkwe kä mikai bäri juto nibätä. Kukwe drieta yekänti ora ruäre te nitre ñaka tä kwen krubäte nie angwane, nikwe ja di ngwandre kukwe driere bä jene. Nikwe oradre Jehovai, niara “Sribi Bkänkä” yei, ne kwe ni dimikadre kwe ñaka kä juen ngwarbe ta nita kukwe driere ye ngwane (Mat. 9:38, WBT).