Sribi ñaka nuainbare erere nuaindi sö agosto yebätä
Nikwe täräkwata chi mrä döräidi Kä jökräbiti tibien
1. ¿Gobran Ngöbökwe ükaninte yebiti kä rabadre 100 ye nibira känime yebätä täräkwata chi meden döräidi Kä jökräbiti tibien?
1 Gobran Ngöbökwe ükaninte yebiti kä rabadre 100 ye nibira känime, yebätä ¡nikwe täräkwata döräidre Jehová käikitakakäre ye kwin krubäte! Sö agosto yebätä nikwe täräkwata chi mrä kädekata, ¿Kukwe ütiäte ngwantarita jai ye medente raba nemen gare nie? ye döräidi Kä jökräbiti tibien. Täräkwata ye tä nitre töi mike kukwe ngwantarita kwetre jai ye känene Bibliabätä aune Internet käi jw.org ye raba niaratre dimike ño ye mikata garebätä arato.
2. ¿Nikwe dre nuaindre “ngwänänkä[käre] ja dibiti Jehová käikitakakäre” siba sö agosto yebätä?
2 Ngwänäinkä ja dibiti Jehová käikitakakäre. Nitre kukwe driekä dimikakäre kukwe driere bäri, kukwe kwin ükaninte, ne kwe nitre kukwe driekä ja ngökabarera ñöte törbadre prekursor ausiliar nuaindi angwane, raba nuainne 30 ora sö agosto yebätä. Sö agosto yebätä viernes, sabado aune domingos ye krärike, yebätä nitre kukwe driekä kwati tä sribire o tä näin kwelate lunes nemen viernes ye raba prekursor ausiliar nuainne sö yebätä. Ni ja tötikaka Bibliabätä mäbe o monso mäkwe raba nemen kukwe driekä angwane, mäkwe blita biare ni gätä nitre umbrekwe köböikitaka tä konkrekasionte yebe. ¡Sribi ñaka nuainbare erere nuaindi sö agosto yebätä ye ngwane niaratre rabai kukwe driekä yekwe dimikai krubäte! Nitre prekursor regular kwati tä ora nuainne jökrä kä kwati te ye bitikäre nementre ja düke sö agosto yebätä, akwa niaratre raba ora ükete jai ne kwe rabadre kukwe driere bäri sö yebätä arato. Sö agosto yebätä nitre ja mräkäre rabadre ño “ngwän[enkä] ja dibiti Jehová käikitakakäre” ye rabadre biare töbikebätä (Esd. 3:11; Prov. 15:22).
3. ¿Täräkwata döräidi ye ngwane dre rabadre bare ie ni tö?
3 Täräkwata döräidi ye erere nikwe döräibarera, akwa ne abokän nikwe döräidre bäri ñan rababare bare ye erere ie ni törba. ¿Sö agosto yebätä nikwe ora nuaindi bäri, nitre kukwe driekä rabai bäri, aune nitre prekursor ausiliar rabai bäri? Kä 2014 nete sribi Ngöbökwe nuainta ye jatai krüte ye ngwane, ¡Kä jökräbiti tibien nikwe ja di ngwain sribire Jehová kräke yebätä ni dimikadre kwe ne kwe sö agosto yebätä nikwe kukwe driedre bäri ñan rababare bare ye erere! (Mat. 24:14.)