¿Mä raba prekursor ausiliar nuainne?
1. ¿Ñobätä ni raba kukwe driere bäri Jesús ja nire biani ni ütiäre Ngwainta Törö jai ye käi näire?
1 Jesús ja nire biani ni ütiäre Ngwainta Törö jai ye käi näire ni raba kukwe driere bäri. Jehová Monso kwe biani ni kökatarikäre yebiti niarakwe bämikani ni tare krubäte kwe yebätä ni rabadre töbiketari kä ye näire (Juan 3:16). Ye köböire kätä nemen juto ni brukwäbätä aune ni töta nemen blitai bäri ni madabe Jehová aune dre nuainta kwe ni kä tibienbätä kräke yebätä (Is. 12:4, 5; Luc. 6:45). Arato köbö ye näire nita kä jutobiti nitre gare nie aune nitre ie nita kukwe driere nübaire ne kwe niaratre rükadre Jesús ja nire biani ni ütiäre Ngwainta Törö jai yebätä nibe. Ye bitikäre, nitre nükani köbö ye näire ye nikwe tuadrebiti. ¿Mäkwe prekursor ausiliar nuaindi kukwe driekäre bäri sö marzo, abril aune mayo yebätä?
2. ¿Ñobätä sö marzo ye rabai kwin krubäte prekursor ausiliar nuainkäre?
2 Sö marzo ye ütiäte. Prekursor ausiliar nuainkäre sö marzo ye kwin krubäte. Nire nire käkwe ja mikadre prekursor ausiliar ye raba 30 o 50 ora nuainne. Sö marzo yete ni ni tuabitikä rükadre angwane, nitre prekursor ausiliar ye raba nemen gätä nuainta nitre prekursor regular aune especial ben ye jökräbätä arato. Köbö 26 marzo kä 2013 yete, nitre mada nübaidi Jesús ja nire biani ni ütiäre Ngwainta Törö jai kräke köbö 1 marzo yete ja känenkäre, nuaindi bäri köbö kabre te kä känente ye kräke. Ne madakäre, sö marzo yebätä bämän rabai krärike täte. Ye medenbätä, sö ye raba nemen ño ütiäte mä kräke yebätä mäkwe töbika.
3. ¿Ni raba dre nuainne kukwe driekäre bäri?
3 Biare köbö ükadrete jai. Nengwane mä rabadre töbike köböta ükaninte jondron nuainkäre mäi yebätä aune kukwe meden mä rabadre ükete ye mikakäre gare jai ne kwe mä rabadre prekursor nuainne. Ni ja mräkäre käkwe ja dimikadre ye ütiäte krubäte, ye medenbätä mä tädre Ja Tötike mä Mräkätre ben ye ngwane mäkwe kä dianka jai mä mräkätre töita dre nuainbätä ye kädriekäre ben aune ora ükatekäre jai (Prov. 15:22). Mä ñan raba prekursor ausiliar nuainne angwane mäkwe ñaka ja di ngwan nekä. ¿Mä raba ora ükete jai ne kwe kä rabadrete bäri mäi kukwe driekäre? ¿Mä raba kä denkä bäri jai kukwe driekäre bämän kratire kratire te?
4. ¿Sö marzo, abril aune mayo yebätä nikwe sribidi bäri ye köböire dre kwin rabai nikwe?
4 Sö marzo, abril aune mayo yebätä nikwe kukwe driei bäri angwane, nikwe sribidi Jehová kräke bätä ni mada dimikai nikwe ye käi rabai juto nibätä (Juan 4:34; Hech. 20:35). Bäri ütiäte, nikwe sribidi ja brukwä kwinbiti ye käi rabai juto Jehovabätä (Prov. 27:11).