Kukwe driekäre

Sábado kena diciembre yebätä ja tötika Bibliabätä kömikadre ño

“Nitre rüne kwati tö monsotre kwetre tuai Ngöbö mike gare jai aune tarere. ¿Nitre rüne rabadre monsotre kwetre dimike Ngöbö tarere, o monsotre rabadre ye nuainne akwle raba ruin mäi?” Mäkwe tuanmetre blite. Biti täräkwata Ni Mikaka Mokre 1 diciembre página mrä ye mäkwe mika tuadre ie, aune mäkwe kukwe ngwantarita kena ye kädrie ben bätä texto keteitibätä mäkwe ñäkä. Mäkwe täräkwata ye drie ie aune mäkwe köbö ükate jai kukwe mada ngwantarita ye kädriekäre ben.

Ni Mikaka Mokre 1 Diciembre

“Nunta näin blitakäre Ngöböbätä. Nitre itire itire tä kukwe jene jene niere Ngöböbätä, akwa ¿nitre kwati tä mike tuin jai ni dite krubäte ye erere, o ja ketamuko töita nibätä ye erere tätre mike tuin jai raba ruin mäi? [Mäkwe tuanmetre blite.] Nikwe ja ketadre ño Ngöböbe ie tö ye Biblia tä mike gare nie. [Mäkwe ñäkä Santiago 4:8a yebätä.] Nikwe kukwe ketamä nuaindre rökrakäre Ngöbö ken ye mikata gare täräkwata nebätä.”

¡Despertad! Diciembre

“Bren keteiti tä nitre kwati ngwen töbike yebätä nunta blite jötrö ngwarbe. Organización Mundial de la Salud tä mike gare erere, bren tä nemen nitre töite, ñodre, nita nemen ulire krubäte, ye kisete nitre nibokä jene jene ye ngätäite iti rabai bren. ¿Nita nemen bren töite ye tä bäri nirien raba ruin mäi? [Mäkwe tuanmetre blite.] Ja känenkäre bren aune ja tare nika ñaka rabaira käbämikata Bibliakwe. [Mäkwe ñäkä Apocalipsis 21:3, 4.] Nita nemen bren töite yebätä kukwe meden meden mikata gare abokän rabadre gare nie ye mikata gare täräkwata nebätä.”